‘लाला’चो ‘आका’ कोण?

भांगरभूंय | प्रतिनिधी

बेकायदेशीर गजालींचो बुडकुलो घरधनयाचेरुच फोडप समा जावचें ना. थिये ‘लाला की बस्ती’क कोणाचो आशीर्वाद आसा?

रमझान आसूं वा रामनम, न्यायालयाच्या आदेशा प्रमाण ‘लाला की बस्ती’ मोडपाच्या कामाक सुरवात जातली, असो पेजाद डायलाॅग नुस्तेमारी मंत्री नीळकंठ हळर्णकार हांणी काल मारलो. न्यायालयान हे वस्तींतली बेकायदेशीर घरां मातये भरवण करपाचो आदेश दिल्लो. तो चालीक लागतलो काय ना, तें रोखडेंच कळटलें. पळोवंक गेल्यार असल्यो बस्ती फक्त थियेच न्हय, तर दरेका गांवांत उब्यो जाल्यात. कांय कडेन शेतां आडावन उद्देग, वेवसाय चलतात. हाचें भाडें संबंदीत शेतकार, कोमुनिदाद वा भाटकार घेता आसतलोच. थोडे कडेन मात बेकायदेशीर अतिक्रमणां जाल्यांत…. आनी तीं चडशें कोमुनिदादींच्या जमनींचेर जाल्यांत, हें मान्य करचेंच पडटलें.
लालाचो हो वाडो थिये मेजर बेकरेच्या फाटले वटेन आसा. एका काळार थंय एकूच घर आसलें खंय. उपरांत एकेक करून थंय घरां वाडत गेलीं. ‘लाला की बस्ती’ अशें नांव कित्याक पडलें तें मात कळना. घडये पयलें घर जाणें बांदलें, ताचें नांव लाला आसतलें. थंय उणींच 100 घरां आसात. तातूंतलीं 25 बेकायदेशीर घरां मोडपाचे आसात. म्हणजे उरिल्लीं सगलीं कायदेशीर जालीं नात? ही बस्ती म्हणल्यार झोपडपट्टी न्हय, तर चिऱ्यांनी बांदिल्लीं घरां. ह्या वाठारांत येतकच गोंयां भायल्या गांवांत आयिल्ले सारकें दिसता. घरांक लायट, उदक सगलें कितें कायदेशीर मार्गान मेळ्ळां. बरे गुळगुळीत रस्तेय आसात. कोमुनिदादीच्या जाग्यार उबी राविल्ली ही पुराय बस्तीच बेकायदेशीर असो बोवाळ कांय वर्सां पयलीं चलतालो. मात, आतां तातूंतलीं फक्त 25 घरांच बेकायदेशीर हें सिद्ध जालां. म्हणजे बाकीच्यांक भिवपाची गरज ना.
बस्ती मोडपाचो आदेश 2010 त भायर सरिल्लो. ताका सर्वोच्च न्यायालयांत आव्हान दिल्लें. पूण याचिका थंयूय भायर पडिल्ल्यान आतां कारवाय करचीच पडली. थियेची कोमुनिदाद हे बस्ती आड सगल्यांत पयलीं न्यायालयांत गेल्ली. आतां हो बेकायदेशीर घरां मोडपाचो आदेश कोमुनिदाद प्रशासकाक चालीक लावचो पडटलो. संबंदीत घरांक एक म्हयन्या पयलीं घरां मोडपाची नोटीस दिल्ली. म्हणटकच आतां खंयच्याय खिणाक घरां मोडपाचें काम सुरू जावं येता. मंत्री हळर्णकार हांणी रमझान आसूं वा रामनम अशें म्हणलांच.
राज्यांत 223 कोमुनिदादी आसात. तांच्यो जमनी बऱ्याच लोकांनी, संस्थांनी लाटल्यात. कांय स्वता कोमुनिदादींच्या जाळवणदारांनी विकल्यात. कांय कडेन भायल्या लोकांनी लोकप्रतिनिधींच्या आशिर्वादान अतिक्रमण केलां. ज्या कामा खातीर जमीन दिल्या, त्याच कामा खातीर तिचो वापर करप बंधनकारक करपाचो निर्णय फाटीं सरकारान घेतिल्लो. शिक्षणीक संस्था, उद्देग, सरकारी प्रकल्पांक कोमुनिदादी जमीन थारावीक कामा खातीर दितात. पूण कांय वेळार ताचो वापर भलत्याच कामा खातीर जाता. तशें दिसल्यार सरकारी यंत्रणांक, स्वराज्य संस्थांक तांकां ना हरकत दाखलो दिवपाक मेळचोना, अशेंय थारिल्लें. मात ह्या कोमुनिदाद कोडाचे दुरुस्तीक खुद्द कोमुनिदादींचो विरोध आसा. कायदो दुरुस्त करचे पयलीं आमकां विस्वासांत घेवचें, अशेंय फाटीं तांणी म्हणिल्लें. बेकायदेशीर कामां जावपाक जायनात, जाल्यार तांकां दंड जावंक जाय वा ती मोडपाक जाय. पूण तरीय एक प्रस्न उरताच, राज्यांत बेकायदेशीर कामां जातात, ताका पुरायपणान तीं करपीच जापसालदार आसतात? हाचोय नियाळ घेवप गरजेचें. आप- पाप एकल्याच्याच माथ्यार, अशें म्हणपाक मेळचें ना.
कोमुनिदादींच्यो जमनी विकल्यो कोणे? त्या वेळार जमनीचो बाजारभाव कितें आशिल्लो? जमीन विक्रेचो कोमुनिदादीक कितलो फायदो जालो? फाटल्या 35 वर्सांच्या काळांत ह्या जमनींचेर कितले प्रकल्प उबे जाल्यात? कितले मिटर जमनींचेर अतिक्रमण जालां? रातयां उबी जाल्ले बस्तींक, झोपडपट्टेंक लायट, उदकाचें कनेक्शन कोणें दिलें? सगली चवकशी जावंक जाय. बेकायदेशीर गजालींचो बुडकुलो घरधनयाचेरुच फोडप समा जावचें ना. थियेचे लाला की बस्तीक कोणाचो आशीर्वाद आसा? ‘अर्जुना’ क जसो किराचो दोळोच दिसतालो, तशीं हांगां कोणाक मतांच बीं दिसनात मूं? गोंयच्या कांय वाठारांनी बेकायदेशीर बांदकामां कायदेशीर करतात, तशेंच हांगाय जातलें, अशें कोणाक दिशिल्लें काय? ताका लागून भायल्यान आयिल्ल्या लोकांक घर वाटावतलें, अशें बी दिसतालें काय? ल्हानशें घर बांदपाक उणेंच 20 लाख रुपया तरी जाय. म्हणटकच बेकायदेशीर घर बांदपाचें धाडस घरधनयान कोणाच्या जिवाचेर केलें? सरकारी यंत्रणेन हाचीय चवकशी करपाक नाका?
गोंयचो आंवाठ 3,702 चौखण किलोमिटर. तातूंतली 1,424.46 चौखण किलोमिटर जमीन रानां वाठाराची. म्हणल्यार राज्याचे 33.08 टक्के. हातूंत 200 चौखण किलोमिटर खाजगी रानां वाठार. उरिल्ल्या रानाचो धनी सरकार. म्हणटकच जमीन उरल्या तरी कितली? आतां दोंगर बोडकावप चालू आसा. ह्या बेकायदेशीर गजालींचेर कारवाय जातली? कारण जळींमळीं पातळिल्ल्या ‘आकां’ क बुद्द शिकोवप म्हत्वाचें.