भांगरभूंय | प्रतिनिधी
यांत शालेय शिक्षणाची सुरवात 17 व्या शेंकड्यांत पुर्तुगेजांनी केली. अर्थांत तें धर्मीक आशिल्लें. 1801 त पानेलीच्या लश्करी हाॅस्पिटलांत वखदां आनी शस्त्रक्रियेचो अभ्यासक्रम सुरू जालो. 1842 वर्सा वैजकी इश्काॅल सुरू जालें. (मागीर 1963 त ताचें नांव बदलून गोंय वैजकी महाविद्यालय केलें.) भारतांतलीच न्हय, तर अशी गिरेस्त शिक्षणीक फाटभूंय आशिल्ल्या. गोंयांतलें विद्यापीठ मात दिसान दीस शिक्षणीक नदरेन फाटीं पडत आशिल्ल्याचें दिसता. ताचो देशांतलो क्रमांक शंबरीक तेंकपाक पावला. पयल्या क्रमांकाचेर बंगळुरूंतलें इंडियन इन्स्टिट्यूट आॅफ सायन्स, दुसरें दिल्लींतलें जवाहरलाल नेहरू विद्यापीठ (जेएनयू) आनी तिसऱ्या क्रमांकाचेर वाराणसींतलें बनारस हिंदू विद्यापीठ आसा. गोवा विद्यापीठ 1 जून 1985 सावन सुरू जाले. सध्या नॅक मानांकन B++ आसा. तेंय मेळोवपाक खटपट करची पडटा. दोन दिसां पयलीं गोवा विद्यापीठ एका वेगळ्या कारणाक लागून गाजता. कालूच सात जाणांनी आगशी पुलिशेंत विद्यापीठा आड कागाळ केल्या. तातूंत फिजिक्स विभागाच्या प्राध्यापकान एके चलयेक चड गूण मेळोवन दिवपाक बेकायदेशीर मार्ग आपणायल्यात, असो आरोप केला. खबर आसूनय विद्यापिठान कांयच कारवाय करूंक ना, अशेंय तांचें म्हणणें. तेन्ना ह्या प्रकरणाची चवकशी करून दोशींक आनी तांकां राखण दिवप्यांचेर कारवाय करची, अशी मागणी तांणी दिल्या. पत्रकारांक हाची म्हायती दिवपी तांचो व्हिडियोय व्हायरल जाला.
ह्या जागृत नागरिकांच्या दाव्या प्रमाण, हें प्रकरण पोरुंचें. एका प्राध्यापकान आपली इश्टीण आशिल्ले विद्यार्थिनीक मजत करपाक चावयो मेळोवन फिजिक्स विभागांतल्या प्राध्यापकांचीं कपाटां उक्तीं केलीं. प्रस्नपत्रिका मेळयल्यो. ती विद्यार्थीनी बऱ्या गुणांनी पास जाली. हेर प्राध्यापकांक अजाप दिसलें. दुसरे परिक्षेंत ती नापास जाली तेन्ना हें अजाप दुबावांत बदल्लें. चवकशी सुरू जाली, प्रकरण वयर मेरेन गेलें. पूण मुखार कायं जालें ना. घडये विद्यापिठाचें नांव बदनाम जायत हो भंय आसतलो.
हो प्राध्यापक प्रस्नपत्रिका फारायतना कोणेच पळोवंक ना कशें? चावी केल्लीं दुसऱ्यांचीं कपाटां उक्तीं करून भितरलें कितेंय घेवन वचप, हो गुन्यांव. प्राध्यापकान तें आपूण जावन केलां, काय ते विद्यार्थिनीन बी ताका तें करपाक सांगलां? हाची चवकशी जावन दोगांयचेर कारवाय जावपाक नाका? पुलीस कागाळे प्रमाण हो फिजिक्स विभाग. बरें हो प्राध्यापक एकलोच ना. ताका ह्या कामांत एका राजकी फुडाऱ्यान मजत केल्या खंय. ह्या फुडाऱ्यान हाचे आदींय एका दोतोराक हाता कडेन धरून असोच प्रकार केला, असो आरोप त्या जागृत नागरिकांनी केला. त्या फुडाऱ्याचेरुय कारवाय जावंक नाका? विद्यापीठ आयज सोमारा सांज मेरेन पुलीस कागाळ करीना जाल्यार उच्च न्यायालयांत वतले अशें ते नागरीक म्हणटात. ह्या प्रकरणाची खोलायेन चवकशी जावपाची गरज आसा, कारण हातूंत गोवा विद्यापिठाचें नांव बदनाम जालां.
तशें हाचे पयलींय तें वादग्रस्त थारलां. नोकरे खातीर बोगस शिक्षणीक प्रमाणपत्रां दिवपाचो प्रकार, नोकरेची भानगड, अभ्यासक्रमाक प्रवेश दिवपाक पार्सिलीटी अशीं जायतीं प्रकरणां गाजल्यांत. शिक्षणिक प्रमाणपत्रां हायस्कूलां, काॅलेजींतल्यान घेतलीं तरी निमणें आप, पाप विद्यापिठाच्या माथ्यार! नोकरे खातीर बोगस प्रमाणपत्रां प्रकरणांत कांय जाणांक अटक जाल्ली. उपरांत कितें जालें त्या प्रकरणाचें? थारावीक लोकांक विद्यापिठांत नोकरी मेळटा, मेरिट लिस्ट कुशीक दवरतात अशेय आरोप जाल्यात. कोंकणीची, राबित्याची अट सदळ केल्ल्यान फाटीं निदर्शनांय जाल्लीं. प्रवेश परिक्षे वयल्यान बोवाळ जाल्लो. परिक्षा रजिस्ट्रारान राजिनामोय दिल्लो. अर्थांत कितें चुकीचें जाल्यार वा कांयच चुकूंक नासतना पसून आरोप जातात, उपरांत ते सिद्ध जाताच अशें ना. कोण ताची फाटपुरवण करताच अशेंय ना. म्हणटकच हें प्रकरण आतां ते सात नागरिक लावन धरतात काय कोण तांचेर चेपण हाडून तांकां तें सोडपाक लायता, तें पळोवचें पडटलें. ह्या प्रकरणाचो आमचे कडेन कांयच पुरावो ना, फक्त दुबाव आसा, अशें प्राध्यापकांचें खंय मत. तरीय तांणी कागाळ करपाक जाय आशिल्ली. फुडलो कितें तो तपास पुलीस करपाचे. सगलें खबर आसूनय ओगी रावप होवूय गुन्यांवूच जालो ना?
बऱ्याच वर्सां फाटीं एका शिक्षणमंत्र्यान आपले भाचयेचे धावेचे परिक्षेचे गुण वाडयिल्ले. तेन्ना तें ‘मार्क स्कॅण्डल’ खूब गाजिल्लें. उपरांत शिक्षण मळाचेर तशीं व्हडलीं प्रकरणां गाजूंक नात वा घडये तीं उजवाडाक येवंक नात आसतलीं. मात आतां हें प्रकरण बऱ्याच म्हयन्यां उपरांत वयर सरलां. तें बावता काय कोण तें चिड्डून, माड्डून ना करता तें दिसतलेंच. गोवा विद्यापिठाच्या जाळवणदारांचेर आतां व्हडली जापसालदारकी आयल्या. तांणी कायद्याच्या मार्गान वचून हें प्रकरण तडीक लावचें. अर्थांत मुखार, सगलें कितें साक्षी, पुराव्यांचेर अवलंबून आसतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
