भांगरभूंय | प्रतिनिधी
म्हजें मत
एक तेंप आसलो. कोंकणी ही भास न्हय ती बोली अशें म्हणून कोंकणीक हिणसायताले. कोंकणी भाशेंत कितें आसा? अशें म्हणून तिका चाळयताले. कोंकणीक व्याकरण ना, प्रमाण ना अशें म्हणून कोंकणीचीं फकांडां मारताले, पूण आयज ती परिस्थिती ना. आयज कोंकणींत सगलें आसा. ती सगल्याक पावल्या. जे पालक आपल्या भुरग्यांक कोंकणी शाळेंत घालूंक अनमनताले ते लेगीत आपल्या भुरग्यांक कोंकणी शाळेंत प्रवेश मेळचो म्हणून धडपडूंक लागल्यात. सगल्यांक कोंकणीचें म्हत्व कळूंक लागलां. गोंयां भायले लोकूय कोंकणी शिकूंक लागल्यात. प्रशासनांत कोंकणीक चालना मेळची म्हणून गोंय सरकारानूय आपल्या कर्मचाऱ्यां खातीर देवनागरी टायपिंग प्रशिक्षण दिवप सुरू केलां. आयज कोंकणी ही स्वतंत्र भास जाल्या. तिका दुसरे भाशेची कुबडी घेवन चलपाची गरज ना. आयज कोंकणी कडेन उतरांचें भांडार आसा. कोंकणींत नवीं – नवीं उतरां भर घालीत आसात. कोंकणी ही मराठीची बोली न्हय, ती स्वतंत्र भास हें आयज कोणाक सांगपाची गरज ना. तरी आसतना हेर भाशांतलीं उतरां कोंकणी दिसचीं म्हणून तांचें उतर र्हस्व आसल्यार कोंकणींत दीर्घ करपाचो आनी तांचें दीर्घ आसल्यार र्हस्व करपाचो.
कोंकणी वेगळी दिसची म्हणून कोण मनशांचीं नांवां- आडनांवां बदलून उडयता, कोण सगलीं ‘महा’ उतरां कोंकणींत ‘म्हा’ करूंक सोदता, जाल्यार कोण आमी कोंकणी जशी उलयतात तशीच बरोवंक जाय म्हणून कोंकणीची शैलीच बदलता. हीं लक्षणां बऱ्याचीं न्हय. तीं कोंकणीचे उदरगतीक मारक. कोंकणी भाशेचीं अशे तरेचीं फकांडां करतल्या अश्या लोकांचेर आतांच आळो घालूंक जाय नाजाल्यार आमकां ‘एकलो एक सांगता, दुसरो भलतेंच सांगता’ अशें म्हणून नव्यानूच कोंकणी बरोवपी नवोदीत घुसपतले आनी त्यो कटकटीच नाकात म्हणून कोंकणी बदला मराठी बरोवंक सुरू करतले. तेन्ना आमी दोश कोणाक दितले?
– अंबरीश कृ. बोरकार
सांखळी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
