भांगरभूंय | प्रतिनिधी
मंत्रीमंडळ बसकेंत नव्या उद्देग धोरणाक मंजुरी
भांगरभूंय I प्रतिनिधी
पणजी : बुधवारा जाल्ले राज्य मंत्रीमंडळ बसकेंत मंजुरी मेळिल्ल्या नव्या उद्देग धोरणा प्रमाण सरकारी सुविधा मेळपी उद्देगांक 60 टक्के नोकऱ्यां खातीर थळाव्यांचो विचार करचो पडटलो. तशेंच एक जनेल पद्दती प्रमाण एका म्हयन्यांत उद्देगांक परवाने दितले, अशें उद्देग मंत्री मॉवीन गुदिन्हो हांणी मंत्रीमंडळ बसके उपरांत उलयतना स्पश्ट केले.
मंत्रीमंडळ बसकेंत उद्देगीक धोरणा सयत पत्रकार संरक्षण कायद्याची अंमलबजावणी आनी 18 कायदो दुरुस्ते सयत 35 प्रस्तावांक मान्यताय दिल्या. ते भायर 25 परस चड राज्य कायद्यांच्या 50 तजविजेंतल्या किरकोळ गुन्यांवांक दोशींतल्यान मुक्त करपाचो प्रस्ताव मंजूर केला.
मंत्रीमंडळान गोरवां सांबाळ, अबकारी, शिक्षण, कामगार ह्या खात्यांच्या दरेकी तीन, नगर नियोजन आनी पर्यटन खात्याच्या दरेकी चार, पालिका प्रशासनाच्या पांच, म्हायती आनी तंत्रज्ञान तशेंच भौशीक बांदकाम खात्याच्या दरेकी दोन, तशेंच महसूल खात्याच्या एका दुरुस्तेक मंजुरी दिल्या, अशी म्हायती मुख्यमंत्री डॉ. प्रमोद सावंत हांणी दिली.
मजगतीं, बसके उपरांत उलयतना उद्देग मंत्री गुदिन्हो हांणी म्हणलें, चडांत चड उद्देग गोंयांत हाडून उद्देगीक क्षेत्राक घटाय दिवपा खातीर सरकारान नवे उद्देग धोरण हाडलां. फुडल्या एका म्हयन्यांत नव्या धोरणाची अंमलबजावणी जातली. धोरणा प्रमाण ज्या उद्देगांक सरकारी सुविधा मेळटल्यो तांणी उण्यांत 60 टक्के नोकऱ्यो थळाव्यांक दिवच्यो, हे खातीरची तजवीज केल्या.
ते भायर थळाव्या तरणाट्यांक सूक्ष्म, लघू आनी मध्यम विभागांतल्या उद्देगांनी चडांत चड संद दिवपाचे सरकारान थारायला, अशें तांणी म्हणलें.
एससी, एसटी गुणेस्त विद्यार्थ्यांक फुकट लॅपटॉप
अनुसूचीत जाती (एससी) आनी अनुसूचीत जमातींतल्या (एसटी) गुणेस्त विद्यार्थ्यांक फुकट लॅपटॉप दिवपाक मंत्रीमंडळान मंजुरी दिली. ते भायर गोंय राज्य पत्रकार संरक्षण कायदो 2022क मान्यताय दिली. हो कायदो राज्यांत बेगिनूच लागू जातलो. सांगेंत आदिवासी संशोधन संस्था सुरू करपाकूय मंत्रीमंडळान मान्यताय दिली, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
