भांगरभूंय | प्रतिनिधी
नवी दिल्ली, खबरां संस्था : मायक्रोसाॅप्टाची यंत्रणां इबाडिल्ल्यान संवसारभरांतल्या वापरप्यांक समस्यांक तोंड दिवचें पडलां. जायते संगणक आनी लॅपटॉप अचकीत बंद जातात आनी निळी स्क्रीन दाखयतात. हाका लागून संवसारभरांतल्यो बँको आनी विमानतळांचेंय काम बंद पडलां. म्हत्वाचें म्हणल्यार मायक्रोसॉफ्टानय हे घडणुकेची दखल घेतल्या आनी कंपनीन सांगलां की आमकां हे विशीं म्हायती मेळ्ळ्या म्हणून.
युजर्सांनी पोस्ट शेअर करून कागाळ केली
एक्स सोशल मिडियाचेर पोस्ट शेअर करून जायत्या युजर्सांनी हे विशीं कागाळ केल्या. काम करतना तांचो लॅपटॉप अचकीत बंद जाता अशें तांणी सांगलां. तशेंच, तुमचो संगणक त्रासांत आसा आनी तो रिस्टार्ट करचो पडटलो, अशे संदेश संगणकाचे स्क्रिनीचेर येत आसात अशें युजर्सांनी सांगलां.
मायक्रोसॉफ्टानय दखल घेतली
मजगतीं, मायक्रोसॉफ्ट कंपनीन ह्या कागाळींची दखल घेतल्या. मायक्रोसॉफ्टान हे संबंदी प्रतिसाद दिवन सोशल मिडिया एक्सचेर पोस्ट केला. मायक्रोसॉफ्ट प्रणाली बंद जाल्ल्यान संवसारभरांतल्या संगणक आनी लॅपटॉपांचेर परिणाम जाला. आमी हाची दखल घेतल्या आनी ताचे विशीं म्हायती घेतात. ही सेवा बेगीनांत बेगीन परतून हाडपाचो आमी यत्न करतात अशें कंपनीन सांगलां.
क्राउडस्ट्रायकान जारी केल्लें विधान
क्राउडस्ट्रायकान हे संबंदी निवेदन जारी केलां. ह्या कागाळीं विशीं आमकां म्हायती मेळटा आनी फुडली सुचोवणी जाय मेरेन वापरप्यांनी वाट पळोवची अशें तांणी ह्या निवेदनांत सांगलां. हाचे वांगडाच विंडोजचेर चलपी संगणकांत बीएसओडीची समस्या निर्माण जाल्या आनी वापरप्यांनी ही समस्या स्वता सोडोवपाचो यत्न करचो न्हय अशेंय तांणी सुचयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
