भांगरभूंय | प्रतिनिधी
गांवकार – राणे- माजीक गटांतल्या लोकांची एकामेकांक मारपेटवाळपयः फाटल्या जायत्या वर्सां पसून पर्येंतल्या भुमिका देवीच्या देवस्थानां वयल्यान गांवकार- राणे आनी माजीक ह्या महाजन गटांत धर्मीक हक्का वयल्यान वाद सुरू आसा. अंदूं बुधवारा देवीचो परंपरीक कालोत्सव मनोवपाच्या कारणा वयल्यान अचकींत वाद निर्माण जालो. ह्या वेळार एकामेकांचेर गुंडे मारप आनी मारपेट करपा सारकी घडणूक घडली. हातूंत गांवकार-राणे आनी माजीक ह्या तिनूय गटाचे 25 परस चड लोक जखमी जाले. तशेंच 15 परस चड पुलीस जखमी जाले.
ह्या वेळार पुलीस निरिक्षक अनंत गांवकार हे गंभीर जखमी जाल्यात. सांखळे सरकारी सामाजीक हॉस्पिटलांत मुळावे उपचार करून तांकां आनी हेर जखमी पुलिसांक घरां धाडल्यात. जाल्यार दोगांची भलायकी हुस्क्याची आशिल्ल्यान तांकां बांबोळे गोमॅकाँत उपचारा खातीर दवरल्यात.
फाटल्या तीन म्हयन्यां पसून माजीक राणे आनी गांवकार हांचे मदीं देवस्थानाच्या हक्का वयल्यान वाद खर जाला. सध्या सुरू जाल्ल्या कालोत्सवाक गांवकार महाजन गटा कडल्यान हरकत घेतिल्ली. जे मेरन गांवकार महाजन गटाक आपलो हक्क दिनात ते मेरेन हो उत्सव मनोवपाक दिवचो न्हय, अशी मागणी तांणी सत्तरी म्हालाच्या मामलेदारां कडेन केल्ली. हाचेर मामलेदारांनी सुनावणी घेवन गांवकार आनी राणे महाजन गटाचे म्हणणें आयकून घेतिल्लें. पूण निर्णय दिवंक नाशिल्लो.
बुधवारा सकाळीं परंपरे प्रमाण उत्सवाक सुरवात जाली. ह्या वेळार गांवकार आनी राणे महाजन गटाच्या भाविकांनी देवदर्शना खातीर देवळांत प्रवेश करपाचो यत्न केलो, तेन्ना पुलिसांनी तांकां आडायले. ताका लागून वाद निर्माण जालो. तशेंच ह्या वेळार भावीक आनी पुलिसांत तणाव निर्माण जावन ताचे झगड्यांत रुपांतर जाले. पुलीस उपअधिक्षक जिवबा दळवी हांच्या फुडारपणा खाला पुलिसांनी भाविकांक आडावन धरले.
मोट्या प्रमाणांत ह्या दोनूय महाजन गटाच्या भाविकांनी देवळाच्या सभाघरांत निर्दशनां केली. देवस्थानांत आशिल्लो आमचो हक्क दिवचो, आमचेर अन्याय करचो न्हय अशी मागणी तांणी केली. ह्या वेळार अचकींत महाजन गटाच्या लोकांनी तांचेर गुंडे शेंवटीले आनी दांड्यान मारपेट करपाक सुरवात केली. ताका लागून जमाव खवदळ्ळो आनी थंय तणावाची परिस्थिती निर्माण जाली.
देवळाच्या सभाघरांत बशिल्ल्या भाविकांक मोट्या प्रमाणांत मारपेट केली. हातूंत गांवकार आनी राणे ह्या दोनूय महाजन गटाचे सुमार 25 पर चड जाणांक मारपेट केली. ह्या वेळार थंय उपस्थीत आशिल्ल्या पुलिसांचेरूय गुंडे मारलें. हातूंत पुलीस निरिक्षक अनंत गांवकार हांचे तकलेर गुंडे बसून ते जखमी जाले. तांकां उपचारा खातीर बांबोळे गोमॅकाँत धाडले.
गांवकार-राणे गटाची एकामेकां आड कागाळ
गांवकार आनी राणे ह्या दोनूय महाजन गटाच्या लोकांनी सांजे वाळपय पुलीस स्टेशनाचेर मारपेटीची कागाळ दाखल केल्या. मजगतीं, जखमी जाल्ल्या भाविकांक सांखळे हॉस्पिटलांत दाखल केले. तशेंच दोगां भाविकांची भलायकी हुस्क्याची आशिल्ल्यान तांकां फुडल्या उपचारा खातीर बांबोळे गोमॅकाँत धाडल्यात. मजगतीं, दनपरां 2 वराच्या सुमाराक कांय प्रमाणांत तणाव निवळलो. ते उपरांत देव दर्शनाक सुरवात जाली. ह्या वेळार थंय माेट्या प्रमाणांत पुलीस बंदोबस्त दवरिल्लो.
तणावाचें परिस्थितीक पुलीस जापसालदारः महाजन गटांचो आरोप
गांवकार आनी राणे ह्या दोनूय महाजन गटाच्या मंडळींनी सांगलें, पुलिसांचे हाजिरेंत कांय भाविकांनी आमचेर गुंडे शेवटिले. कांय जाणांनी शस्त्रां घेवन देवस्थानांच्या वाठारांत प्रवेश केलो. त्या वेळार पुलिसांनी तांकां आडायिल्ल्यान तणावाची परिस्थिती निर्माण जाली. ही परिस्थिती निर्माण जावपाक पुलिसांची घाळपणां जापसालदार आशिल्ल्याचो आरोप तांणी केलो. ते खातीर सरकारान हाची चवकशी करची. तशेंच मारपेटीच्या प्रकरणाची चवकशी करून संबंदितांचेर कारवाय करची, अशी मागणी केल्या.
———————-
सध्या परिस्थिती नियंत्रणा खालाः डॉ. देविया राणे
पर्ये वाठारांत सध्या तरी शांततायेचें वातावरण आसा. कसलोच तणाव थंय ना. परिस्थिती पुराय नियंत्रणा खाला आसा. देवीच्या परंपरीक कालोत्सवाक सुरवात जाल्या. भावीक देवदर्शनाचो लाव घेतात. कायदो हातांत घेवपाचो अधिकार कोणाकूच ना. तो कायद्याचो भाग आसा. कायद्या प्रमाण महाजन गटांक तांचे हक्क मेळटले. पुलीस जाल्ले घडणुकेची चवकशी करतले, अशें आमदार डॉ. देविया राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
