भांगरभूंय | प्रतिनिधी
चिन्मयी सुमीत: भुरग्यांचे उदरगती खातीर आवयभाशेंतल्यान शिक्षण म्हत्वाचें
मडगांव: भास म्हणल्यार फक्त व्याकरण नासून ती संस्कृती आसता. ती संस्कृती संस्कारांतल्यान फुडले पिळगेक मेळत आसता. आपली आवयभास उलयिल्ल्यान, वाचिल्ल्यान, वापरिल्ल्यान ती वाडत वता. आवयभाशेंतल्या शिक्षणांतल्यान भुरग्यांची उदरगत बरी जाता. ताका लागून आवयभाशेचे संस्कार मुखार व्हरपाचें काम दरेकान करूंक जाय अशें मत चिन्मयी सुमीत हांणी उक्तायलें.
गोमंत विद्या निकेतना वतीन विचारवेध व्याख्यानमाळेचें आयोजन केलां. बिरेस्तारा श्रीनिवास नायक स्मृती व्याखानांत अभिनेत्री तशेंच समाजीक कार्यकर्त्यों चिन्ययी सुमीत हांणी मायभास आनी शिक्षण: संस्काराचे आधारस्तंभ ह्या विशयाचेर उलोवप केलें.
चिन्मयी सुमीत हांणी सांगलें, इंग्लीश ही संवसारीक पांवड्यार उलयिल्ली भास. इंग्लिशीक आपलो विरोध ना. ताका लागून फक्त इंग्लिशींतल्यान ज्ञान मेळटा असो समज कोणेय करून घेवचो न्हय. सगल्या भाशेंतलें ज्ञान इंग्लीश भाशेंत विवीध माध्यमांतल्यान अनुवादीत जाल्ल्यान ते भाशेंतल्यान ज्ञान स्विकारपाची वृत्ती वाडत आसा. हेंच काम दरेकान आपले आवयभाशे खातीर करप गरजेचें आसा. आवयभाशेंतल्यान ज्ञान मेळोवपा खातीर ती समृद्ध करपा खातीर सगल्यांनी यत्न करपाची गरज आसा. आवयभास समृद्ध करून हेच संस्कार मुखार व्हरूंक जाय अशेंय तांणी म्हणलें.
आमी उणें पिरायेंत भुरग्यांक शाळेंत धाडटात. पूण तांच्या मनाचेर ताचो ताण येता काय कितें हाचो विचार करपूय गरजेचें आसा. शाळेंतल्यान आयले उपरांत तीं कांयच सांगिनात म्हणल्यार भुरग्यांच्या मनाचेर ताण आयला अशें ना. ताका लागून अडेज वर्साच्या भुरग्याक शाळेंत धाडल्यार आनी तो परतून घरा आयल्यार ताण येत आशिल्ल्याचें सांगचो ना. भुरग्यांक खूबशे प्रस्न सेगीत पडत आसतात. तांकां ते सेगीत विचारपाचे आसतात. आवयभाशेंतल्यान हें सहजतायेन जायत आसता. पूण जाका आवयभास सोडून इंग्लीश वा हेर भाशीक शाळेंत भुरग्यांक घालतात. त्या वेळार भुरग्यांक प्रस्न कसो विचारचो हे खातीर ते तयार करपाक वेळ वता आनी ल्हवू ल्हवू भुरगीं प्रस्न विचारपाचे सोडून दितात अशें सुमीत हांणी म्हणलें.
आवय-बापायचें भुरग्यां कडेन सारकेंच प्रेम आसता. ताका लागून भुरग्यांचेर आपल्यो इत्सा आकांक्षा लादिनासतना ताका ताच्या आंगान वाडूंक दिवप गरजेचें आसता, आनी ताची उदरगत जावप गरजेची आसता अशेंय तांणी म्हणलें.
खंयचेंय शिक्षण घेतना ताका भाशेचें बंधन आसप चुकीचें आसा. जे भाशेंतल्यान सहजतायेन ज्ञान संपादन करूंक मेळटा ती आवयभास आसता. ताका लागून आवयभाशेंतलें शिक्षण हें कठीण दिसना आनी भुरग्यांचे उदरगती खातीर सोंपी थारता. संवसारभरांतल्या तज्ञांनानी लेगीत आवयभाशेंतल्यान शिक्षणाचो सल्लो दिला. आवयभाशेंतल्यान उलोवप, वाचप, बरोवप आनी तिची वाड करप हें दरेकान केल्यार नक्कीच आवयभास वाडीक लागतली अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
