भांगरभूंय | प्रतिनिधी
नवी दिल्ली, खबरां संस्था: हवामान बदलाचो परिणाम बरोच नेटान वाडतूच आसा. हवामान खात्याच्या म्हणण्या प्रमाण, अंदूं वसंत ऋतू न्हय, सरळ गिमाळें सुरू जातलें. आयएमडीचे महासंचालक डॉ. मृत्युंजय महापात्रा हांणी, ‘फेब्रुवारीच्या निमाण्या सप्तकांत वा मार्चचे सुरवातेकूच गिमाळें जाणवपाक लागतलें.
हवामान विभागाच्या अंदाजा प्रमाण फेब्रुवारींत वायव्य, मध्य आनी पूर्व भारतांतल्या चडश्या भागांत सामान्या परस २०% उणो पावस पडटलो. पावस नाशिल्ल्यान हवेंत आर्द्रता उणी जातली आनी तापमान नेटान वाडटलो. अशे परिस्थितींत फेब्रुवारींत तापमान सामान्या परस चड उरपाची शक्यताय आसा. दक्षीणेंतल्या राज्यांनी तापमान पयलींच सामान्या परस चड आसा. फेब्रुवारींत हांगचो तापमान ३०-३२ अंश सेल्सियस असो आसता. ह्या वेळार तो ३३-३७ अंशां मेरेन पावलो. ७ फेब्रुवारीक केरळांतल्या पलक्कड हांगा रातचें तापमान २६.६ अंश आशिल्लें, जें सामान्य २०-२१ अंश आसता. हवामानशास्त्रज्ञांच्या मतान, ह्या बदलाचें मुखेल कारण ला-निना परिस्थिती आसा. फेब्रुवारींत तापमान वाडल्यार गंवाचे दाणे बारीकूच उरपाक शकतात, अशें मत तज्ञांचें आसा. हरभरे आनी सांसवाचीं पिकांय वेळा पयलींच पिकतलें. आपोल आनी लिचीच्या झाडांच्या चंवराक उणो वेळ लागतलो. हाका लागून फळा पिकपाचे प्रक्रियेचेर परिणाम दिसतलो.
दर्याचे अशांततेक लागून जमिनीवेल्या हवामानांत बदल
दयारच्या पृश्ठभागाचे परिस्थितीचो संवसारभरांतल्या हवामानाचेर परिणाम जाता. पॅसिफीक महासागरांतल्या पृश्ठभागाचे तापमान सामान्यां परस उणें जालां. हाका लागून जानेवारींत निनाची परिस्थिती हाल्ली. ह्या एप्रिल मेरेन तिगपाक शकता. मे म्हयन्या सावन इनसो न्यूट्रल परिस्थिती विकसीत जातली, जी सप्टेंबर मेरेन उरतली. ह्या काळांत, ला-निना वा एल निनो परिस्थिती उरची ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
