भांगरभूंय | प्रतिनिधी
अायज 26 जानेवारीक भारताच्या लोकशायेक 75 वर्सां पुराय जातात. दुसर्या क्रमांकाची लोकसंख्या आशिल्लो हो देश, अनेक संप्रदाय, धर्म, भाशा अश्या विविधतायेन भरिल्लो. फुडाराक जगांतलो बळिश्ट देश जावपाचे वाटेन वचपी हो देश. दरेका भारतीय नागरिकाच्या अभिमानाचो हो दीस.
26 जानेवारी 1950 दिसा आमच्या राश्ट्राचें स्वताचें संविधान अस्तित्वांत आयलें. लोकशाय हो आमच्या देशाचो गाभो जालो. कसलोच भेद दवरिनास्तना सगले हक्क दरेका भारतीय नागरिकाक मेळ्ळे. लोकांक आपल्या हिताची आनी हक्कांची राखण करपाचो अधिकार तांच्या हातांत मेळ्ळो. धर्म निरपेक्षताय, भावपण, अर्थीक समानताय आनी विज्ञानीक दिश्टीकोन अशीं उद्दिश्टां साकार करपाचे नदरेन जगांतलें एक उत्कृश्ट आनी आधुनीक नदर आशिल्लें संविधान आमकां मेळ्ळें. महात्मा गांधी, पंडित जवाहरलाल नेहरू, डॉ. बाबासाहेब आंबेडकर अशे व्हड नदर आशिल्ले अनेक व्हड फुडारी आमकां मेळ्ळे. सुदैवान पुरोगामी विचारसरणी आनी विज्ञानीक नदर आशिल्ले पंडित नेहरू पयले प्रधानमंत्री म्हणून मेळ्ळे. तांच्या फुडारपणा खाला आयज आमचो देश लोकशायेचीं आनी आधुनीक तंत्रज्ञानाचीं फळां चोखता. ह्या लोकशायेच्या म्हान रूखाचीं कसलीं आनी कितलीं फळां लोकांच्या तोंडांत पडल्यांत हाचो नियाळ घेवपाचो वेळ आयला.
आमच्या संविधानांत सांगिल्ल्या सगल्या उद्दिश्टांचेर खोलायेन विचार केल्यार मनीस अधिकार विकासाच्या वांठारांत आमी खूब फाटीं उरल्यात अशें दिसून येतलें. धर्म निरपेक्षताय, जातीय एकचार, भावपण, अर्थीक समानताय, सगलीं उद्दिश्टां पांयापोदां माड्डून गेल्यांत. बायल मनशेचेर हत्याचार वाडत आसात. बाल कुपोशणाचेर फावो ते तरेन उपाय जायनात. जागतीक मळार आमच्या देशाचो भूक निर्देशांक सामको सकयल्या तोंकांर पावला. लोकां मदीं प्रोटीन, लोखंड, व्हिटामीनाचो अभाव दिसता. न्याय संस्थे मुखार सगल्यांक समान हक्क मेळप हें समृध्द लोकशायेचें पयलें लक्षण आसा. पूण आमचो अणभव उरफाटो आसा. खंयच्याय स्वाभिमानी भारतियाक ही अभिमानाची गजाल जावं शकना. लोकशाय राश्ट्रांत जनता सगल्यांत शक्तीमान आसता. पूण भारतीय लोकशायेंत जनता दांत नाशिल्ली वागा सारकी जाल्या. वेंचणुकांच्या दिसांनी फकत दांताची कवळी घालून मिरोवपाक मेळटा इतलेंच समाधान.
सध्या राश्ट्रांत विचारांचें जें वारें व्हांवता ताचे वयल्यान भिरांत दिसपाक लागल्या की देशाचे धर्मीक एकचार भावनेंत फूट बी पडटा काय? जरी मनीस अधिकाराचे बाबतींत देश फावो तशी उदरगत करूंक शकलो ना तरी तंत्रज्ञानाचे नदरेन आमी बरीच उदरगत सादयल्या. दोन-तृतीयांश विज्ञानीक मनीस बळ आमचे कडे आसा. मंगलयान मोहीम पयल्याच प्रयत्नांत येसस्वी करून दाखोवपी भारत पयलो देश. सात- आठ दिसां पयलीं इस्रोन अंतराळांत येसस्वीपणान दोन उपगिर्यांचे ‘डॉकिंग’ करून इतिहासीक पराक्रम करून दाखयला. दूरसंचार आनी इंटरनेट वांठारांत आमच्या देशान बरीच प्रगती केल्या.
