भांगरभूंय | प्रतिनिधी
भलायकी, पुलीस, शिक्षण खात्यांत रित्या पदांचो आंकडो सगल्यांत चड
पणजी : फुडारांत 5 हजार नोकऱ्यो दिवपाची घोशाणा मुख्यमंत्री डॉ. प्रमोद सावंत हांणी सांखळेच्या मेळाव्यांत केलली आसतानाच सरकाराच्या 83 खात्यांनी 6065 पदां रितीं आसात. पुलीस खात्यांत 1 हजारा परस चड पदां रितीं आसात. नर्सी, एलडीसी, शिपाय, पुलीस शिपाय, ड्रायव्हर, एमटीएस, शिक्षक हांचे सयत सरकारी अधिकाऱ्यांची पदां रितीं आसात.
विधानसभेच्या लेखी प्रस्नोत्तरांतल्यान ही म्हायती मेळ्ळ्या. एलडीसी, स्टेनोग्राफर पदां सोडलीं जाल्यार हेर पदां कर्मचारी भरती आयोगाक धाडूंक ना, अशी म्हायती मेळटा. ह्या पदांनी उच्च न्यायालय, दिल्लीतलें गोवा सदन हातूंतल्या रित्या पदांचो आस्पाव आसा.
पुलीस खात्यांत सगल्यांत चड म्हणल्यार 1100 परस चड पदां रितीं आसात. हातूंत पुलीस उपअधिक्षक, पुलीस उपनिरिक्षक, शिपायां सयत मडवळ, म्हालो, एलडीसी ह्या पदांचो आस्पाव आसा. पुलीस शिपाय (वायरलेस)ची 65 पदां रितीं आसात. ह्या पदां खातीर भरतीचे नेम अजून निश्चीत जावंक नात. भरतीचे नेम निश्चीत जातकच हीं पदां भरपाची प्रक्रिया सुरू जातली असो जापेंत उल्लेख आसा.
तशेंच सशस्त्र पुलीस (आर्मड पुलीस) फांट्यात 100 पदां रितीं आसात. हीं पदां भरपाचो प्रस्ताव कर्मचारी भरती आयोगाक सादर केला. बडटी प्रक्रियेन भरपाची आशिल्ली पीएसआयची (सशस्त्र पुलीस)15 पदां रितीं आसात. हीं पदां भरपाची प्रक्रिया सुरू आसात. तशेंच थेट भरतींतल्यान पीएसआयची (सशस्त्र पुलीस) 15 पदां रितीं आसात. योग्य उमेदवार मेळ्ळे उपरांत हीं पदां भरतले असो उल्लेख आसा.
ते भायर पुलीस शिपाय (ड्रायव्हर) 33 जाल्यार सामान्य गटांतल्या पुलीस शिपायांचीं 342 पदां रितीं आसात. ह्या पदां पैकीं 195 पदां भरपाचो प्रस्ताव फाटल्या वर्सा कर्मचारी भरती आयोगाक सादर जाला. अंदूं 93 पदां भरपाचो प्रस्ताव सादर जाला. 49 पदां भरपाचो प्रस्ताव फुडल्या वर्सा (2026) आयोगाक सादर जातलो.
भलायकी खातें, गोमॅकॉंत मेळून 800 परस चड पदां रितीं
भलायकी खातें, गोंय वैजकी म्हाविद्यालय, दंत म्हाविद्यालय आनी मानसीक चिकित्सा (सायकेट्री) ह्या फांट्यांनी सुमार 800 पदां रितीं आसात. फक्त गोंय वैजकी म्हाविद्यालय हॉस्पिटलांत नर्सीची 169 पदां रितीं आसात. नर्सीच्या रित्या पदांचो नेमको आंकडो सोदप सुरू आसा. नेमको आंकडो कळ्ळे उपरांत भरतीची प्रक्रिया सुरू जातली. वॉर्ड सिस्टर, एलडीसी, यूडीसी, प्रयोगशाळा तंत्रज्ञ हांची खूबशीं पदां रितीं आसात.
भलायकी खात्यांत एमटीएसची 123 जाल्यार स्टाफ नर्सीची 86 पदां रितीं आसात. हीं पदां भरपाची प्रक्रिया बेगीनूच सुरू जातली. दंत म्हाविद्यालयांत वट्ट 40 पदां रितीं आसात. हातूंत नर्सी, सहाय्यक प्राध्यापक, एमटीएस हांचो आस्पाव आसा. मानसीक चिकित्सा हॉस्पिटलांत नर्सीची 28 पदां रितीं आसात.
शिक्षण खात्यांत 750 परस चड पदां रितीं आसात. हातूंत उच्च शिक्षण तशेंच तंत्रीक शिक्षणाचो आस्पाव ना. सहाय्यक शिक्षक, एडीईआय, मुख्याद्यापक, एलडीसी आनी मुळाव्या शाळांतल्या शिक्षकांचो आस्पाव आसा.
वीज, भौशीक बांदकाम, उदका पुरवण खात्यांत अभियंत्यांची पदां रितीं आसात. वीज खात्यांत वीज आनी सिव्हील मेळून अभियंत्यांचीं 92 पदां रितीं आसात. भौशीक बांदकाम खात्यांत रितीं आशिल्ल्या 143 पदां पैकीं 71 पदां तरेकवार अभियंत्यांची आसात.
3,390 पदां खातीर थेट भरती
फाटल्या तीन वर्सांत सरकाराच्या सुमार 80 खात्यांतल्यान 60 परस चड खात्यांनी आतां मेरेन सरकाराक म्हायती धाडल्या. ते प्रमाण वेगवेगळ्या खात्यांत थेट 3390 पदां भरतले. चडशीं पदां शिक्षण, उच्च शिक्षण आनी पुलीस खात्यांत आसात. पूण कांय मुखेल सरकारी खात्यांनी पदां भरपा खातीर अजून भरती आयोगा कडेन वळेरी धाडूंक ना. हातूंतलीं कांय खातीं आतां मेरेन कंत्राटी तत्वाचेर नोकर भरती करतात. 2023 वर्सा 22 खात्यांतल्यान 912 पदां विशीं म्हायती दिल्ली. जाल्यार 2024 वर्सा 30 खात्यांनी 1082 पदां विशीं म्हायती धाडिल्ली. ह्या 30 खात्यांतलीं कांय खातीं 2022 वर्साचीं आसात. 2025 वर्सा 41 खात्यांतल्यान 1395 पदां विशीं म्हायती धाडल्यां. हातूंतलीं कांय खातीं फाटल्या दोन वर्सां सावन नोकर भरती प्रस्ताव धाडटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
