भांगरभूंय | प्रतिनिधी
मुख्यमंत्रीः गरज पडल्यार धर्मांतर बंदी कायदो
भांगरभूंय । प्रतिनिधी
पणजी : गरज पडल्यार येत्या त्या अधिवेशनांत सरकार धर्मांतर बंदी कायदो करतले. म्हापसा हांगा डॉमनीक डिसोझा हाचे अटके उपरांत मुख्यमंत्र्यांनी हें विधान केलां. डॉमनीक डिसोझा हाचे आड खूबश्यो कागाळी आयिल्ल्यो. हाका लागून ताका अटक जाली, अशें मुख्यमंत्री डॉ. प्रमोद सावंत हांणी सांगलां.
भाजप राज्य कार्यकारिणी उपरांत उलयतना मुख्यमंत्र्यांनी ही म्हायती दिली.
येत्या ते लोकसभा वेंचणुके खातीर ‘अब की बार मोदी सरकार’ ही घोशणा आसची ना, जाल्यार ‘अब की बार 324 पार’ ही घोशणा आसतली, अशें मुख्यमंत्री डॉ. प्रमोद सावंत हांणी कार्यकारिणी बसकेंत केल्ल्या भाशणांत सांगलें.
भाजप राज्य कार्यकारिणी बसकेंत उलयतना मुख्यमंत्र्यांनी हें विधान केलां. धर्मांतरणाक लागून म्हापशें पुलिसांनी डॉमनीक डिसोझा हाका अटक केल्ली. ताची जामिनाचेर ताची सुटका जाल्या. हे अनुशंगान मुख्यमंत्री डॉ. प्रमोद सावंत हांणी हें भाश्य केलां. मोपा विमानतळाचेर प्रवाशां सयत म्हाल येरादारी सेवा लेगीत आसतली. खंयचेय स्थितींत येत्या 15 ऑगस्टाक मोपा विमानतळाच्या पयल्या टप्प्याचें उक्तावण जातलें, अशें तांणी म्हणलें. मोपा विमानतळा सयत मुरगांव बंदराचो विकास जातलो. रेल्वे, बंदर आनी विमानतळाक लागून गोंय हें देशांत सगळ्यांत पसंतीचें पर्यटन थळ जातलें. मोदी सरकारान कल्याणकारी येवजण्यो सुरू केल्यात. या सगळ्या येवजणांचो लाव गोंयकारांनी घेवपाक जाय. कार्यकर्त्यांनी सगळ्यो येवजण्यो लोकां मेरेन पावोपाक जाय.
भारतीय जनता पक्षाची राज्य कार्यकारिणी बसका पणजे हॉटेलांत जाली. प्रभारी सी. टी. रवी, प्रदेश अध्यक्ष सदानंद शेट तानावडे, मंत्री तशेच आमदार बसकेक हाजीर आसले. 2014 तशेंच 2019 चे लोकसभा वेंचणुकेंत भाजपाक भोवमत मेळ्ळें. तेन्ना ‘अब की बार मोदी सरकार’ अशी घोशणा आसताली. आता ‘अब की बार मोदी सरकार अशी घोशणा आसची ना, जाल्यार ‘अब की बार 324 पार’, अशी घोशणा आसतली. विधानसभा वेंचणुकेंत सरकार तशेंच पक्ष संघटणा हांणी एकठांय वावर केलो. हाका लागून पक्षाक भोवमत मेळ्ळें. लोकसभा वेंचणुकेंत लेगीत सरकार आनी संघटणां हांणी एकठांय वावर करपाची गरज आसा, अशें मुख्यमंत्र्यांनी सांगले. विरोधी पक्ष पयलीं जागे जाय ना. ते उसरा जागे जातात. सध्या कोणूच विरोधक नासलो तरी वावर करीत रावपाक जाय. सरकाराचो वावर, येवजण्यो तशेच धोरणां लोकां मेरेन पावपाक जाय. पूल, रस्ते तशेंच मुळाव्यो सुविधा उबारपाचो वावर नेटान चालू आसा. गरिबां खातीर मोदी सरकारान तरेकवार येवजण्यो सुरू केल्यात. संवसारीक फुडारी जावपाच्या दिकेन प्रधानमंत्री नरेंद्र मोदी हांची वाटचाल चालू आसा, अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
