भांगरभूंय | प्रतिनिधी
-फोंडें पालिकेची कारवाय, एकल्याक अटक फोंडेंः पालिकेचे मुख्याधिकारी योगीराज गोसावी हांची बनावट सय करून आनी पालिकेचो स्टॅम्प वापरून उत्पन्नाचो दाखलो घेतिल्ले प्रकरणांत नगरसेवक शिवानंद सावंत हाका बिरेस्तारा पुरिसांनी अटक केल्या. हाचे पयलीं सदानंद सीताराम प्रभुगांवकार (सिल्वानगर फोंडें) हांचे आड पुलिसांनी गुन्यांव नोंद करून तांकां अटक केल्ली.
उत्पन्नाच्या दाखल्या खातीर अर्ज केल्ल्या सदानंद प्रभुगांवकार हांणी पयलीचो बनावट उत्पन्नाचो दाखलो जोडिल्ल्याचे पालिकेच्या कर्मचाऱ्यांक दिसून आयलें. ते प्रमाण पालिकेच्या अधिकाऱ्यांनी मुख्याधिकारी योगीराज गोसावी हांचे नदरेक हाडून दिले उपरांत सदर दाखल्याचेर सय बनावट आशिल्ल्याचे स्पश्ट जाले. हे संबंदी मुख्याधिकारी योगीराज गोसावी हांणी फोंडें पुलीस स्टेशनांत कागाळ दाखल केल्ली. फोंडें पुलीस स्टेशनाचे निरिक्षक विजयनाथ कवळेंकार हांणी प्रकरणाची खोलायेन चवकशी केले उपरांत सदर बनावट उत्पन्नाचो दाखलो गोमॅकाँत वापरिल्ल्याचे चवकशेंत स्पश्ट जाल्ले. पुलिसांनी गुन्यांव नोंद केल्ल्या सदानंद प्रभुगांवकार हांचे कडेन चवकशी केली, नगरसेवक शिवानंद सावंत हांणी हो दाखलो आपल्याक दिल्ल्याचे मान्य केले. ते प्रमाण बिरेस्तारा पुलिसांनी नगरसेवक शिवानंद सावंत हांकां रितसर अटक केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
