रीण नाका… अनुदान, सुविधा जाय

भांगरभूंय | प्रतिनिधी

आमचे बँकेंत तुमी दवरिल्ल्या पयश्यांचेर तुमकां रीण मेळूंक शकता. मोबायलार तशे फोन येवपाक लागल्यात. सादूर रावात, बँकेत वचून म्हायती घेवन गरजच आसल्यार रीण घेयात. एका मिनटांत मेळटलें व्हय रीण? त्या रिणाचेर कळंतर फारीक करुंक नाका? हे प्रस्न नागरिकांच्या मनांत उपरासतले.
रीण घेवचे पयलीं पुराय म्हायती मेळयात. मेळटा न्हय रीण, घेवया नवी गाडी, नवो रेफ्रिजिरेटर, कंप्युटर, मोबायल्स, बंगलो, नवें वाॅशिंग मशीन, भांगर, हे पयशे घेवन आदलें रीण फारीक करुया असोय विचार समेस्तांनी फोन येतकीच केल्यार अजाप न्हय. रीण घेवप काय ना तें तुमी थारावपाचें. रीण काडून लाव जाता जाल्यार तें घेवचें, पूण रिणाच्या पयश्यांचेर मजा मारची न्ही. मस्तीय नाकाच.
केंद्रीय अदमासपत्रक मांडपाचो दीस लागीं पावला. एखादरे 2024 लोकसभा वेंचणुके वेळार बँके मुखार सरकारान दवरिल्ली रीण दिवपाची मोख (टार्गेट) पुराय करपा पासत बँको निमण्या खिणाक येत्न करता आसत. बरें चिंतल्यार केंद्रांतल्या भाजपा (एनडीए) सरकाराक लोकसभा वेंचणुकेंत जैत उणे मेळपाचें एक कारण तेंच रीण नासत मूं? थिराविल्ल्या केंद्र सरकारान टॅक्सा वरवीं पयसो व्हडा प्रमाणात एकठांय केलो. राज्यांक वांगडा घेवन आशिल्ल्या सुविधा, साधनसुविधांचो दर्जो वाडयलो, नव्या सुविधांचे जाळेंय विणलां. स्टार्टअपांक दिल्ले उमेदीचें फळ सवकासायेन दिसपाक लागलां. कांय कंपनींचो वेवसाय आंतरराश्ट्रीय पावंड्यार गेला, कोट्ट्यधीश मनीस अब्जाधीश जाल्यात, लखपती लोक करोडपती जावपाचे वाटेर आसात.
उच्च शिक्षणांक लागून आमच्या भारत देसांत भौशीक आनी खासगी मळार मनीसबळाचीय उदरगत जाल्या. उदरगतीचे, लुकसाणेचे आंकडे मुखार येतात ते सगलेच सत नासतात. गोंया सारकिल्लें ल्हान राज्य शिक्षणांतल्यान सुदारलां. नोकरेची संद आसा, फकत ती घेवपाक जाय. मुख्यमंत्री डाॅ. प्रमोद सावंत हांणी जें विवेकानंद जयंतीदिसा युवाशक्तीक कळीत केलां तें फट न्हय.
आमी 37 वर्सांआदीं म्हयन्यांक 2500 रुपयांच्या पगाराचेर प्रायव्हेट नोकरेंत खोस मेळयली. आयज तेच नोकरेंत उणेच वीस ते पंचवीस हजार रुपया मेळटात आसतले. नोकरी कंत्राटी. कंत्राटी नोकरेचें युग प्रायव्हेटच न्हय, तर आतां सरकारांतय व्हडा प्रमाणांत आयलां. तातूंतल्यान लुकसाण जालां, फायदो जावं ना अशें म्हणूंक येवचें ना. भलायकी, शिक्षण ह्या मळांचें कंत्राटी नोकरेंतल्यान लुकसाण जाता हें सरकाराक कळूंक जाय. आदल्या तेंपा वयल्यो नोकऱ्यो थीर आशिल्ल्यान (सरकारी, प्रायव्हेट) रिटायरमेंट घेतना धा, पंधरा ते तीस, पस्तीस लाख, कोटीय मेळटात, त्या भायर पेन्शन. तातूंतल्यान राखण, जियेवपाक बळगें मेळटा.
