मगो पक्ष आनी उदयबाब

भांगरभूंय | प्रतिनिधी

सभाग्यांनो, तुमी इतले भिजूड आशिल्ले, तुमच्यांत इल्लीय हिम्मत नाशिल्ली की कांय बोटार मेजपा इतले अवचिन्न गोंय भारता पसून वेगळें करपाचे सपन पळयताले, तितल्याचेरूच थरथरून तुमी गोंय महाराष्ट्रांत विलीन करचें अशी मागणी करपाक लागले?

महाराष्ट्रवादी गोमंतक पक्षान (मगो) गोंयचें भरून ना येवपी इतलें लुकसाण केलां अशें आदले आमदार आनी ज्येश्ठ साहित्यीक उदय भेंब्रे हांणी आपली युट्यूब ‘जागोर’ हे कार्यावळींत सांगलें. तांणी म्हणलें, गोंय मुक्त जाले उपरांत आनी पक्ष स्थापन जातकूच तांचो गोंय महाराष्ट्रांत विलीन करपाचो यत्न तो मुखेल मुद्दो दवरप हे खातीर गोंयचीं चार वर्सां तांणी व्हगडायलीं. गोंयची उदरगत, हीत सांबाळपाचें आनी फुडार सुगूर करपाचें सोडून चार वर्सां सगलो पयसो विलिनीकरणाचेर खर्च केलो. कोंकणी भास आनी अस्मितायेचें तांणी लुकसाण केलें. कोंकणीक बोली भास, ती मराठीची बोली म्हूण हिणसायली. कोंकणीचे उदरगतीक विरोध केलो. कोंकणी शिक्षणांत येवपाक आनी मान्यताय दिवपाक विरोध केलो. गोंयचे अस्मितायेच्या मार्गांत कितल्योशोच आडखळी हाडल्यो. तांचे हे चुकीक लागून ताचो त्रास अजनूय आमी भोगतात.

उपरांत मगोचे आयचे उपाध्यक्ष नारायण सावंत आनी भांडारी अनंत नायक हांणी ह्या वक्तव्याचो निशेध केलो. म्हाका 76 वर्सां. हांवें तो काळ म्हज्या दोळ्यांनी पळयला. ते तुळेन, हे दोगूय तेन्नाचे सान भुरगे आसपाक जाय. वा तेन्ना ते जल्मूकच नाशिल्ले अशेंय बी आसूंक शकता! हांव तांकां वळखना. नाजाल्यार ते बेठेच निशेध करपाक जाय म्हूण निशेध करचे नाशिल्ले. तो निशेध तांणी कसो केलो हें तुमीच नियाळात.

तांणी म्हणलें. गोंयचे पयले मुख्यमंत्री भाऊसायब बांदोडकार हांणी जनमत कौलाच्या निकालाचें समर्थन केल्लें. जालें? चार वर्सां लुकसाण करतकूच निकालाचें समर्थन केल्ल्यान तीं चार चर्सां भरून आयलीं? म्हाका तरी तांच्या ह्या खुलाशाचो कांयच अदमास लागूंक ना. खरें सांगपाचें जाल्यार, त्या चार वर्सांत लुकसाण जालें, जावूं नाका तांकां कांयच पडून वचूंक ना.

फुडें ते म्हणटात, उदय भेंब्रे हांचे सारक्या कांय जाणांक भोवजन समाज वयर सरिल्लो नाका. कितें म्हूण काय कळना. पूण ह्या प्रकरणांत तांकां मदींच भोवजन समाज कित्याक हाडचो पडलो? ते आपले आपूण भोवजन समाजाक इतले उणाक कित्याक लेखतात? काय हांच्या असल्या भोवजन समाजांतल्या फ्राक मनशां पासत भोवजन समाज वयर सरना, सकयलूच उरता.

हांव हांकां आव्हान दितां की तांणी पुंडलीक नायक, प्रकाश वजरीकार, हांचीं नाटकां वाच्चीं. महाबळेश्वर सैल, देविदास कदम हांच्यो कादंबरी वाच्च्यो. जयंती नायक, प्रकाश पर्येंकार हांच्यो कथा वाच्च्यो. स. तानाजी हळर्णकार हांचे विचार नियाळचे. पूर्णानंद च्यारी, हनुमंत चोपडेंकार, राजय पवार हांचीं वक्तव्यां आयकुचीं. एन. शिवदास, स. भरत नायक, प्रशांत नायक हांच्या संघटण कुशळटायेचो अणभव घेवचो. तांकां कळून येतलें, भोवजन समाज कितलो ताकतवान आसा तो. हे सगले भाऊसायब बांदोडकार मुख्यमंत्री जाले म्हूण नांवारुपाक येवूंक नात. तांचे मदीं ती प्रतिभा आशिल्ली म्हणून ते मळबाक तेंकल्यात.

