भांगरभूंय | प्रतिनिधी
जमनीचो प्रस्न गोंयांत सतत तकली वयर काडीत आसा. पर्वरी वाठारांतल्यो जमनीय ताका आडवाद नात. थंय घरां बांदिल्ल्यांक कांय वर्सां पयलीं तीं सोडून वचात, अश्यो धमक्यो मेळटाल्यो खंय! तेन्ना तें प्रकरण बरेंच गाजिल्लें. 30- 35 वर्सां पयलीं पर्वरी वाठार उजाड, झाडां- पेडां बगर आशिल्लो. मुखेल रस्त्या वयल्यान वतना मेजकींच घरां दिसतालीं. मात, आतां थंय पांय घालपाक जागो ना, अशी परिस्थिती जाल्या. एकामेकांक तेंकून घरां, बंगले, इमारती उब्यो आसात. हांगाच्य 20 कलमी भुंयखंडांचो प्रस्न परत खबरांनी झळकला. सुकूर- पर्वरेच्या ह्या भुंयखंडांची स म्हयन्यां भितर चवकशी करपाचे निर्देश गोंय उच्च न्यायालयान बार्देशाच्या उपजिल्होधिकाऱ्यांक दिल्यात. तो अहवाल उत्तर गोंय जिल्होधिकाऱ्यांक सादर करचो, मागीर दोशी व्यक्तींचेर सरकार योग्य ती कारवाय करतलें, अशें न्यायालयान म्हणलां.
सुकूर जमनी प्रकरणाचेर नीलेश च्यारी हांणी घाल्ली याचिका न्यायपीठान निकालांत काडल्या. हांगा मर्यादे परस चड घरां बांदल्यांत, तीं वेवसायिक उद्देशान भाड्यान दिल्यांत, विकल्यांत, असो तांचो दावो. तांणी पंचायत सचिव, संबंदीत सरकारी प्राधिकरणा कडेन कागाळ केल्ली. मात कोणीच काना- मनार घेतलें ना. मागीर न्यायालयांत याचिका घाली. तातूंत मुख्य सचिवां सयत बऱ्याच जाणांक प्रतिवादी केल्ले. 20 कलमी कार्यावळ ही इंदिरा गांधी प्रधानमंत्री आसतनाची. गरिबांक स्वताचें घर बांदपाक मेळचें म्हूण ती सुरू केल्ली. मात, कांय कडेन हे येवजणे फाटलो हेतू साध्य जावंक ना. 100 चौखण मिटर जमीन घरा खातीर दिवची, जमीन मेळिल्ल्या मनशान जर ताचे भायर सुवात हातासल्या जाल्यार दंड भरून 50 चौ. मि. मेरेन घर नियमित करपाक मेळटलें. जर जमीन धनी सोडून भलत्यानूच ती घेतल्या, अशें सिद्ध जायत जाल्यार राज्य सरकार ती जमीन ताब्यांत घेतलें, अशें बार्देश उपजिल्होधिकाऱ्यान न्यायालयाक लेखी सांगिल्लें, अशें याचिकेंत म्हणिल्लें. आदले आराखडे, बार्देश मामलेदारांनी धाडिल्ल्या अहवाला प्रमाण, ‘हांगाच्या एका सर्व्हेंत 31भुंयखंडांचें वांटप जालां. म्हणल्यार 31 घरां येवपाक जाय. पूण थंय 67 बांदकामां दिसतात’. धक्को दिवपी गजाल म्हणल्यार फक्त णव भुंयखंड हे येवजणेचो मूळ लाव मेळिल्ल्या कुटुंबांचे आसात. न्यायालयाक हें दिसलां. हे भुंयखंड जांणी घेतिल्ले ते दुसऱ्यांक विकल्यात वा दुसऱ्यान तिसऱ्याक विकल्यात काय? आतां सगल्या भुंयखंडांची चवकशी जातली आनी उपरांत दोशी व्यक्तींचेर सरकार कारवाय करतलें. हातूंतली कांय प्रकरणां अनियमित आसात, जाल्यार तीं नियमीत जावं येतात. याचिकादार च्यारी हांच्या घराचेर हालींच सुकूर पंचायतीन कारवाय केल्ली. आपले कागळी कडेन सरकारी यंत्रणांनी आडनदर केल्ल्यान आपूण न्यायालयांत याचिका दाखल केल्ली, अशें तांचें म्हणणें.
च्यारी हांच्या घराचेर कारवाय करतनाचो व्हिडियो गाजिल्लो. तांचें घराचें बांदकाम बेकायदेशीर अशें म्हणीत पंचायतीन मोडिल्लें. तर हाचे फाटल्यान राजकी सुडबुद्धी आसा, असो आरोप कुटुंबान केल्लो. ताचेर लोकांनीय आरत्यो परत्यो प्रतिक्रिया दिल्ल्यो. गोंयांत मालमत्तांचें मोल वाडत आसा. थळाव्यांक घर घेवप कठीण जालां. सरकारान बेगोबेग हस्तक्षेप करून जमनींचेर जावपी अतिक्रमण, विक्री थांबोवची अशी मागणी कांय जाणांनी केल्ली, तर थोड्यांनी बस्ती, नगरी, दोंगर हांचीं नांवांच दिवन, हांगाच्या बेकायदशीर घरांचें कितें, असो प्रस्न केल्लो. अर्थांत सरकारी यंत्रणांनी पोरूं एक- दोन कडेन बेकायदेशीर घरां मोडिल्लीं, ना अशें ना. पूण तीं मुळांत उबीं रावपाकूच दिवंक जायनाशिल्लीं. तकले वयर स्वताच्या हक्काचें पाखें आसचें अशें सगल्यांकूच दिसता. मागीर 10- 15 वर्सांनी तो जागो, घर बेकायदेशीर थारता आनी रातयां तें कुटुंब उद्ध्वस्त जाता. अशें जावंक फावना. घर बांदपा खातीर भोवतेक कुटुंबां जल्मभराची जोड पणाक लायतात, रिणां काडटात, हाचोय विचार जावंक जाय. तांकां तें बांदपाक दिवपी, अतिक्रमण करपाक दिवपी मनशांक खर ख्यास्त, दंड जावपाक नाका? बेकायदेशीर बांदकाम मोडपाची आसा, तशी हें करपाक दिवपी व्यक्तींक ख्यास्त दिवपाची कायद्यांत तजवीज ना काय?
गोंयांत राजकी फुडाऱ्यांच्या आशिर्वादान बेकायदेशीर अतिक्रमण जाल्ल्यो सगल्यांत चड जमनी कोमुनिदादींच्यो आसात. तातूंतले कांय फुडारी आयज संवसारांत नात. सरकारी प्रकल्पां खातीरुय कोमुनिदाद जमनी दिता. पूण त्यो जर दिल्ल्या कामा खातीर वापरूंक नात, जाल्यार परत घेवपाचो हक्क कोमुनिदादीक मेळचो अशें विधेयक सरकारान फेब्रुवारींत मानून घेतलां. ह्या विधेयकाचेर विचार करचो अशी मागणी विरोधकांनी त्या वेळार केल्ली. गोंयांत आतां चड जमनी
उरूंक नात, तांचें, फ्लॅटांचें मोल मळबाक तेंकलां. तातूंत गरिबां खातीर आशिल्ले येवजणे वरवीं दोन, तीन भुंयखंड
एकलोच घेवपाचे प्रकारुय जातात. केन्ना थांबतलें हें भ्रश्टाचाराचें चक्र?
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
