भांगरभूंय | प्रतिनिधी
-हेर कर्मचाऱ्यां कडल्यान रक्कम वसूल करपाची प्रक्रिया सुरू पणजीः गृहआधार येवजणेचो लाव घेवपी 2,960 सरकारी कर्मचाऱ्यांक येवजणेची रक्कम परतून दिवपाक सांगल्या. हातूंतल्या 190 सरकारी कर्मचाऱ्यां कडल्यान येवजणेची 1.13 कोटी पुराय रक्कम वसूल केल्या, अशी म्हायती बायलां आनी भुरगीं उदरगत संचालनालयान दिल्या.
गृहआधार येवजणे खाला कुटुंबांतल्या दरेका बायलांक 1,500 हजार रुपया इतले मानधन मेळटा. पूण हे येवजणेचो लाव घेवपी सरकारी कर्मचाऱ्यांक ही येवजण बंद करपाचो आदेश दिवन जांणी आतां मेरेन हे येवजणेचो लाव घेतला तांकां रक्कम परत़न सरकाराक दिवपाचो आदेश दिल्लो. कांय सरकारी कर्मचाऱ्यांनी 50 हजार रुपया मेरेन लाव घेतिल्लो. पूण तांकां ते एका खेपेन परत दिवपाक शक्य नाशिल्ले. देखून सरकारान हो लाव हफ्त्यान फारीक करचो अशी सुचोवणी केल्ली.
बायलां आनी भुरगीं उदरगत संचालनालयान दिल्ले म्हायती प्रमाण, गोंयांत 2,960 सरकारी कर्मचारी हे येवजणेचो लाव घेतात अशें दिसून आयलें. तातूंतली 69 बायलां कर्मचारी आसात जाल्यार 2,891 कर्मचाऱ्यांच्या घरकान्नींचो आस्पाव आसा.
डिसेंबर 2024 मेरेन 190 सरकारी कर्मचाऱ्यां कडल्यान गृहआधार येवजणेचे पुराय पयशे सरकारान वसूल केल्यात. जाल्यार 36 कर्मचाऱ्यां कडल्यान हे येवजणेची थकबाकी वसूल करप चालू आसा. जाल्यार उरिल्ल्या कर्मचाऱ्यांनी अजून मेरेन हे येवजणेचे पयशे परतून दिवपाक सुरू करुंक ना.
————–
आतां मेरेन 36 जाणांची थकबाकी उरल्या
190 कर्मचाऱ्यां कडल्यान येवजणेचो पुराय लाव 1,03,62,812 इतली रक्कम वसूल केल्या आनी 36 जाणांची थकबाकी प्रक्रिया वसूल करपाची प्रक्रिया चालू आसा. तातूंतल्यान आतां मेरेन 9,92,400 इतली रक्कम वसूल केल्या. हे दोनय मेळून आतां मेरेन 1,13,55,212 रक्कम परत सरकाराच्या तिजोरेंत जमा जाल्या.
————–
360 जाणांचो लाव परतून चालूच दवरपाचेर फेरविचार
जाल्यार 360 प्रकरणां अशीं आसात जांचेर खात्यान तांचे कडल्यान लाव परत घेवप कांय ना हाचेर फेरविचार चल्ला. जेन्ना सरकारी कर्मचाऱ्यां खातीर निर्णय जाहीर जाल्लो तेन्ना कांय जाण सरकारी कर्मचारी आसून लेगीत लाव घेतात अश्यो फटीच्यो कागाळी आयिल्लो. चांचपणे वेळार दिसून आयले प्रमाण, 360 लाबार्थी अशें आसात जे सरकारी सेवेंत नात. देखून हो लाव तांकां परत चालूच दवरचो म्हूण आमी फेरविचार करतात, अशें खात्याच्या गोपांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
