भांगरभूंय | प्रतिनिधी
पणजी : पियेवपा खातीरच्या उदकाचो उद्देगीक वा वेवसायीक कामा खातीर वापर जाल्यार आतां दंड घालप खात्याच्या साहाय्यक अभियंत्यांक शक्य जातलें. पयली दंड घालपाचे अधिकार सहाय्यक अभियंत्यांक नाशिल्ले.
गोंय उदका पुरवण कायदो 2025ची अधिसुचोवणी जारी जाल्या. 7 फेब्रुवारी 2025 दिसा सभाघरान दुरुस्ती विधेयकाक मान्यताय दिल्ली. राज्यपालान मान्यताय दिले उपरांत अधिसुचोवणी जारी जाल्या. गोंय उदका पुरवण कायदो 2003 मदल्या कलम 6 मदीं दुरुस्ती जाल्या. नळाची जोडणी घेनासताना कोणेय भायले भायर पायपांतल्या उदकाचो पियेवपा खातीर वापर केलो जाल्यार 10 हजार रुपया दंड जातलो. हो दंड घालपा सयत वसुली करपाचे अधिकार खात्याच्या सहाय्यक अभियंत्यांक आसतले. तशेंच कोणेय पियेवपा खातीरच्या उदकाचो वापर उद्देगीक वा वेवसायीक कामा खातीर केलो जाल्यार 50 हजार रुपया दंड जातलो. हो दंड घालपा सयत वसूल करपाचे अधिकार सहाय्यक अभियंत्याक आसतले.
पियेवपा खातीरच्या उदकाचो व्हड प्रमाणांत गैरवापर जाता. कांय जाण जोडणी घेनासतना पायपांतल्या उदकाचो वापर करतात. कांय जाण पियेवपा खातीरचें उदक हॉटेल वा हेर वेवसाया खातीर वापरतात. कायद्यान हाचेर बंदी आसा. आतां कागाळ आयल्यार चवकशी करून दंड जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
