भांगरभूंय | प्रतिनिधी
वर्साक सरासरी 7225 कोटी रुपयांची वाड
फाटल्या पांच अर्थीक वर्सांतली आंकडेवारी
पणजी: फाटल्या पांच अर्थीक वर्सांत गोंयकारांच्या बँक बॅलन्सांत 36 हजार 125 कोटी रुपयांची वाड जाल्या. हाचोच अर्थ बँक ठेवींत वर्साक सरासरी 7225 कोटी रुपयांची वाड जाल्या. 2020-21 वर्सा गोंयकारांच्या बँकांतल्यो ठेवी 85 हजार 235 कोटी रुपयांच्यो आशिल्ल्यो. 30 सप्टेंबर 2024 अखेरेक तातूंत वाड जावन त्यो 1.21 लाख कोटी रुपया जाल्यात. वयल्या काळांत बँक ठेवींनी 42.38 टक्के वाड जाल्या. अर्थीक सर्वेक्षण 2024-25 मदल्यान ही म्हायती मेळ्ळ्या.
अहवाला प्रमाण अर्थीक वर्स 2021-22 वर्सा बँकांनी ठेवींच्या स्वरुपांत 93 हजार 618 कोटी, 2022-23 वर्सा 1.01 लाख कोटी जाल्यार 2023-24 वर्सा 1.12 लाख कोटी रुपया आशिल्ले. 30 सप्टेंबर 2024 अखेरेक राज्यांतल्या एकूण ठेवी पैकीं हातूंतली 67.54 टक्के ठेवी ह्यो भौशीक मळा वेल्या बँकांनी आसात. तशेंच खाजगी बँकांनी 27.36 टक्के, सहकारी बँकांनी 4.74 टक्के जाल्यार लघू वित्तीय बँकांनी सगल्यांत उणी म्हणल्यार फक्त 0.36 टक्के ठेवी आशिल्ल्यो.
फाटल्या एका वर्सांत बँकां वतीन वितरीत केल्ल्या रिणांचे रकमेंत वाड जाल्या. राज्यातल्या बँकांनी 30 सप्टेंबर 2024 अखेरेक 39 हजार 630 कोटी रुपयांचीं रिणां वितरीत केल्लीं. फाटल्या वर्सा म्हणल्यार 30 सप्टेंबर 2023 अखेरेक 35 हजार 729 कोटी रुपयांचें रीण वितरीत केल्लें. सप्टेंबर अखेरेक निहाय पळयत जाल्यार 2020 वर्सा 27 हजार 609 कोटी, 2021 वर्सा 30 हजार 609 कोटी, 2022 वर्सा 30 हजार 769 कोटी रुपयांचें रीण वितरीत केल्लें.
सप्टेंबर 2024 अखेरेक रीण दिवपांत लेगीत भौशीक बँको मुखार आसात. वट्ट रिणां पैकीं भौशीक बँकांनी 60.40 टक्के, खाजगी बँकांनी 30.24 टक्के जाल्यार सहकारी बँकांनी 9.04 टक्के रिणां वितरीत केल्यांत. सप्टेंबर 2023 वर्सा राज्यातल्या बँकांच्यो ठेवी आनी रिणाचें गुणोत्तर 31.86 टक्के आशिल्लें. सप्टेंबर 2024 अखेरेक तें 0.80 टक्क्यांनी वाडून 32.66 टक्के जालें. हाचोच अर्थ ह्या अर्थीक वर्सांत बँकांनी चड रिणां वितरीत केल्ल्याचें अहवालांत नमूद केलां.
एमएसएमई मळार सगल्यांत चड रीण
अहवाला प्रमाण 30 सप्टेंबर 2024 अखेरेक राज्यातल्या विवीध बँकांनी एमएसएमई मळाक सगल्यांत चड 4 हजार 505 कोटी रुपयांचें रीण वितरीत केलां. उपरांत कृशी मळा खातीर 766.73 कोटी, गृह रीण 166.35 कोटी, शिक्षण रीण 17.88 कोटी, अक्षय ऊर्जा मळा खातीर 2.92 कोटी जाल्यार हेर प्रकारचे 53.94 कोटी रुपयांचें रीण वितरीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
