भांगरभूंय | प्रतिनिधी
बंगळुरू, खबरां संस्था: भारतीय अंतराळ संशोधन संस्थेचे (इस्रो) अध्यक्ष व्ही. नारायणन हांणी आयतारा सांगलें, केंद्र सरकारान चांद्रयान-५ मोहिमेक मान्यताय दिल्या. इस्रो मुखेल पदाचीं सुत्रां स्विकारले उपरांत ते बंगळुरू एके कार्यावळींत उलयताले.
तांणी म्हणलें, फकत तीन दिसां पयलींच आमकां चांद्रयान-५ मोहिमेक मंजुरी मेळ्ळी. हातूंत जपान आमचो इश्ट आसतलो. चांद्रयान-३ मोहिमेंत २५ किलो वजनाचा रोव्हर (प्रज्ञान) आशिल्लो, जाल्यार चांद्रयान-५ मोहिमेंत चंद्राच्या पृश्टभागाचो अभ्यास करपा खातीर २५० किलो वजनाचो रोव्हर आसतलो.
फुडाराक प्रकल्पां विशीं नारायणन हांणी म्हणलें, २०२७त सुरू जावपी चांद्रयान-४ मोहिमेचो हेतू चंद्रावेले मातयेचे नमुने हाडप. गगनयाना सयत जायत्यो मोहिमो सोडून आंतरीक्षांत भारताचे स्वताचें आंतरीक्ष स्टेशन स्थापन करपाच्यो येवजण्यो सुरू आसात.
फुडारांतल्यो हेर येवजण्यो
३ आंतरीक्ष वीर आंतरीक्षांत वतले: २०२५त, ३ वांगड्यांचो एक क्रू गगनयान यानांतल्यान ३ दिसांचे मोहिमे खातीर धर्तरेच्या ४०० किमी वयले कक्षेंत धाडटले.
भारतीय अंतराळ स्टेशनाचें प्रक्षेपण
भारताच्या अंतराळ स्टेशनांत पाच मॉड्यूल आसतले. पयलें मॉड्यूल २०२८त लॉंच करतले. हाचे खातीरचें डिझायनाचें काम पुराय जालां आनी अहवाल सरकारा कडेन मंजुरी खातीर सादर केला. हें स्टेशन अंतराळांतलें घर आसतलें.
भारतीय अंतराळवीरांक चंद्रार धाडप
इस्रो २०४० मेरेन चंद्राचेर यान धाडपाचें काम करता. सध्या, अमेरिका हो एकूच असो देश जांणी मनशाक चंद्राचेर धाडलां. चीन २०३० मेरेन चंद्राचेर आपलें यान धाडपाचेरूय काम करता.
व्हीनस ऑर्बिटर मिशन
१,२३६ कोटी रुपया बजेट. ते मार्च २०२८ त लॉंच करपाचें नियोजन आसा. व्हीओएमचो मुळावो हेतू शुक्र ग्रहाच्या पृष्ठभागाची आनी वातावरणाची तशेंच सूर्याचो शुक्र ग्रहाच्या वातावरणाचेर जावपी परिणामाचो आपलो समज वाडोवप.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
