भांगरभूंय | प्रतिनिधी
मनीस खायनासतना कांय दीस रावपाक शकता. मात, उदका बगर रावप शक्य ना. उदकाक संस्कृतांत ‘जीवन’ म्हणटात, तें ओगीच न्हय. मनशाक, प्राण्यांक, सुकण्यांक…. सगल्यांकूच उदक जाय. गिमाचे दीस सोडल्यार तांकां तें सोंपेपणी मेळटा. मात, उदकाचे सांठे आटिल्ल्यान, इबाडिल्ल्यान 24 वरां उदक मेळप कठीण जालां. निदान, गोंयांत हेर राज्यांनी आसा तशी उदकाची टंचाय ना. हांगा उदका प्रकल्प आसात, त्या गांवांनी 24 वरां उदक मेळटा. हालींच्या वर्सांनी गोंयांतल्या कांय गांवांतले नळ सुके पडपाक लागल्यात. उंच इमारतींनी उदक चडना. मार्च लागलो काय लोकांची आरड सुरू जाता. थोडे कडेन टँकरांनीय उदका पुरवण करची पडटा. कालूच विधानसभेंत गोंयांत फुडलें वर्सभर तरी 24 वरां उदका पुरवण करप शक्य ना, अशें सरकारान जाहीर केलां.
गोंयांत सादारण 40 वर्सां पयलीं घराघरांनी नळ पावपाक सुरवात जाली. त्या वेळार भौशीक नळूय आशिल्ले. 24 वरां उदक. कपडे, आयदनां, न्हावपाक, गाडयो धुंवपाक चडशे लोक तेंच उदक वापरताले. 1990 च्या दसकांत हे नळ सरकारान बंद केले. तो मेरेन दरेका घरांत नळ पाविल्लो. नळाचें आगमन जातकच थळाव्या बांयांचो वापर उणो जालो. त्यो मातये भरवण जावन इमारती उब्यो जाल्यो. बांयतलें उदक ओडपाची संवयूय मोडली. आयज भोवतेक गोंयकार फक्त नळाचेर अवलंबून आसा. थोड्यांनी बांयों मारल्यात आनी पंप लावन उदक ओडटात. तांकां भरपूर उदक मेळटा. कांय जाण टँकराचेंय उदक विकत घेतात. मात, सरकारी उदकाचेंच कनेक्शन वापरपी लोकांचे (पर्वरकारांचे जाल्यात तशे) अदींमदीं हाल जातात. दोन दिसांनी एक फावट नळाचें उदक मेळपी कांय गांव आसात खंय. उदका पुरवण विभागान हाचेर बेगोबेग उपाय काडूंक फावो. वाडटे लोकसंख्येनूय उदका पुरवणेचेर हावळ हाडल्या.
2026 मेरेन दरेका घराक दिसाक उणें चार वरां उदक दिवपाचे यत्न सुरू आसात. मागीर उदकाची समस्या सुटावी जातली, अशें सराकारान सांगलां. चारूच वरां उदक म्हणटकच मडक्यो, बालद्यो, टबां, बल्लांनी उदक सांठोवन दवरचें पडलें. ल्हान फ्लॅटांनी जागो नासता. उदक केन्ना येतलें हे खातीर तेळीत बसचें पडलें. दनपरां वा मदल्या वेळांचेर तें आयल्यार भरतलो कोण? कारण आतां घोव- बायल दोगांय नोकरी करतात. सगल्यांक सकाळीं 6 ते 8, दनपरां 12 ते 2 आनी सांजवेळा 6 ते 8 मेरेन अशें स वरां तरी उदक मेळपाक जाय. तेंय पूर्ण प्रेशरान. कारण चार, पांच मजल्यांच्या घरांनी तें वयर चडूंक जाय. ही उदका पुरवण नेमान जावंक जाय. उदक येवचें ना जाल्यार दोन दीस पयलीं कळपाक जाय. जंय उदकाची समस्या आसा, त्या गांवांनी नागरिकांक पंप, उदकाची टांकी बसोवपाक अनुदान दिल्यार बरें. लायट नासता तेन्ना नळाचें उदक पंपा बगर वयर टांकये मेरेन पावतलें, हाची सुविधा जाय. हे खातीर पंचायतींनी फुडाकार घेवं येता. दरेका वाड्यार भौशीक बांय मारीत जाल्यार गांवकारांक बऱ्याक पडटलें. गांवातले व्हाळ, न्हंयो, तळयो, झरी नितळ करपाक जाय. थंय कोण कोयर करचो ना हाची जतनाय घेवंक जाय. गांवांतल्या उदका स्रोतांक नवें जिवन दिल्यार बरें. कारण गोंयांतल्यो भोवतेक न्हंयो बुरश्यो जाल्यात. कांय कडेन सिवरेज, गटारांची कनेक्शनां जोडल्यांत. कारखान्यांतलें रसायन पसून न्हंयांनी वता. त्यो उसपुपाक थारावीक वर्सांनी करोडांनी रुपया मोडटात. पूण ताचो फायदो थळावे कदेलकार सोडल्यार लोकांक जायना. आतां जूनांत पावस सुरू जातलो. चार म्हयने उरल्यात. दोंगरांचेर शास्त्रीय पद्दतीन चर मारून दवरल्यार पावसाच्या दिसांनी उदक जिरतलें आनी आशिकुशीच्यो बांयो, व्हाळ पावसा उपरांत सुकचे नात.
उदकाची चोरी जाता, ताचेरूय नियंत्रण जाय. कांय जाण टँकरांनी मेळटा थंयचें उदक उस्पितात. ताचो परिणाम गांवांतल्या उदका सांठ्याचेर जाला. फाटल्या कांय वर्सां सावन गोंयांत इमारती, निवासी प्रकल्प उबे जायत आसात. तांकां उदक खंयचें दितले, हाचो विचार पसून कोण करिनात. 25 फ्लॅटांची एक इमारत येवप म्हणल्यार सिवरेज, उदक, लायट, कोयर, येरादारीचेर ताण येवप, हें सांगपाक तज्ञ नाका. पोतयेंत थारावीक जिनसूय भरपाक मेळटात. गोंय आसा केदें आनी तातूंत भरतले कितलें? सध्याच तें भरून व्हांवपाक लागलां. तरीय आमी दोंगर बोडकावन, शेतां पुरोवन निवासी प्रकल्प उबारीत सुटल्यात.
सगल्यांत म्हत्वाचें म्हणल्यार उदकाची बचत. ती कोणे करपाची? तर समाजान. दरेकल्या कुटुंबान, आस्थापनान ही जतनाय घेतली जाल्यार उदकाची समस्या
अर्दी ना जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
