भांगरभूंय | प्रतिनिधी
मार्च 2020 ते 2022 मेरेन भारतांत कोरोनाक लागून नेमकें कितें जाल्लें, कितले मेल्ले, भलायकी, रोजगार, शिक्षण मळाचेर कितें आकांत आयिल्लो, ताच्यो यादी सगल्यांच्याच मनांत आसात. कोरोनाक (कोवीड-19) लागून जांच्या धडधाकट घरच्यांक प्राण सोडचे पडले, तांच्या तर दोळ्यां मुखार अजून सगलें येता आसतलें. हो व्हायरस चीनांतल्यान आयिल्लो. फक्त भारतांतूच न्हय, तर पुराय संवसारांत पातळिल्लो. भारतांत जानेवारींत केरळांत पयलो दुयेंती मेळिल्लो. गिमांत कोरोनान भिरांकूळ रुप घेतिल्लें. पूण चीनांत शिंयाच्या दिसांनी ताणें धुमशेणां घालपाक सुरवात केल्ली. आताय ह्युमन मेटान्यूमोवायरस (एचएमपीव्ही ) नेटान पातळपाक लागला. भारतांतूय सोमार रातीं मेरेन पांच दुयेंती मेळिल्ल्यान लोकांक हुस्को जाला. कर्नाटकांत दोन दुयेंती मेळ्ळे. एक आठ म्हयने पिरायेचो आनी दुसरो तीन म्हयन्यांचो. गुजरातांत मेळ्ळा तो तिसरो दुयेंती दोन म्हयन्यांचो. तामिळनाडूंतय रातचे दोन दुयेंती सांपडले. तीन दुयेंती सामके ल्हान. अर्भकां. तीं वा तांचो कोणूच चीनाक वचूंक नासलो. तरीय तो तांकां कसो जालो, ताचो सोद आतां दोतोर घेतात. हातूंतल्या दोगांक ब्रोंकोनिमोनिया (पुलमांवांक जावपी दुयेंस) हें श्वासाचें पयलींच दुयेंस आशिल्लें. सगल्यांची भलायकी बरी आसा. एकल्याक घरा धाडला. भिवपाची गरज नासली तरी भलायकी मंत्रालयान सादूर रावपाची शिटकावणी दिल्या.
दोतोरांच्या मतान, हो व्हायरस पयलीं सावन भारतांत वा हेर देशांनीय आसा. ह्या एचएमपीव्ही दुयेंसाचीं लक्षणां थंडे सारकींच. जोर येता आनी स्वासा संबंदीचो संसर्ग जाता. एन्फ्लुएन्झा म्हणल्यार थंडी-जोरा सारकोच हो प्रकार. खोंकली, जोर, नाक चोंदता, स्वास घेतना त्रास जाता. वेळार उपचार करूंक नात जाल्यार न्यूमोनिया जावं येता. 2001 वर्सा हाॅलंडांत भुरग्या दुयेंतींचो अभ्यास करतना हाचो सोद लागिल्लो. तो स्वासांतल्यान संक्रमण करता. तीन ते पांच दिसांनी ताचो संसर्ग जाता. हें दुयेंस जावचें न्हय, म्हूण कोरोना सारकीच खबरदारी घेवपाची. गर्देंत वचप ना, मास्क घालप, थंडी जातली अशें कांय खावप, पिवप ना, तेलकट खावप ना. शिंको आयल्यार तोंडार हात वा लेंस धरून खोंकप, हात- पांय नितळ साबू लावन धुवप…!
आमी हाका तोंड दिवपाक सज्ज रावल्यात. पूण सध्या कोणें आबूज जावचें न्हय. कोरोना वेळार घेतल्या तशीच जतनाय घेवपाची, अशें केंद्रीय भलायकी मंत्री जे पी नड्डान हांणी म्हणलां. केंद्र सरकार परिस्थितीचेर लक्ष दवरून आसा, अशेंय तांणी सांगलें. संवसारीक भलायकी संघटणेन चीनाच्या ह्या व्हायरसा विशीं अजून कांय शिटकावणी दिवंक ना. आणिबाणीची परिस्थिती आशिल्ल्याचें जाहिरूय करूंक ना. तरीय सगल्यांनी सादूर रावप बरें. चीनाक आपल्या देशांत जावपी दरेक गजाल लिपोवपाची वायट संवय. कोरोनाच्या वेळारूय तांणी चार- पांच म्हयने कांयच जाहीर करूंक नाशिल्लें. हे खेपे चीन बारीकसाणेन परिस्थिती नियाळटा. आपल्या आनी शेजराच्या देशांनी तांणी पळोवणी केल्या. हाँगकाँगांत एचएमपीव्हीचे दुयेंती मेळ्ळ्यात. तैवान, जपानूय वावराक लागला. ह्या दिसांनी चीनांत लाखांनी पर्यटक वतात. हालींच नवें वर्स जालें, त्या वेळारूय थंय पर्यटक आशिल्ले. देखून संवसारभरांतल्या लोकांनी चड हुस्को उक्तायला. चीन सरकार मात, आमी चीनी नागरिकांची आनी हांगा येवपी सगल्या पर्यटकांची जतनाय घेतात. सध्या कोणेय हांगा येवपाक हरकत ना, अशें म्हणलां. ह्या दिसांनी स्वासाचीं दुयेंसां चड गतीन पातळटात, अशेंय सरकार म्हणटा, मात लोकांक शिंयाक लागून थंडी जाल्या काय एचएमपीव्ही पातळ्ळा, तें मात हो चीनी ड्रॅगन स्पश्ट सांगिना.
दोतोरांच्या मतान, कोरोना भशेनूच ह्या दुयेंसाचेरूय तशें वखद ना. तें जावचें न्हय, म्हूण जतनाय घेवपाची. अँटिबायोटिक्स दितात. पूण तांचें मोल कांय वेळा चड आसता. मणिपाल हाॅस्पिटलांत दुयेंसाची चांचणी करपाची सुविधा आसा. तातूंत नेमक्या कसल्या व्हायरसाक लागून थंडी, जोर येता तें कळटलें. ही उपचार पद्दत जीएमसींतूय सुरू करपा खातीर बेगीन पावलां उखलपाची गरज आसा. सोंशाच्या कासाक वतना वागाच्या कासाची तयारी करून वचपाक जाय, अशें म्हणटात. भारतांत एचएमपीव्ही पातळटा काय तो नियंत्रणा खाला येता, तें पळोवपाक उणेच 15 दीस तरी लागतले. ह्या दुयेंसाक जाय ती प्रतिकारशक्त भारतियां मदीं तशी आसा. तरीय जतनाय घेवप बरें. सध्या शिंयाचे दीस चालू आसात आनी हें दुयेंस ह्याच मोसमांत चड सक्रीय आसता. म्हणटकच खास करून ल्हान भुरग्यांची आनी जाण्ट्यांक सांबाळुया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
