भांगरभूंय | प्रतिनिधी
नवी येवजण हाडपाची मुख्यमंत्र्यांची घोशणा
उण्या व्याज दरांत उपलब्ध करून दितले रीण
50 वर्सांत जावंक नाशिल्ली उदरगत 11 वर्सांत
भांगरभूंय । प्रतिनिधी
पणजी : गोंयांतल्या अर्थीक नदरेन दुर्बळ घटकांतल्या (र्डब्ल्यूएस) व्यक्तींक पक्कें घर बांदपाक तशेंच घराचे दुरुस्ती खातीर सरकार बेगिनूच नवी येवजण हाडटले, अशी घोशणा मुख्यमंत्री डॉ. प्रमोद सावंत हांणी केली. शुक्रारा पणजे पीएम आवास येवजम ग्रामीण खाला आयोजीत केल्ले कार्याशाळेच्या उक्तावण सुवाळ्यांत ते उलयताले. ह्या वेळार केंद्रीय ग्रामीण विकास राज्यमंत्री डॉ. चंद्रशेखर प्रेमासामी, मंत्री गोविंद गावडे, आमदार प्रेमेंद्र शेट, आंतोन वाझ हांचे सयत हेर अधिकारी हाजीर आशिल्ले.
मुख्यमंत्र्यान सांगलें, केंद्र सरकारान सुरू केल्ल्या सगल्यां खातीर घर उपक्रमाची गोंयांत अंमलबजावणी चालू आसा. तशेंच गोंय सरकार लेगीत विवीध गृह येवजण्यो चालीक लायता. अटल आसरा खाला गरजेवंत व्यक्तींक 1.5 लाख रुपयांची मजत दितात. गोंयांत एससी, एसटी आनी ओबीसी समाजांतल्या व्यक्तींक घर बांदपा खातीर अर्थीक मजत दितात. सध्या सरकार अर्थीक नदरेन दुर्बळ घटकांतल्या व्यक्तीं खातीर गृह येवजण तयार करता. हे येवजणे खाला ह्या वर्गांतल्या गरजेवंत व्यक्तींक उण्या व्याज दरांत रीण उपलब्ध करून दितले.
गोवा सी, सॅण्ड आनी सन पुरतें मर्यादीत उरूंक ना. आमी आतां स्पिरिच्युअल म्हणल्यारूच अध्यात्मीक पर्यटनाक लेगीत चालना दिल्या. गोंय ल्हान राज्य आसलें तरी हांगा 100 टक्के साक्षरता, सगल्यांत चड जीडीपी, सगल्यात चड दर व्यक्ती उत्पन्न दर आसा. डबल इंजीन सरकाराक लागून गोंयांत फाटल्या 50 वर्सांत जावंक नाशिल्ली तितली उदरगत फक्त 11 वर्सांत जाल्या. केंद्र सरकाराच्या 13 फ्लॅगशीप उपक्रमा मदले गोंयान 80 टक्क्यां परस अदीक पुराय केल्यात. सध्या हे उपक्रम पुराय करपांत गोंय देशांत सगल्यांत मुखार आसा, अशें मुख्यमंत्र्यान सांगलें.
केंद्र सरकाराच्या आत्मनिर्भर भारत ह्या उपक्रमाचे नदरेन गोंयांत स्वयंपूर्ण गोंय सुरू केलां. फाटल्या कांय वर्सांत हाका बरो प्रतिसाद मेळ्ळा. ह्या उपक्रमाक लागून गोंय आनी केंद्र सरकाराच्यो विवीध येवजण्यो गोंयांतल्या 90 टक्के लोकां मेरेन पावोवपाक सरकाराक येस आयलां. गोंयांत प्रधानमंत्री ग्रामीण आवास येवजणेचे लाबार्थी उणे आसले तरी अर्ज केल्ल्या चडश्या जाणांक हाचो लाव मेळ्ळा. गोंयांतल्या 347 महिला बचत गटांनी फाटल्या 10 वर्सांत 340 कोटी रुपयांची उलाढाल केल्या, अशें मुख्यमंत्री डॉ. सावंत हांणी सांगलें.
पर्यावरण सांबाळून उदरगत
गोंयाचे एके वटेन दर्या जाल्यार दुसरे वटेन अस्तंत घांट आसा. हाका लागून उदरगत काम करपाक खूब उणी सुवात आसा. अशें आसलें तरीय सरकार पर्यावरणाची संतुळाय सांबाळून उदरगत करता. पर्यावरण संवेदनशील आराखडो केंद्राक धाडपाक गोंय देशांत पयलें आसतलें, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
