भांगरभूंय | प्रतिनिधी
मुख्यमंत्रीः संशोधना खातीर बेगिनूच जातली समितीची स्थापणूक
पणजी : कॅन्सर (कांक्र) दुयेंतींचेर तुळेन सवाय आनी परिणामकारक तरेन उपचार करपाचे सरकाराचे यत्न सुरूच आसा. अॅलोपथी आनी आयुर्वेदीक उपचार पद्दत एकठांय करून गोंयांत कॅन्सराचेर उपचार करपाचो प्रस्ताव आसा. हे विशीं संशोधन तशेंच एसओपी तयार करपा खातीर दोतोर तशेंच अधिकाऱ्यांची समिती स्थापन जातली अशी म्हायती गोपांनी दिली. आयुर्वेदीक आनी अॅलोपथी ह्या दोनूय उपचार पद्दतीचो वापर कॅन्सरा खातीर कशे तरेन जावं येता, हाचेर टाटा मेमोरियल हॉस्पिटला कडेन व्हिडियो कॉन्फरसिंग पद्दतीन बसका जाली, अशी म्हायती मुख्यमंत्री डॉ. प्रमोद सावंत हांणी दिली.
गोंयांत कॅन्सराचे दुयेंती वाडत आसात. ब्लड कॅन्सर, ब्रेस्ट कॅन्सर आनी हेर प्रकारच्या कॅन्सराचें प्रमाण राज्यांत वाडत आसा. कॅन्सराचेर उपचार करपा खातीर गोंय वैजकी म्हाविद्यालय हॉस्पिटला कुशीक स्वतंत्र कॅन्सर हॉस्पिटल उबारपाचें काम नेटान सुरू आसा. ते भायर लाँजीट्युडनल कोहोर्ट स्टडी उपक्रमा खाला कॅन्सराचें प्रमाण आनी कारणा विशीं संशोधनाची प्रक्रिया सुरू जाल्या.
अॅलोपथी आनी आयुर्वेदीक उपचार पद्दत एकठांय करून कॅन्सराचे परिणामकारक रितीन उपचार जावप शक्य आसा काय? हाचेर विचार करपा खातीर मुख्यमंत्री डॉ. प्रमोद सावंत हांणी टाटा मेमोरियल हॉस्पिटला कडेन (मुंबय) चर्चा केली. व्हिडियो कॉन्फरंसिंग बसकेंत गोंयचे अॅलोपथी आनी आयुर्वेदीक दोतोर हाजीर आशिल्ले. तशेच टाटा मेमोरियल हॉस्पिटलाचे डॉ. राजेश दीक्षित, डॉ. पंकज चतुर्वेदी आनी हेर दोतोर हाजीर आशिल्ले. गोंयचे डॉ. शेखर साळकार, आयुर्वेदीक संशोधन संस्थेच्यो (धारगळ) डॉ. सुजाता कदम, डॉ. मोहन जोशी, डॉ. स्नेहा भागवत आनी हेर दोतोर हाजीर आशिल्ले.
टाटा मेमोरियल हॉस्पिटलांत कॅन्सराचेर व्हड प्रमाणांत संशोधन सुरू आसा. ह्या संशोधनांत गोंयच्या दोतोरांक वाटेकार करून गोंयांक लाव जावचो हो हेत आसा, अशें डॉ. शेखर साळकार हांणी सांगलें. कॅन्सराचेर अॅलोपथी उपचार पद्दत सगल्याक सुरू आसा. कॅन्सराचेर आयुर्वेदीक उपचार लेगीत करतात. टाटा मेमोरियल हॉस्पिटलांत लेगीत उपचार करपी आयुर्वेदीक दोतोर आसा. योगासनाच्या आदारान कॅन्सर दुयेंतींक चड वर्स जगप शक्य जाता. तशेंच भलायकी लेगीत बरी उरता, असो अणभव आसा. कॅन्सराचेर आयुर्वेदीक उपचारा विशीं दुयेंतींचो अणभव आनी परिणामकारकताय, हाचे विशीं निश्कर्श ना. दुयेंतींचेर उपचार सुरू करून तांचो लाव कितले प्रमाणांत जाता? हाचे डॉक्युमेंटेशन जावपाक जाय. आयुर्वेदीक संशोधन संस्था (धारगळ), गोमंत आयुर्वेद म्हाविद्यालय (शिरोडें), भलायकी खातें आनी टाटा मेमोरियल हॉस्पिटल मेळून उपचारा विशीं एसओपी तयार जातली. अॅलोपथी परस ही उपचार पद्दत सवाय थारली जाल्यार तिचो वापर करपाक हरकत ना. बसकेंत आयुर्वेदीक तशेंच अॅलोपथी दोतोरांनी विचार मांडले. अॅलोपथी आनी आयुर्वेदीक पद्दत एकठांय करून उपचार करपा विशीं काम सुरू करपाचे निदेश मुख्यमंत्री डॉ. प्रमोद सावंत हांणी दिले.
कॅन्सराचेर फक्त अॅलोपथी वा आयुर्वेदीक उपचारां परस दोनूय उपचार पद्दत एकठांय करून ती उपकारी थारप शक्य आसा काय? हाचो अभ्यास जातलो. समिती उपचारा विशीं एसओपी तयार करतली.
मजगतीं, टाटा मेमोरियलाचे डॉ. पंकज चतुर्वेदी, डॉ. राजेश दीक्षित, गोंयचे डॉ. शेखर साळकार, आयुर्वेदीक संशोधन संस्थेच्यो डॉ. सुजाता कदम, डॉ. मोहन जोशी, डॉ. स्नेहा भागवत आनी हेर दोतोरांनी व्हीसीत विचार मांडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