स्वांतत्र्यपूर्व काळांत ह्या राश्ट्रांत लोकां मदीं सगल्या स्तरांचेर व्हड विशमता आशिल्ली. अर्थीक, समाजीक, मानसीक, लैगींक अशा शोशणांतल्यान ह्या देशांतली प्रजा जिवीत भोगताली. ही परिस्थिती पयस जावपाक देशांत विज्ञानीक दिश्टीकोन पसरवपाची गरज आमच्या संविधान तज्ञांनी करून दवरिल्ली. म्हणून भारतीय संविधानांतल्या कलम 51(अ) ह्या कलमांत देशांतल्या लोकांनी विज्ञान दिश्टीकोन आपणावचो आनी समाजांत ताचो प्रसार करचो अशी जबाबदारी प्रत्येक नागरिकाचेर घातली. ते खातीर खासा विज्ञानीक येवजणी चालीक लायल्यो. विज्ञान संशोधनाक प्राधान्य दिवन समाजांत विज्ञानीक दिश्टीकोनाचो प्रसार करपाचेर भर दिलो. आयच्या युगांत आधुनीक देशाचो विकास तंत्रज्ञान आनी विज्ञानाचे प्रगतीचेर आदारून आसा. हाची जाणविकाय सगल्या विद्वानांक आनी राजकीय फुडार्यांक आशिल्ली. ते नदरेन देशांत व्हड व्हड कारखाने, उद्देग निर्माण जाले. धरणां बांदलीं. विद्यापिठां उगडलीं. मुळाव्या विज्ञान संशोधनाक वाव मेळचो म्हणून अत्यंत आधुनीक प्रयोगशाळा सुरू केल्यो. देशांत व्हड व्हड शास्त्रज्ञ, इंजिनियर, डॉक्टर, तंत्रज्ञ निर्माण जाले. पूण अपेक्षीत केल्ल्या प्रमाणें समाजांत विज्ञानीक दिश्टीकोन निर्माण जावपाक पावलो ना, ही वस्तुस्थिती आसा.
विज्ञानीक सुविधा निर्माण जाल्यो म्हणून विज्ञानीक दिश्टीकोन निर्माण जायना. विज्ञानीक दिश्टीकोन ही समाज जिविताची एक प्रणाली आसा. जिवितांतले प्रस्न सोडोवपाची एक वाट आसा. प्रस्न मागीर कसल्याय स्वरूपाचे आसूं. अर्थीक वा समाजीक आसूं. कुटूंबीक वा लैगींक आसूं. सगल्या समस्यांचेर योग्य उपाय मेळोवपाक एकूच पद्दत आसा ती म्हणजे विज्ञानीक दिश्टीकोन. ही जाणविकाय समाजांतल्या सगल्या स्तरांवयल्या लोकां कडेन पावोवपाक जाय. तरी मजुरांचें शोशण वाडत आसा. ज्या देशांत शेतकार आनी मजूर सुखी-समाधानी नासता. तांकां आपल्या जिवीतांत फुडाराची शाश्वती नासता. अशा राश्ट्राक खर्या नदरेन प्रगत राश्ट्र म्हणप शक्य जावंचें ना. तेच तरेन एके वटेन आमच्या राश्ट्रामुखार समाजीक समस्या उब्यो आसात. तर दुसरे वटेन तंत्रज्ञानाच्योय समस्या उब्यो रावल्यात. इंधनाची टंचाय, प्रदुशण, कोयराचो विल्लो अशो भयानक समस्या उब्यो जाल्यात. हरीत वायूचेर सद्या आंतरराश्ट्रीय मळार बंदना आयल्यांत. ताचेर तांतडीचो उपाय म्हणून सद्या आमचेकडे अणू उर्जा हो एकच पर्याय आसा. फाटल्या युपीए सरकारान व्हड मुत्सद्देगिरीन अमेरिके कडेन अणू तंत्रज्ञान दिवपाचेर निर्बंध फाटीं घेवपाक लायले. तेच बराबर सौर आनी पवन उर्जा निर्मितीचेर भर दिलो आनी ते खातीर तंत्रज्ञान मेळपाक विज्ञानीक तज्ञ येसस्वी जाल्यात.
विज्ञान आनी तंत्रज्ञानाक लागून शारिरीक शोशणा सावन आमी मुक्त जाल्यात. पूण मानसीक आनी भावनीक शोशणांतल्यान मुक्तताय मेळपाक फावो तशें समाजीक परिवर्तन घडोवपाक आमकां येस मेळ्ळें ना. देशाची लोकशाय ही स्वातंत्र्य संग्रामा फाटली मुळावी प्रेरणा आसा आनी त्याच प्रेरणेंतल्यान आमचें संविधान निर्माण जाल्लें आसा. तेन्ना ताचे पावित्र्य राखप हे प्रत्येक नागरिकाचें कर्तव्य आसा. जय संविधान! जय भारत!
विज्ञानदूत श्रीकांत शंभू नागवेंकार
9096512359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
