भांगरभूंय | प्रतिनिधी
पणजी : जादूटोण्या सारकिल्ल्यो गजाली आडावपाक आनी घाडी, मांत्रिकांक धाकांत दवरपाक राज्यांत अंधश्रद्धा निर्मुलन कायद्याची सामकी गरज आशिल्ल्याचें मत अंधश्रद्धा निर्मुलन चळवळीचे कार्यकर्ते रमेश गांवस हांणी उक्तायलें.
गोंयांक सुशिक्षीत, प्रगतीशील राज्य म्हणटात तरी अंधश्रद्धेच्यो जायत्यो घडणुको राज्यांत घडटात. घाडी वा मांत्रीक सामान्य जनतेक जादूटोण्या सारक्या प्रकारां कडेन आकर्शीत करून अंधश्रद्धा चालीक लायतात. अशे प्रकार फकत अंधश्रद्धा निर्मुलन कायद्या वरवींच आडावप शक्य आसा. हाका लागून बेगोबेग असो कायदो चालीक लावचो. हाका लागून जादूटोणा करून जनतेक लुटपी, तांच्या भावनां कडेन खेळपी मांत्रिकांक आडावप शक्य जातलें. राज्यांत सध्या अशे तरेचो कायदोच अस्तित्वांत नाशिल्ल्यान अंधश्रद्धांक पोसवण दिवप्यांचें फावलां आनी सामान्य जनता तांकां भुलपाक लागल्या, अशें गांवस हांणी सांगलें.
बिगर गोंयकारां वरवीं अंधश्रद्धेचे प्रकार
फाटल्या कांय वर्सां सावन राज्यांत बिगर गोंयकारांचो आंकडो नेटान वाडत आसा. हांतुंतले कांयजाण आपल्या वांगडा येतना आपापल्या राज्यांतले जादूटोण्या सारके प्रकार, रिती घेवन येतात आनी गोंयचे भावार्थी जनतेक तातूंत आडकावपाक सोदतात. हाका लागून हांगां अंधश्रद्धा वाडल्या, हातुंतल्यान विचित्र प्रकारूय घडटात. अशे प्रकार बेगोबेग आडावपाक अंधश्रद्धा निर्मुलन कायद्याची गरज आशिल्ल्याचें रमेश गांवस हांणी म्हणलें.
प्रसाद घेवपूय अंधश्रद्धाच!
राज्यांतले बरेच लोक अंधश्रद्धेंत आडकल्यात. लग्न, भुरगीं जावपा खातीर, त्रासांतल्यान भायर सरपाक आजूनय खुबशे जाण देवळांनी वचून प्रसाद (कौल) घेतात. लग्न जावपा खातीर बरो दीस, बरो वेळ थारावपा खातीर तो घेतात, ह्यो सगल्यो अंधश्रद्धेच्योच गजाली अशें म्हाका दिसता. लग्नाचो दीस आनी वेळ थारावपी मनशाक सरकारी नोकरी मेळ्ळे उपरांत कामाक वचूं काय ती नोकरी सोडूं हें थारावपाक प्रसाद कित्याक घेना, असो प्रस्नूच गांवस हांणी केलो.
दिवचले एक गजाल घडिल्ली
कांय वर्सां आदी दिवचले एका घाडया कडल्यान अंधश्रद्धेचो भिरांकूळ प्रकार घडिल्लो. एके बायलेक भूतबाधा जाली म्हणून ह्या घाडया कडेन हाडिल्ली. ताणें तिचेवेलें भूत देवोवपा खातीर तिका बरीच बडयली. हातूंत तिका मरण आयिल्लें. मात हें प्रकरण उपरांत मिटयलें. संबंदीत घाडयान घाडीपण करप मात सोडलें, अशी एक यादूय रमेश गांवस हांणी सांगली.
सोरोप चाबल्यार मांत्रिकाचो वापर
राज्यांतल्या जायत्या भागांनी आयजूय सोरोप चाबले उपरांत संबंदीत व्यक्तीक देवळांत दवरतात, तिर्थ पिवयतात, मांत्रिका कडेन व्हरतात. मात, ताका चाबिल्लो सोरोप विखारी आसल्यार ह्या सगल्याचो कांयच परिणाम जायना. अशा वेळार संबंदीत व्यक्तीक हॉस्पिटलांत व्हरून बेगोबेग उपाय करपूच योग्य आसता. मात, कांय नागरिकांचे मानगुटीर बशिल्लें अंधश्रद्धेचें भूत अजूनय कायम आशिल्ल्यानूच अशे प्रकार घडत आसात, अशी खंतूय गांवस हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
