थिवींतल्या खाजगी विद्यापिठांतल्यो नोकऱ्यो थळाव्यां खातीरः मुख्यमंत्री

भांगरभूंय | प्रतिनिधी

म्हापशेंः थिवींतल्या नियोजीत खाजगी विद्यापिठांत शिक्षकेत्तर नोकऱ्यो थळाव्या लोकां खातीर शंबर टक्के राखून दवरतले. आमी एमआयटी विद्यापिठाक अशीं सुचोवण्यो दिल्यात अशी घोशणा मुख्यमंत्री डॉ. प्रमोद सावंत हांणी केल्या.

सोमारा 7 तारखेक माडेल-थिवीच्या इतिहासीक महागणपती देवळा लागसार तळ्याच्या आनी भोंवतणच्या वाठाराच्या सोबीतकाय प्रकल्पाचो बुन्यादी फातर बसयले उपरांत मुख्यमंत्री डॉ. प्रमोद सावंत उलयताले. ह्या प्रकल्पा खातीर पर्यटन खातें सुमार 3 कोटी रुपया खर्च करतले. ह्या वेळार पर्यटन मंत्री रोहन खंवटे, नुस्तेमारी मंत्री नीळकंठ हळर्णकार, राज्यसभेचे खासदार सदानंद शेट तानावडे, देवस्थानाचे अध्यक्ष घनश्याम आरोस्कार आनी पंचायतीचे वांगडी हाजीर आशिल्ले.

थिवी हांगा येवपी एमआयटी विद्यापिठाची औपचारिकताय कोमुनिदादीन पुराय केल्या. पूण कांय लोक राजकी फायद्या खातीर हाका विरोध करतात. हो प्रकल्प अस्तित्वांत आयले उपरांत फकत नोकऱ्यो निर्माण जावच्यो नात जाल्यार ह्या गांवाचीय उदरगत जातली. लोकांक ल्हान रेस्टॉरंट सुरू करपाक मेळटले आनी रावपाचीय सुविधा मेळटली अशें मुख्यमंत्र्यान सांगलें.

मोपा विमानतळा लागीं थिवी हो एक थळावो वाठार. दुसरे वटेन दिवचल हो एक व्हड वाठार. थिवीच्या लोकांनी स्वताक नशीबवान मानचें, कारण तांचे कडेन डबल इंजिन सरकार आसा. एकलो थळावो आमदार जो मंत्री आनी दुसरो राज्यसभेचो खासदार. देखून राज्य सरकार आनी केंद्र ह्या दोनूय संस्थांनी काम करूं येता. फुडले धा वर्सां खातीर पेडणें आनी थिवी वाठारां खातीर दिश्टकोण नियोजन करचें पडटलें अशेंय मुख्यमंत्र्यान सांगलें.

आतां उदक वा वीज कसलोच प्रॉब्लेम ना. आमी फुडारा खातीर नियोजन करतात. जातूंत जमनीपोंदा वीज लायनी आनी अखंड इंटरनॅट पुरवण दिवप गरजेचें आसा. जेन्ना आमी फुडाराची येवजण करतात तेन्ना अशीं संस्था आसप म्हत्वाचें. आमकां उद्देगा सारकें शिक्षणीक केंद्र जाय. हांगा रसायनीक उद्देग वा मजूर उद्देग हाडपाचे नाशिल्ले, कारण आमच्या लोकांक व्हायट कॉलर नोकऱ्यो जाय. लोक बरे शिकिल्ले आशिल्ल्यान तांकां वेवसायीक काम जाय. 2027 वर्साचे वेंचणुकेंत भाजपा परतून सत्ता तिगोवन दवरतली. सध्या कांय घटक धर्म आनी जातीच्या आदाराचेर फूट घालपाचो यत्न करतात अशें तांणी सांगलें.

ह्या वेळार मंत्री रोहन खंवटे आनी मंत्री नीळकंठ हळर्णकार हांणी आपले विचार मांडले. देवळाचे अध्यक्ष घनश्याम आरोस्कार हांणी भाग घेवप्यांक येवकार दिवन तांचे उपकार मानले. आरोस्कार हाच्या फुडारपणा खाला देवस्थान समितीच्या यत्नांक लागून ह्या देवळाक हो प्रकल्प मेळ्ळा, अशें तांणी सांगलें.