भांगरभूंय | प्रतिनिधी
मोहिमेंत केरळांतल्या कोलम ते गोंयां मेरेन सर्वेक्षण
मुरगांव: भारतीय मत्स्य सर्वेक्षणाच्या ‘खोल दर्यांतले नुस्तेंमारी’ मोहिमेन अरबी दर्यांत जायते उत्पादक, आयज मेरेन वापरूंक नाशिल्ले अशे नुस्तेमारी वाठारा सोदून काडल्यात. प्रधानमंत्री मत्स्य संपदा येवजणे वरवीं मेळिल्ल्या निधींतल्यान ही मोहीम राबयिल्ली. भारताच्या नुस्तेमारी उद्देगाचो विस्तार करपाक आनी फुडाराक अन्न सुरक्षा सुनिश्चीत करपाचे दिकेन हो सोद एक म्हत्वाचें पावल जावन आसा.
नुस्तें वेवसाय, पशुसंवर्धन आनी दुदाचो वेवसाय मंत्रालया खाला येवपी ‘भारतीय मत्स्य सर्वेक्षण’ ह्या देशांतल्या मुखेल मत्स्य संशोधन संस्थेन ट्रॉलरा वरवीं हें सर्वेक्षण केलें. ही बोट दर्यांत ३०० ते ५४० मिटर खोल दीस- रात काम करताली. हे मोहिमेंत केरळांतल्या कोलम ते गोंयां मेरेनच्या एका व्हड वाठाराचें सर्वेक्षण केलें.
भारताचे अस्तंत दर्यादेगे पसून सुमार १००- १२० नॉटिकल मैल अंतराचेर आशिल्ल्या ह्या सुवातांचेर १५०- ३०० किलो प्रती वयर ह्या सरासरी ‘कॅच पर युनिट एफर्ट’ इतले नुस्तें धरलें. चिंतपा सारकी गजाल म्हणल्यार, ह्या सर्वेक्षणांत दीस आनी रातचो केल्ल्या नुस्तेंमारींत सांपडिल्ल्या नुस्त्याचें प्रमाण वा नुस्त्याचे प्रजातींचे विविधतेंत कसलोच म्हत्वाचो असो फरक जाणवूंक ना. हो वाठार विवीध तरेचे वेवसायीक नदरेन मोलादीक क्रस्टेशियन्सान समृद्ध आशिल्ल्यान हातूंत हंपबॅक, नायलॉन सुंगटां, अरेबियन रेड सुंगटां, खोल समुद्रातील स्पाईनी सुंगटां, खोल उदकांतले कांट्याचे लॉबस्टर आनी खोल दर्यांतल्या स्क्वॅट लॉबस्टर हांचो आसपाव आसा. ह्या वाठारांत ओपिस्टोटोथिसस्प आनी ऑक्टोपोटेथिसिक्युला अश्यो सेफॅलोपॉडून बर्याच व्हड प्रमाणांत सांपडले.
ह्या नव्यानूच सांपडिल्ल्या वाठारान नुस्त्याच्या विवीध प्रजातींक सुवात दिल्या. फ्रॉगहेड ईल, रोझी कॉड, सॅकफिश, स्नेक मॅकरेल, रॉयल एस्कॉलर, मायक्टिओफिड्स, बँडफिश, डकबिल फ्लॅटहेड, स्प्लेंडिड अल्फोन्सिनो, शॅडो ड्रिफ्टफिश, स्पायनीजॉग्रीनआय, शॉर्टफिनिओस्कोप्लिड आनी स्टारगेझर्स ह्यो तांतल्यो मुखेल प्रजाती जावन आसात. सिकलेफिन चिमेरा, पिग्मी रिबनटेलकॅट शार्क, ब्रॅम्बल शार्क, इंडियन स्वेलशार्क आनी त्रावणकोर स्केट ह्या एलास्मोब्रँच वाठारांतलें नुस्तेंय हांगा व्हडा प्रमाणांत सांपडलां.
भारतीय मत्स्य सर्वेक्षणाच्या मुरगांव तळाचे विभागीय संचालक डॉ. एस. रामचंद्रन हांणी, दर्यादेग वेवसायाचेर वाडपी भराचे फाटभूंयेर ह्या सोदचें म्हत्व अधोरेखीत केलें. दर्यादेगेवेलो नुस्तें वेवसाय संसाधन मळार अती नुस्तेंमारी, अधिवासाचो र्हास आनी हवामान बदलाचो वाडपी ताण दिसून येता. देशांत नुस्तें वेवसाय तिगोवन दवरपा खातीर आनी जेवण सुरक्षा सुनिश्चीत करपा खातीर खोल दर्यांतलें संसाधन एक म्हत्वाचो पर्याय म्हणून मुखार सरता अशें तांणी म्हणलें.
भारतीय नुस्तें सर्वेक्षणाच्या समर्पीत शास्त्रज्ञांच्या पंगडान जातूंत डॉ. नशाद एम; शिवा ए; आशिक पी; वेंकटेश सरोज आनी मुखेल अभियंता जोसेफ इग्नेशियस हांचे सयत डॉ. एच. डी. प्रदीप; डॉ. एम. के. सिन्हा आनी राजू एस. नागपुरे ह्या गोंयच्या तळावेल्या पंगडान हे मोहिमेच्या येसांत म्हत्वाची भुमिका केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