म्हगेलें माध्यमीक शिकप मडगांवच्या भाटीकार स्कुलांत जालें. तेन्ना भाटीकार स्कूल हें एक नांवाजतें स्कूल. तेन्ना दरेक वर्सा एसएससींत पास जाल्ल्या पयल्या पंदरा विद्यार्थ्यांचीं नांवां वर्तमानपत्रांत छापून येतालीं. ते वळेरेंत भाटीकार स्कुलाचे विद्यार्थी चुकनासतना आसतालेच! अशा ह्या स्कुलांत म्हजे वेळार फक्त रत्नाकर सर आनी बार्रेटो टिचर हीं दोगांच बामण आशिल्लीं. म्हजे क्लासींत तर पयलो नंबर जाचो येतालो तो भोवजन समाजांतलो भुरगो आशिल्लो.

दुसरें म्हणजे विलिनीकरण जे मागताले, तातूंत फक्त भोवजन समाजूच नाशिल्लो जाल्यार गोंयचे फामाद बामणांचे नायक घराबो, तळावलीकार घराबो, आंगले घराबो, करमली घराबो, कडकडे घराबो, पै रायकार घराबो, देशप्रभू घराबो, जोशी घराबो, वैद्य घराबो अशे कितलेशेच घराबे आशिल्ले. ते मगोचे वांगडी आशिल्ले. खुद्द उदयबाब हांचे बापूय मराठीवादी आनी विलिनीकरणवादी आशिल्ले. उरिल्ल्या बामण घराब्याचे बाबतींत अशें निखालस म्हणूंक मेळचें ना की ते सगले शंबर प्रतिशें विलिनीकरणाच्या आड आशिल्ले. तांच्यातले कांय जाण हेवटेन आशिल्ले जाल्यार कांय जाण तेवेटेन!

दयानंद बांदोडकार हांचे बाबतींत सांगपाचें जाल्यार तांकां केन्नाच बाकीबाब बोरकार, रवीन्द्र केळेकार चंद्रकांत केणी, उदय भेंब्रे हांचे लागीं गोंयच्या फुडारा बाबतींत उलोवचें अशें दिसलें ना. तांची नदर फक्त महाराष्ट्रांतल्या कर्मठ साहित्यिकांचेर नाजाल्यार वीख ओंपपी संपादकांचेर. असल्या एका संपादकाच्या नांवार पत्रकार संघटणेन पुरस्कार दवरला. तो पुरस्कार आमचे गोंयचे पत्रकार खोशयेन आपणायतात तें वर्तमानपत्राचेर वाचून खूब वायट दिसता. खूब कश्ट भोगतात.

ते म्हणटात, आमची संस्कृताय सांगता की आमी शिक्षण, अणभव आनी जाण्ट्यांचो मान राखपाक जाय. मराठी शिकून आमकां हें गिन्यान आयलां. 50 वर्सां उपरांत अचकीत तांकां जनमत कौलाची याद कशी येता? खंय नाक आनी खंय आदोळी! त्या दोगांयचें हें एकूच वाक्य आमकां जाणा जावपाक पुरो जाता की गोंयचें महाराष्ट्रांत विलिनीकरण जाल्लें जाल्यार आमची गोंयकारांची कसली दशा जातली आशिल्ली हें हांकां कळून आयलां पूण तें मान्य करपाक लज दिसता. खरेंच तुमची काकुळट करीन दिसता. आपली चूक मान्य करपाची तुमकां कापाझदाद ना.

ते दोगूय म्हणटात, गोंयचे कांय घटक गोंय हो भारताचो अविभाज्य भाग मानीनासले आनी गोंय भारता पसून वेगळें करपाची मागणी करताले. ह्या भंयान मगो पक्षान विलिनीकरणाक तेंको दिलो. शी शी शी सभाग्यांनो, तुमी इतले भिजूड आशिल्ले, तुमच्यांत इल्लीय हिम्मत नाशिल्ली की कांय बोटार मेजपा इतले अवचिन्न गोंय भारता पसून वेगळें करपाचे सपन पळयताले, तितल्याचेरूच थरथरून तुमी गोंय महाराष्ट्रांत विलीन करचें अशी मागणी करपाक लागले? गोंय भारता पसून वेगळें करपाची ते सपनां पळयताले म्हणचें तें कितें खरवत घेवन गोंय कापतले आशिल्ले? आनी इतले भिजूड आशिल्ले तुमी की आयच्या पदाधिकाऱ्यांनी त्या वेळच्या तुमच्या मगो पक्षाक तुमच्या सांगातान भिजूड थारायले? तुमी भाऊसायब बांदोडकाराचो अवमान केलो, हें तुमच्या लक्षांत तरी आयलां? होच तुमचो जाण्ट्यांचो मान राखप? 

अरविंद काकोडकार

2540097