भांगरभूंय | प्रतिनिधी
-कसलीच पूर्वसुचोवणी दिवंक नाशिल्ल्यान वाहन चालकांक त्रासपणजीः स्मार्ट सिटीचें काम परतून सुरू जाल्लीं कामां, कसलीच पूर्व सुचोवणी दिनासतना रस्ते बंद करप, पार्किंगाची शिस्तबध्दता ना, येरादारी पुलिसांचो उणाव अशा वेगवेगळ्या कारणांक लागून राजधानी पणजींत परतून एक फावट येरादारीची गर्दी जाल्या. शुक्रारा दनळपारां 11.30 ते 1.30 वरां मजगतीं सांतइनेज, दयानंद बांदोडकार रस्तो, मार्केट एरिया, आत्माराम बोरकार रस्तो हांगा येरादारीच्या कोंयडेक लागून वाहनांची गचमुड्डी जाल्ली.
पणजे स्मार्ट सिटीचें काम परतून सुरू जालां. हाका लागून सांतइनेज जंक्शना सावन काकुलो जुंव्या मेरेन वचपी रस्तो पुरायपणान बंद जाला. हाका लागून जंक्शना सावन शीतल हॉटेला मेरेन वाहनांची रांक आसा. जंक्शना वयल्यान येरादारी घुंवडायिल्ल्यान नगरपालिका वाचनालय – फार्मसी कॉलेज फाटल्यान आशिल्ल्या रस्त्यान पणजी बाजारांत पावपा खातीर घुंवडावन येवचें पडटा. हो रस्तो अशीर आशिल्ल्यान हांगाय येरादारीची गर्दी जाता.
जंक्शन बंद आशिल्ल्यान ड्रायव्हर दयानंद बांदोडकार रस्त्याचो वापर करतात. हाका लागून ह्या रस्त्याचेर वाहनांचो आंकडो वाडला. हांगाच्या साग मैदानाचेर तीन दिसांचो उत्सव आशिल्ल्यान सांजवेळार येरादारीची गर्दी वाडपाची शक्यताय आसा. हाचे भायर डॉन बॉस्को शाळे सावन काकुलो जुंव्या मेरेन वचपी रस्तोय बंद आसा. हाका लागून पणजे मार्केट वाठारांत येरादारीची गर्दी जावपाक लागल्या. बाजारांत येवपी नागरिकांची संख्या व्हड आशिल्ल्यान ह्या वाठारांत वाहनांची व्हड प्रमाणांत येरादारी जाता.
चडशा रस्त्यांचेर येरादारीची कोंयडी जाता. तशेंच दोनूय वटांनी बेपर्वायेन वाहनां उबीं करतात. हाका लागून येरादारीची गर्दी वाडत आसा. पूण थोड्याच सुवातींनीच पुलिसांची नेमणूक जाल्या. सांतइनेज जंक्शन, बायलां आनी बाल कल्याण खात्यां कडेन पुलीस आसले तरी व्हड प्रमाणांत वाहनां आशिल्ल्यान येरादारी नियंत्रीत करपाक तांकां कठीण जाता. ह्या रस्त्यांचेर बेशिस्त रितीन उबी केल्ल्या वाहनां आड कारवाय करची अशी मागणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
