म्हारगाय, बेकारीचेर संकल्प जाय

भांगरभूंय | प्रतिनिधी

अखेरेक केंद्रीय अर्थसंकल्प सादर जालो. तशें चडश्या लोकांचें लक्ष आयकर मर्यादा आनी कितें सवाय, कितें म्हारग हाचेरुच चड आसता. नव्या करप्रणाली प्रमाण आतां वर्साक 12 लाख रुपयां मेरेन उत्पन्न आशिल्ल्या नोकरदारांक आयकर भरचो पडचोना. (जर उत्पन्न 12 लाखां परस एक रुपया पसून चड जाल्यार 61,500 रुपया आयकर भरचो पडटलो. नोकरदारांक मात 75 हजार चड जाल्यार सूट मेळटली.) आयकर भरपी चडश्या नोकरदारां वयलें कराचें वजें उणें जाल्लें आसलें तरी चड गरज आसा, ती म्हारगाय उणी जावपाची. बेरोजगारीय कमी जावपाची. सगल्यांक बऱ्या पगाराच्यो नोकऱ्यो मेळ्ळ्यो जाल्यार तांकां म्हारगायेचो हुलोप तितलोसो बसचो ना. मात, बेरोजगारी आसा तशी आसा. लाखांनी तरणाटे उण्या पगाराचेर काम करतात. म्हारगाये विशीं उतरूय नाका. कारण ती सतत वाडतूच आसा. अर्थांत खावपा- पिवपाक, सण, सुवाळे मनोवपाक उदका सारको पयसो मोडपी बऱ्याचश्या मध्यमवर्गीयांक हालीं तेंपार म्हारगाय तितलीशी बादना जाल्या. मात, म्हारगायेक लागून उरिल्ल्यांच्या जिविताच्या व्हड्यांक बुराक पडल्यात ताचें कितें? साबार सवलती दिवपा परस, वेंचणुकां वेळार रेवड्यो वांटपा परस म्हारगाय आनी बेरोजगारीचेर सत्ताधिशांनी चड भर दिल्यार देशाचें कल्याण जातलें.
अर्थीक जाणकारांच्या मतान, जोडिल्ली जोड कराच्या रुपांत सरकाराचे तिजोरेंत वता जाल्यार नोकरदार वा हेर वेवसायिकूय घाम गळोवप उणें करतात. सगलेंच जर सरकार घेता जाल्यार आमी चड जोडपाक त्रास कित्याक घेवया? हो हाचे फाटलो तर्क. ताका लागून सामान्य मनशां वयलो कर उणो केल्यार ते उमेदीन चड जोडटात आनी आयकरा वांगडा हेर करूय चड मेळटात. मागीर ते दुसऱ्या मार्गान येवं. अमेरिकेचे अर्थतज्ञ आर्थूर लाफर हांणी बऱ्याच वर्सां पयलीं असोच एक सिद्धांत मांडिल्लो. चड कर लायलो म्हूण तिजोरेंत येवपी येणावळ वाडना, तर ती उणी जाता खंय. तांच्या मतान चडांत चड लोकांक सोंपेपणी खर्च करपाक मेळपाक जाय. अमेरिका आनी भारतांत खर्च करपाची कुवत, येणावळ, उत्पन्न हांचे मदीं जमीन- आसमानाचो फरक आसा. तरीय हांगा म्हारगाय उणी जाली, रिणां वयलें व्याज देंवलें, मेळटा थंय कापतात ते कर ना केले जाल्यार खर्च करपी लोक वाडटले. हेर राज्यां परस गोंय अर्थीक नदरेन बरें आशिल्ल्यान आनी एकामेकां वांगडा सर्त करपाचें लोकांक पिशें आशिल्ल्यान ते खर्च करपाक भियेनात. पूण, हेर राज्यांनी म्हारगाय, उण्या पगाराक लागून खर्चाक व्हडली कातर लावपी लाखांनी कुटुंबां आसात.
इव्ही गाडयो सवाय जावं येतात. इव्ही बॅटरी उत्पादनांक सवलत जाहीर जाल्या. ह्या गाडयांचेर सरकार अनुदान दिता. पूण त्यो सवाय जातल्यो, तितलो सरकाराकूच इंधनाचेर फायदो जातलो. झुजा पांवड्याचेर चार्जींग स्टेशनांय चालू करपाक जाय. फक्त घोशणा करून उपकारचेंना. गोंयांत कदंब म्हामंडळान सगल्योच इव्ही बसी सुरू करपाचें थारायलां. ह्या गाडयांची बॅटरी पुराय चार्ज करतकच मेळटा ती मायलेज वाडली जाल्यार लोक तिचे कडेन आनीक आकर्शित जातले. बायलांक आनी अनुसुचीत जाती, जमातींतल्या उद्देजकां खातीर खाशेली येवजण सुरू जातली. तांकां सवाय भितर रीण मेळटलें. पयलेच फावट उद्देग करप्यांक पांच वर्सांत दोन कोटी रुपयांचें रीण मेळटलें. मात, संबंदीत उद्देजकांक साधन, सुविधा सोंपेपणी मेळपाक जाय. म्हत्वाचें म्हणल्यार बाजारपेठ सहज मेळची. उद्देग मळाचेर फक्त सवलती, अनुदानांचो लाव घेवपा खातीर वावुरप्यांचेर नियंत्रण दवरचें पडटलें. कारण थारावीक काळा उपरांत थोडे उद्देग बंद पडटात. पूण तेच धनी दुसऱ्या राज्यांत वचून तसलोच उद्देग सुरू करतात. उद्देगांनी काम करप्यांचे प्रस्न, समस्याय सरकारांनी आयकून घेवंक जाय. उद्देग मळ तरतरपाक जाय जाल्यार हें चड गरजेचें.
सरकारी माध्यमीक शाळांक ब्रॉडबॅण्ड सुविधा मेळटली. मात गोंयांत सरकारी शाळा आसात, त्यो चडश्यो प्राथमीक. फुडाराक माध्यमीक शाळाय सुरू करूं येतात. मुळाव्या भलायकी केंद्रांनीय ती सुविधा मेळटली. हीं केंद्रां रामबाण वखदां, तत्पर सेवेन जिवीं जाल्यार गरिबांक बऱ्याक पडटलें. वेंचिक 50 पर्यटन थळांची उदरगत करपाचें थारलां. तातूंत गोंयचीं थळांय आसतलींच. भोवतेक पर्यटन थळांचेर कांय गुन्यांवकारी वृत्तीचे लुटारु आसतात. तांकां धांवडावपाक जाय. गोंया पसून हाची सुरवात करुंक जाय. गुन्यांवकारी नश्ट करपाक खाशेले उपाय घेवपाचो वेळ आयला. राज्य आनी केंद्रीय पांवड्याचेरुय. खास करून सायबर मळाचेर. म्हत्वाचीं वखदां सवाय जातलीं, ही थाकाय दिवपी खबर. भेसळीचेर नियंत्रण जाय. सरकारान अर्थवेवस्थेच्या इंजिनाक वेग दिवपाक उपाय घेतल्यात, मात म्हारगाय आनी बेरोजगारी हीं आडमेळीं पयस केले बगर गाडी वेग घेवची ना.