आयज ती परिस्थिती ना. सरकारी, प्रायव्हेट नोकरेंत जिणेंत सामकी असुरक्षीतताय आयल्या अशें न्हय. पयशे चड मेळटात, जाय तितलो खर्च करुन उरिल्ल्या पयश्यांचो सांठो करपाक आशिल्ल्यो बँको, सरकारी यंत्रणाय आसात. त्या यंत्रणांक मुखेल करुन बँकांक तंत्रगिन्यानाची जोड मेळ्ळ्या, मनीसबळ उणें. मनीसबळा बगर तंत्रगिन्यान मुखार व्हरपाचे नवें तंत्र उदरगतींतल्यान येता, पूण तेंय मनशान केल्ल्या संशोधनान. रोखडें मोडपी यंत्र, तंत्र बेगीन सारकें करपी यंत्रणांची, यंत्रांची गरज आसा.
केंद्र आनी राज्याच्या अर्थसंकल्पांनी रीणा परस बऱ्यो सुविधा, साधनसुविधांची निर्मणी करपा पासत तजवीज जावची. सर्वसादारण मनशाक टॅक्सांत चड सवलती दिवपाची गरज आसा. शिक्षणांतल्यान जीण सुदारल्या, तितलेच आधुनिक जीणेंशैलीचे वायट परिणामय जाल्यात. ताचे बराबर नोकरेंत, उद्येग, वेवसायांत आशिल्ल्यान घराब्यांतली येणावळ वाडल्या. कुटुंब नियोजनांतल्यान हांव आनी म्हजीं एक वा दोन भुरगीं हें चित्र पुसून उडोवपाचो वगत आयला व्हय? दुयेंसां वाडल्यांत कित्याक? केंद्र सरकारान समाज वेवस्थेचो नियाळ घेवन नव्यो येवजणी करप समा जातलें. येणावळ वाडिल्ल्यान बँकेच्या खात्यांचें वजन वाडलां. तांकांय साधनसुविधांनी पयसो गुंतोवंक लायल्यार? तंत्रगिन्यानांतल्यान सायबर गुन्यांव वाडल्यात. त्या गुन्यावांचे भकीक पडचे न्हय म्हणून जागे करपाक जायरात जाता मोबायलावेल्यान. ताचो लाव जाता? गुन्यांवकारांक धरतात पूण तणांच जामीन, सुटप रोखडेंच. भौशीक सुवातींनी, दिसाळ्यांतल्या केल्ल्या जायरातींचो नितळसाणी पासत लाव जाला. येणावळ वाडिल्ल्यान रिणाची गरज कित्याक अशे प्रस्न उपरासतले, गरजेवंत आसतलेच. तांकां सोदून काडून रीण दिवपाची वेवस्था जावची. जातात व्हय तशे येत्न?
स्मार्ट पणजेंत कसिनो भायर खेळ, बोमाडे विकपी घालतात पिंदिल्ले कपडे पूण विकपाक वस्ती गाडयेन घेवन येतात, चडशे गोंयां भायले. पर्यटकांकच न्हय थळाव्यांकय पिडापीड करपी फेरीवाले, खेळणीवाले, भिकारी. खरेंपणी ते गरीब? गरिबीचे सवंग घेतिल्ले? घुंवळे वखदांची पुरवण करपी? पुलिसांनी सोदल्यार भांगराळो त्रिकोण, चौकोन उगतो जातलो. कोण आसा त्या त्रिकोण, चौकोनाचो मुखेली? कित्याक घेनात ते नोकरेची संद? संद आसूनय ती न घेवप्यांक सोदपाची, तांकां प्रशिक्षणातल्यान नोकरे मेरेन पावोवपाची तजवीज अंदू गोंय सरकारान करची. ते खातीर मानसिकता तयार करपाची जापसालदारकी शिक्षक घेतले? कितें आसा आतांच्या गुरुंची अवस्था? आव्हानां, अरिश्टां आतांच्या गुरुंक कळटात? धारबांदोड्यां विद्यार्थ्यांक एके शाळेचो प्यून कित्याक बडयता? सरकारान चवकशी करची भुरग्यां विशींचे लागणुकेंतल्यान. एके प्रायव्हेट शाळेचो तो प्यून, जापसालदारकी ते शाळेची अशें सांगपी शिक्षण संचालकांक भुरग्यां विशींचे लागणुकेचें प्रशिक्षण दिवचें.
मात्शें उत्सवी जावप कमी केल्यार पयसो वांटावतलो, आशिल्ल्या भवनांचो उपेग केल्यार येणावळ येतली. कलेच्या आंगणांनी वेवसायिकांक हाडल्यार भवनां जातलींच. आदीं शिक्षण, प्रशिक्षण, पयलींच्यांक संजीवनी. माचयो हजार, त्यो पांचशे करुन एकामेकांक जोडल्यार? विचारधनांचे पेटूल आमी दितात, तुमीय दियात.

सुहासिनी प्रभुगांवकार
9881099260