भांगरभूंय | प्रतिनिधी
-केंद्रा कडेन चर्चा करून प्रस्न सोडोवपाची मुख्यमंत्र्यांची हमीपणजीः कोस्टल रेग्युलेशन झोन (सीआरझॅड) परवान्याक लागून राज्यांतलो परंपरीक पद्दतीन रेंव काडपाचो प्रस्न आडखळिल्लो. पूण केंद्र सरकारा कडेन हे विशीं चर्चा केले उपरांत रोखडोच परंपरीक रेंव काडपाच्या प्रस्नाचेर उपाय मेळटलो अशें आश्वासन मुख्यमंत्री डॉ. प्रमोद सावंत हांणी दिलें.
खण खात्याच्या अधिकाऱ्यां कडेन खण ब्लॉक, रेंव काडप, खणीं संबंदी बसके उपरांत ते पत्रकारां कडेन उलयताले. परंपरीक रेंव काडप सुरू करून फाटल्या कांय म्हयन्यां सावन सरकारान गोंयकारांक आदार दिवपाचो यत्न केला. पूण सीआरझॅड कडल्यान परवाने मेळूंक नाशिल्ल्यान ही गजाल कांय दीस थांबल्या. ‘सीआरझॅड’ हो विशय केंद्राच्या अधिकार क्षेत्रांत आशिल्ल्यान केंद्र सरकारा कडेन चर्चा करून रोखडीच रेंव काडपाची प्रक्रिया सुरू जातली अशें मुख्यमंत्री डॉ. सावंत हांणी म्हणालें. पावणेंत खण ब्लॉक मेळिल्ल्या कंपनींकय कांय प्रस्न आशिल्ले. तशेंच बसकेंत त्या प्रस्नांचेर उपाय सोदून काडपाक येस आयिल्ल्याचे तांणी सांगलें.
मजगतीं, गोंयांत रेंव काडप बंद जाल्ल्यान गोंयच्या लोकांक हेर राज्यांतल्यान येवपी रेंवेंचेर आदारून रावचें पडटा. हाका लागून रेंवेंचे दरय वाडून लोकांक अर्थीक त्रास सोंसचे पडल्यात.
चिरेखणी खातीर 28 अर्ज प्रलंबीत
खण खात्याक फुडें चिरे खणींक परवाने दिवपाचो अधिकार आसतलो. तशेंच खण खात्याच्या अधिकाऱ्यांक सुचोवण्यो दिल्यात. सध्या चिरखणी खातीर 28 अर्ज प्रलंबीत आसात आनी तांचेर बेगीन निर्णय घेतले अशेंय मुख्यमंत्री डॉ. प्रमोद सावंत हांणी सांगलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
