भांगरभूंय | प्रतिनिधी
प्रदेशाध्यक्ष, सरचिटणीस हांचे कडेन उलोवन दुबाव पयस करात
पणजी: पक्षाच्या फुडाऱ्यांच्या कामा विशीं कसलीय कागाळ, दुबाव आसत जाल्यार ताचें उलोवप भायर करचें न्हय. प्रदेशाध्यक्ष वा सरचिटणीस हांचे कडेन चर्चा करून कागाळ, दुबाव सुटावो करात असो सल्लो मुख्यमंत्री डॉ. प्रमोद सावंत हांणी सोमारा भाजपाचे फुडारी तशेंच कार्यकर्त्यांक दिलो.
नव्या मंडळ अध्यक्षांच्या भोवमान सुवाळ्यांत ते उलयताले. पक्षान ह्या वेळार मंडळ अध्यक्षपदा खातीर पिरायेची अट घाली. ताका लागून पक्षाच्या नव्या तांकीच्या कार्यकर्त्यांक मंडळ अध्यक्षपदार नेमणूक जावपाची संद मेळ्ळी. सद्याच्या मंडळ अध्यक्षा पैकीं 50 ते 60 टक्के मंडळ अध्यक्ष हे भाजप युवा मोर्चाचे कार्यकर्ते आसात. तरणाट्या मंडळ अध्यक्षांक लागून भाजपूय आतां तरणाटो जाला अशें मुख्यमंत्री डॉ. प्रमोद सावंत हांणी म्हणलें.
36 मंडळांचेर नव्या अध्यक्षांची नेमणूक जाली. म्हणल्यार पोरण्या अध्यक्षांची जापसालदारकी सोंपली अशें न्हय. तांची जापसालदारकी आनीक वाडल्या. फुडल्या काळांत तांच्यो नेमणुको हेर पदांचेर करतले अशें तांणी म्हणलें. मतदारसंघ जिखपा खातीर मंडळ अध्यक्षाची भुमिका म्हत्वाची आसता. ताका लागून नव्या अध्यक्षांनी पोरण्या अध्यक्षां कडल्यान मार्गदर्शन घेवन तांच्या सल्ल्या प्रमाण काम करप गरजेचें आसा अशें तांणी सांगलें.
विधानसभा वेंचणुकेच्या कामाक लागात
भाजपाच्या सगल्या कार्यकर्त्यांनी 2027 च्या विधानसभा वेंचणुकेच्या कामाक आतां सावूनच सुरवात करची. फाटले विधानसभा वेंचणुकेंत ज्या मतदारसंघांनी भाजप उमेदवारांक हार खावची पडली ते मतदारसंघ जिखपा खातीर आतां सावनूच रणनिती आंखात आनी सेगीत चौथे फावटी विधानसभेचेर भाजपाचो बावटो हुबयात अशें आवाहनूय मुख्यमंत्री डॉ. प्रमोद सावंत हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
