भांगरभूंय | प्रतिनिधी
म हाराष्ट्रांत 1848 वर्सा पयली चलयांची शाळा ज्योतिबा फुले आनी सावित्रीबाई फुले हांणी पुण्यांत सुरू केली. ते गजालीक आतां सुमार 175 वर्सां जावन गेलीं. महाराष्ट्रांतली पयली बायल दोतोर म्हूण जांचो उल्लेख करतात त्या दोतोर आनंदीबाई जोशी ह्यो विदेशांत शिक्षण घेवन पयल्यो बायल दोतोर जाल्यो. तांणी प्रतिकूल परिस्थितींत अमेरिकेंत शिक्षण घेतलें. ताकाय 137 वर्सां जावन गेलीं. आतां बायलां, शिक्षण, वेवस्थापन, वैजकी वेवसाय, येरादारी, लश्कर, अंतराळ अशा सगल्याच मळार बरी कामगिरी करतना दिसून येतात.
आयज अशेंय एकूय मळ ना की जंय बायलां काम करिनात. कृशी, अल्पबचत गट, कोंबयो पोसप, दूद वेवसाय, बोकडां पोसप अशा मळारूय बायलां व्हड आत्मविस्वासान काम करतना दिसून येतात आनी आपल्या कुटुंबाक हातभार लायतात. हाका राजकारण हें मळूय आडवाद ना.
ह्या देशाच्यो राष्ट्रपती जावपाचो मान प्रतिभा पाटील हांणी मेळयलो. सद्या राष्ट्रपतीपदार द्रौपदी मुर्मू आसात. मुख्यमंत्री म्हणून सुचेता कृपलानी, जयललिता, मायावती, आनंदीबेन पटेल, नंदिनी सत्पथी, सुषमा स्वराज्य बी हांणी आपली कारकीर्द गाजयल्या. सद्या ममता बॅनर्जी आनी रेखा गुप्ता हीं दोगांय बायलां मुख्यमंत्रीपदाचेर आसात. खूबशा राज्यांनी खूबशीं बायलां राज्यपाल म्हूण येसस्वी जाल्यात. देशाच्यो पयल्यो प्रधानमंत्री म्हणून इंदिरा गांधी हांणी खूबशीं वर्सां हें पद आत्मविस्वासान सांबाळ्ळें. लोकसभेच्यो अध्यक्षा म्हूण लेगीत मीरा कुमार आनी सुमित्रा महाजन हांणी बरी कामगिरी केल्या. संसदेंतूय खूबशीं बायलां आपली म्होर उमठायत आसात. अजून मेरेन भारताच्याे सरन्यायाधीश म्हूण खंयचेच बायलेची नेमणूक जाल्ली ना. पूण त्या पदार लेगीत फुडल्या कांय वर्सांत बायलमनीस येतली असो अदमास आसा. फेब्रुवारी 2027 वर्सा बी. व्ही नागार्थना ही पयली बायल सरन्यायाधीश जातली.
सुमार पांच-स दसकां पयलीं क्वचीत शिक्षण घेवपी बायलां
आयज दादल्यांचे बरोबरीन शिक्षण घेत आसात. एकूणच आयज सगल्याच मळार बायलांनी उदरगत केल्या. पूण अजून लेगीत खूबशीं आव्हानां कायम आसात.
बायल-दादलो जल्म दर
आयज 2016 प्रमाण बायल-दादलो जल्म दर 1000 दादल्यां फाटल्यान 944 बायलां आसात. केरळ आनी पाँडिचेरी हांगा तो सगल्यांत चड आसा. जाल्यार पंजाब आनी हरियाणा ह्या राज्यांनी तो सगल्यांत उणो आसा. दिसान दीस ह्या दारांत सुदारणा जायत आसा. सरकार लेगीत बायलांक शिक्षणांत सोयी, बेटी बचाव बेटी पढाव अशा मोहिमां वरवीं समाजांत जागृताय करीत आसा.
बायलांची सुरक्षीतताय
आयज देशांत निर्भया सारक्यो खूबशो घडणुको घडत आसात. हालींच पुण्यांत स्वारगेट स्टेशनार बलात्काराची एक घडणूक घडली. अश्यो घडणुको घडून आयले उपरांत ताचो न्याय लेगीत रोखडो मेळना. ह्यो घडणुको जावच्यो न्हय हे नदरेन सरकारान खूबशीं पावलां उबारल्यांत. बायलांचेर अत्याचार केल्यार खर ख्यास्त जावंक जाय. तांकां रोखडोच न्याय मेळपाची वेवस्था जावंक जाय. अशा खटल्यां खातीर स्वतंत्र न्यायालयां जाय. तशेंच जलद न्याय मेळपाची लेगीत वेवस्था जाय.
बालविवाह, हुंडो
आयजूय खूबशे कडेन बालविवाह तशेंच लग्नांत हुंडो दिवपाची वायट प्रथा आसा. हे प्रथे आड सरकारी पांवड्यार खर कायदे केल्यात. तरी लेगीत अश्यो घडणुको घडून येतना दिसून येतात. शिक्षणाचो प्रसार करून सरकार हे विशीं समाजांत जागृताय करीत आसा. समाजसेवी संस्थांनी लेगीत हातूंत सक्रीयपणान वांटो घेवन समाजांत जागृताय करची. एकूणच शिक्षणाचो प्रसार, बेटी बचाव आनी बेटी पढाव अशा मोहिमां वरवीं सरकारा कडल्यान समाजांत बायलांच्या शिक्षणा विशीं जागृताय करतात. आयज पालक चल्या बरोबरीन चलयांक लेगीत शिकयतात. ही समाधानाची गजाल. खूबशा मळार त्यो येसस्वी रितीन वाटचाल करीत आसात.
सरकारी नोकरेंत योग्य संद
आयजूय पुलीस वा हेर सरकारी नोकरेंत बायलांक योग्य ते प्रतिनिधित्व मेळचें, ते नदरेन योग्य ते बदल घडोवन हाडचे. तांकां नोकरेंत योग्य ती सुरक्षा मेळची.
शिक्षणांत प्रोत्साहन जाय
आयजूय खूबशे कडेन चलयांक शिक्षणांत व्हडलेशें स्थान दिनात. हातूंत ल्हवू ल्हवू बदल जायत चल्ल्यात. पूण पुराय देशाचो विचार करीत जाल्यार अजूनय बायलांक शिक्षणांतल्यान मुखार हाडपाची गरज आसा.
फाल्यां जावपी संवसारीक महिला दिसा निमतान बायलां अश्योच उदरगतीच्या मळार मुखार वच्च्यो हीच इत्सा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
