भांगरभूंय | प्रतिनिधी
पणजी : फाटल्या एका वर्सांत राज्यांतल्या सैमीक स्रोतांतल्या (भुजल) उदक वापरांत ३० लाख घन मिटरान वाड जाल्या. एका वर्सांत राज्यांत घरगुती, उद्देगीक आनी कृषी क्षेत्रा खातीर उदकाचो वापर वाडला. २०२३त राज्यांत उपलब्ध भुजल सांठ्या मदलें ६.८ कोटी घन मिटर उदक वापरलें. जाल्यार २०२४क निमाणे कडेन ७.१ कोटी घन मिटर उदक वापरलें. अशें जरी आसलें तरी राज्यांतल्या सगळ्या म्हालांतलो भुजल सांठ्याचो वापर सुरक्षीत आसा. केंद्रीय भुजल मंडळाच्या अहवालांतल्यान ही म्हायती मेळ्ळ्या.
अहवाला प्रमाण, २०२३त राज्यांतल्या जमनींत ३९.६ कोटी घन मिटर उदक जिरून गेल्लें. हांतलें ३१.७ कोटी घन मिटर उदक वापरपा इतलें योग्य आशिल्लें. २०२४त राज्यांतले जमनींत ३८ कोटी घन मिटर उदक जिरून गेल्लें. हातूंतलें ३१ कोटी घन मिटर पाणी वापरपा इतलें योग्य आशिल्लें. वयल्या दोनूय वर्सांत राज्यांत उपेगी भुजल सांठ्या परस उणें उदक वापरलें. २०२३ त जमनींतलें उपेगी उदक सांठ्या मदलें २१.३७ टक्के वापरलें, जाल्यार २०२४त राज्यांतलें उपेगी उदका सांठा मदलें २२.९१ टक्के उदक वापरलें.
२०२४त गोंयांत वापरपी वट्ट भुजला मदलें घरघुती वापरा खातीर सगळ्यांत चड ४ कोटी घन मिटर उदक उसपलें. शेती खातीर ३ कोटी उद्देगां खातीर वापरलें. २०२४त ३१ मदलें ७ कोटी घन मिटर उदक वापरलें. २०२४त ७० टक्के भुजल सांठो हो मान्सुना पयलीं आनी मान्सुना उपरांतच्या पावसाक लागून भरिल्लो. २०२३चे तुळेंत २०२४त गोंयां सयत हेर १६ राज्यांनी भुजलसांठो ०.२ मिटर मेरेन वाडिल्ल्याचें अहवालांत नमूद केलां.
पुराय देशाचो विचार केल्यार २०२४त जमनींत सुमार ४४ हजार कोटी घन मीटर उदक जिरलें. हांतलें ५५ टक्के उदक मान्सून काळांत जिरून गेल्लें. २० टक्के हेर कारणांक लागून, जाल्यार १९ टक्के उदक हें मान्सून काळांतल्या पावसा बगर हेर कारणांक लागून जमनींत जिरून गेल्लें. हातूंतलें ४० हजार कोटी घन मिटर उदक वापरपाचें आशिल्लें.
अंदूं देशांतल्या उपेगी उदका सांठ्या मदलें २२.९१ टक्के उदक वापरलें. २०१७ चे तुळेंत २०२४त देशांतली भुजल पातळी १५०० कोटी घन मिटरान चड भरल्या.
इकरा वर्सांनी राज्याची भुजल पातळी देंवली
अहवाला प्रमाण, राज्यांतले भुजल पातळेंत २०१३ ते २०२३ ह्या इकरा वर्सांनी ० ते २ मिटरांनी देंवल्या. वयल्या काळांत गोंयचो सत्तरी आनी काणकोण म्हालाचो सामको उणो भाग सोडल्यार चडश्या सुवातांचेर भुजल पातळी ही मान्सून पयलीं आनी उपरांतच्या काळांत उणी जाल्ल्याचें दिसलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
