भांगरभूंय | प्रतिनिधी
फा टल्या एका लेखांत आमी समुपदेशन वर्गाची म्हायती घेतली, पूण हें शिकपाक आतां चलयांक चड आवडटा, अशें दिसून आयलां. एके बायलेक हाची चड गरज आसा. चलयां मुखार चले वा बायलां मुखार दादले चड मेकळेपणान उलयतात. हांगा पुलिसांचो अणभव दिवंक ना, हें मतींत दवरचें. अंधश्रद्धेचो प्रभाव जावं वा उणें शिक्षण बायलो दादल्यां कडल्यान रोखड्योच फटवतात. हाचें एक कारण म्हणल्यार मार्गदर्शनाचो उणाव. गोंयांत मंगळसूत्र झोपय मारून तोडून फुज्यो मारपाचे तशेंच डबल पयशे करता म्हूण फटोवपाचे जायते प्रकार घडल्यात. ह्यो चडश्यो घडणुको बायलांचे बाबतींत घडटात. पूण बायलोच न्हय, तर दादलेय फटवतात. कारण आमी जागृत आसनात. आमकां कोण मार्गदर्शन करीनात. आमी पेपर वाचीनात. टिव्ही, सोशल मिडिया वयल्यो बातम्यो वाचिनात. आमचें कोण समुपदेशनूय करीनात.
आयज समुपदेशनाची, मार्गदर्शनाची गरज सगल्यांकूच लागता. शिकिल्ले आनी अशिक्षितांकूय. सरकारान शाळांनी समुपदेशक नेमून बरें काम केलां. विद्यार्थी आयज कसल्याक कारणाक लागून आत्महत्या करपाक लागल्यात. तेच कित्याक समाजांतले हेर लोकूय हेंच करपाक शकतात. ताका लागून तणावा खाला आशिल्ल्या मनशान कोणा कडेन तरी मन उक्तें करपाक जाय. पूण कोणा कडेन करतले. समुपदेशनाचो सादो अर्थ म्हणल्यार मन उक्तें करपाचो सुरक्षीत जागो. तांकां मनाचे दोतोर म्हूण येता. शाळांनी समुपदेशक नेमपाचें कारण वेगळें आशिल्लें. पूण आतां म्हाका दिसता प्रत्येकाक समुपदेशकाची गरज पडूं येता. एक म्हणल्यार विभक्त कुटुंब पद्दत. घरांत काका, काकी, आजो, आजी, आतें आसताच अशें ना. तातूंत मोबायल फोनाचो वापर हिस्पा भायर वाडला. हाका लागून एकामेकां कडेन उलोवपाचे, भायर खंय गजाली मारपाचे प्रकार उणे जाल्यात. खरें तर एखादी वस्तू कितली वापरपाची हाका नेम आसता, पूण आमची मानसिकताय अशी आसा, की जो मेरेन वायट परिणाम जायनात तो मेरेन आमी ती वापरतात. मर्यादीत, नियंत्रीत पद्दतीन कितें वापरप हाची हालींच्या भुरग्यांक संवयूच ना, अशें म्हणल्यार कोणाक वायट दिसचें न्हय.
समुपदेशकूय हेंच सांगतात. तांकां शाळांनी टिचर म्हूण उलो मारतात. आमी आमकां ताण कित्याक आयला, तें तांचे मुखार मांडपाक जाय. गुपचूप रावन सोंसल्यार ताचे वायट परिणाम आमचेरुच जातले. संयुक्त कुटुंबां आशिल्लीं तेन्ना कोणा लागीं तरी मनांतलें उलोवपाची संद मेळटाली. दुसरे वटेन समुपदेशक नेमल्यार समाजांतल्या कांय लोकांक तें आवडना. चडशा विद्यार्थ्यांचो प्रस्न आसता तो मोगाचो, नाजाल्यार घरच्या अडचणींचो. हें ते समुपदेशकाक सांगतात. तो हाचेर उपाय लेगीत सांगता. विद्यार्थ्याचें नांव सांगिनासतना शिक्षकाक सांगता. उपाय किते करचो तें सांगता.
वाड्या वयल्या लग्न जाल्ल्या तरणाट्यांच्यो समस्या वेगळ्यो आसतात. ख्रिश्चन समाजांत तांचो धर्मगुरू लग्न जावचे पयलीं दोगांयकूय लग्नाचे म्हत्व सांगता. आपणें कशें वागचें ताचीय म्हायती दिता. लग्न म्हणल्यार तडजोड आसता. समुपदेश मळाचेर आर्टस, काॅमर्स फांट्याचीं भुरगीं चड प्रभावी आसतात. तांकां शिकपाची चड संद आसता. तांचें अतिरिक्त वाचन आसता. अर्थात विज्ञान फांट्याचे विद्यार्थीय समुपदेशक जावंक शकतात.
समुपदेशन करतना खूब कसरती करच्यो पडटात. जो सल्लो घेवपाक येता, ताची मानसीक भलायकी इबाडची ना, हें पळोवचें पडटा. हें व्हडलें आव्हान. समुपदेशकाक चड आयकुचें पडटा. ताचे कडेन सोंशिकसाण आसपाक जाय. रोखडोच तिडकपी व्यक्ती थंय उपकारना. सगल्यांत म्हत्वाचें, आपल्यो ज्यो गजाली विद्यार्थी वा हेर कोणा कडल्यान कळ्ळ्यात, त्यो गुपीत दवरपाक जाय. मानसशास्त्र हो विशय समुपदेशक जावपाक गरजेचो. आर्टसाचे विद्यार्थीय तो घेवपाक शकतात. समुपदेशक जावप्यांनी संवाद कुशळटाय विकसीत करपाक जाय. मुखामळ हांसरें जाय. ह्या फांट्यांत नोकरेची संद आसा. सरकारी आनी खाजगी नोकरीय मेळूं शकता.
मात सगल्यांत म्हत्वाची गजाल म्हणल्यार तुमकां हातूंत आवज आसा जाल्यार पळयता. फक्त पगारा खातीर ह्या मळाचेर येवं नाकात. तुमकां मानसशास्त्राचो भरपूर अभ्यास करचो पडटलो. म्हणटकच तुमकां मना विशीं कसो विचार करचो ते कळटलें. पयलीं तुमकां एमए पास जावचें पडटलें. आतां सावनूच समाजसेवा करपी संस्थेच्या वावराक जोडून घेयात. हाचो अणभव आसप गरजेचें.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
