भांगरभूंय | प्रतिनिधी
नवी दिल्ली, खबरां संस्था ः मोटसाण सारकिल्ले दुयेंस संवसारभर नेटान वाडत आसा. तशेंच मोटसाणेक लागून जावपी काळजाच्या दुयेंसांतल्यान मरण येवपाच्या प्रमाणांतूय वाड जाल्या. खास करून तरणाट्यां मदीं हें प्रमाण चड वाडिल्ल्याचे एका अभ्यासांत दिसून आयलां. अमेरिकेंतल्या हालींच्या संशोधनांतल्यान अमेरिकेंत फाटल्या 20 वर्सांत मोटसाणीक लागून जावपी काळजाच्या दुयेंसांतल्यान मरण येवपाचें प्रमाण तिप्पटीन वाडलां अशें दिसून आयलां. भारतांतय हें संकश्ट दिसता, जंय जिणे पद्दतींत बदल, शारीकरण, आहाराची चुकीची सवय ह्या दुयेंसाचे मुखेल घटक.
मोटसाणीची समस्या कित्याक वाडटा?
मोटसाण हो इस्केमीक काळजाच्या दुयेंसाचो एक मुखेल धोको आशिल्ल्याचें मानतात. पूण हालींच्या अभ्यासांतल्यान ही स्थिती आजून वायट जायत आसा अशें दिसून आयलां. अमेरिकेंत 1999 ते 2020 ह्या काळांत मोटसाणी संबंदी जावपी इस्केमीक काळजाच्या दुयेंसाक लागून मरण येवपाचो आंकडो 180 टक्क्यांनी वाडलो. 55 ते 64 वर्सां पिरायेच्या दादल्यां मदीं मरण येवपाचें प्रमाण 165 टक्क्यांनी वाडले. हे आंकडे अस्तंती देशांतले आसले तरी भारतांत काळजाच्या दुयेंसांचें प्रमाण वाडटा ही हुस्क्याची गजाल. बदलपी जिणे पद्दत, चड कॅलरीयुक्त आहार, शारिरीक हालचाल उणो जावप आनी ताण वाडिल्ल्यान भारतीय दादल्यां मदीं मोटसाण वाडल्या.
काळजा संबंदी धोको वाडटा…
भारतांतल्या राष्ट्रीय कुटुंब भलायकी सर्वेक्षणाच्या (NFHS) प्रमाण 2019 ते 2021 ह्या काळांत दादल्यां मदीं मोटसाणीचे प्रमाण दुपेटीन वाडलां. हाका लागून काळजाच्या दुयेंसांचें प्रमाण वाडलां. जें देशभरांत मरण येवपाचें मुखेल कारण आसा. भारतीयांक काळजाचो दुयेंस हो एक मुखेल हुस्को, कारण भारतीयांक हाचो चड धोको आसता, हो दुयेंस ल्हान पिरायेचेर जाता आनी ताचे परिणाम चड खर आसतात. अस्तंती लोकसंख्येचे तुळेंत भारतीयांक सुमार 10 वर्सां आदीं काळजाच्या दुयेंसां संबंदीत समस्या निर्माण जातात आनी ताका लागून जियेंवपाचे उरपाचें प्रमाण उणें जाता.
तरणाट्यांक धोको कित्याक?
अभ्यासांतल्यान दिसून अशें दिसून आयलां, मध्यम पिरायेच्या दादल्यांक बायलांपरस मोटसाण आनी काळजाच्या दुयेंसांक लागून मरण येवपाचें प्रमाण खूब चड आसता. अमेरिकेंत 1999 वर्सा दर एक लाख लोकां फाटल्यान 2.1 मरणांच्या आंकड्यावेल्यान 2020 वर्सा 7.2 म्हणल्यार 243% वाड जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
