भांगरभूंय | प्रतिनिधी
नवी दिल्ली, खबरां संस्था ः देशांतल्या सगळ्या दूरसंचार कंपनींक USSD कोडांतल्यान कॉल फॉरवर्ड करपाची सुविधा बंद करची अशें दूरसंचार खात्यान (DoT) कळयलां. ऑनलायन आनी फेक कॉला वरवीं जावपी फटवणूक आडावपाक सरकारान हो निर्णय घेतला.
ह्या आदेशा उपरांत मोबायल फोनांत *401# डायल करून कॉल फॉरवर्ड करपाची सुविधा 15 एप्रील सावन बंद जातली. USSD म्हळ्यार अनस्ट्रक्चर्ड सप्लिमेंटरी सर्व्हिस डेटा – हो एक ल्हान कोड. हाच्या आदारान कोड डायल करून सेवा सक्रिय आनी निश्क्रीय करतात. सादारणपणान मोबायल वापरपी फोन बॅलेन्स तपासपाक, कॉलर ट्यून सेट करपाक, यूपीआय वापरपाक आनी IMEI क्रमांक जाणून घेवपाक ते डायल करतात.
USSD कॉल फॉरवर्डिंग सेवा कशी काम करता?
मोबायल वापरप्यान *401# डायल करून अनवळखी क्रमांक ‘B’ चेर फोन केल्यार, मागीर ‘A’ वापरप्याच्या मोबायलाचेर आयिल्ले सगळे कॉल वा संदेश ‘B’ वापरप्याच्या फोनाचेर फॉरवर्ड जातले. म्हणल्यार आतां ‘A’ वापरप्याच्या कॉल आनी संदेशांचो ॲक्सेस ‘B’ वापरप्याच्या हातांत आसा. फटवणूक करपी हीच पध्दत वापरतात. हातूंत स्कॅमर तुमच्या नंबराचेर दूरसंचार पुरवणदार म्हूण फोन करतात आनी तुमकां *401# डायल करपाक सांगतात. तुमी हो नंबर डायल केलो की तो तुमकां अनवळखी क्रमांकाचेर फोन करपाक सांगतलो. तुमी तो नंबर डायल केल्या बरोबर तुमच्या क्रमांकाचेर आयिल्लो दरेक फोन संदेश वा ओटीपी *401# उपरांत तुमी डायल केल्ल्या अनवळखी क्रमांकाचेर फॉरवर्ड जातलो.
सायबर फटवणूक टाळपाचे मार्ग…..
० एटीएम क्रमांक वा चार अंकांचे पिन सारकिल्ले खात्याचे तपशील शेअर करुं नाकात.
० बँक तुमका अशें तरेची म्हायती केन्नाच विचारना. दुबाव आसल्यार बँके कडेन संपर्क सादचो.
० शक्य जाल्यार तुमची वैयक्तीक म्हायती वा तुमचो नंबर सोशल मिडियाचेर शेअर करुं नाकात.
० दर कांय म्हयन्यांनी तुमचे एटीएम वा जीमेल, फेसबूक, इंस्टाग्राम पासवर्ड बदलत रावचें.
० कोण तुमकां पयशे धाडटा जाल्यार तुमच्या नंबराचेर ताचे खातीर पिन येना, आयलो जाल्यार शेअर करचो न्हय.
० खंयचोय ॲप इंस्टॉल केल्या उपरांत कांय परवानगी मागता. जशें लोकेशन, कॅमेरो, फोटो आनी व्हिडियो. लोक पळयनासतना आनी वाचीनासतना ओके करतात. हें करप टाळचें. खंयच्याय अॅपाची मार्गदर्शक तत्वां बारीकसाणेन वाचात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
