भांगरभूंय | प्रतिनिधी
बंगळुरू, खबरां संस्था: HMPV ह्या व्हायरसाचो भारतांत पयलो दुयेंती मेळ्ळो. ह्युमन मेटापन्यूमो व्हायरस अशें ताचें नांव. आठ म्हयन्यांच्या बाळकाक ह्या व्हायरसाचो संसर्ग जाला. बंगळुरुंतल्या हॉस्पिटलांत ताचेर उपचार सुरु आसात. हो व्हायरस जाल्लो दुसरो दुयेंती कर्नाटकांतूच सांपडला. पयलो दुयेंती ८ म्हयन्यांचो जाल्यार दुसरो ३ म्हयन्यांचो. ह्या दोनूय दुयेतींचेर सध्या उपचार चालू आसात.
आतां मेरेन ह्या व्हायरसाचे दुयेंती चीनांत मेळटाले. मात बंगळुरुंतल्या ह्या बाळकाक हो व्हायरस जाला. ताणें प्रवास करूंक ना. मजगतीं हे घडणुके विशीं केंद्रीय भलायकी मंत्रालयाक म्हायती दिल्या. मजगतीं कांय दिसां सावनूच अशे तरेच्या व्हायरसांक तोंड दिवपाक आमी सज्ज आसात, अशें सरकारान म्हणलां. चीनांत कांय दिसां सावन ह्या व्हायरसा विशीं चिंता उक्तायले उपरांत भलायकी मंत्रालयान बसका घेतिल्ली.
व्हायरसाचीं लक्षणां कितें?
ह्युमन मेटापन्यूमो व्हायरस (एचएमपीव्ही) सामान्य थंडी आनी कोरोना व्हायरसा वरींच लक्षणां दाखयता. हातूंत खोंकली, जोर आनी थंडी अश्या लक्षणांचो आसपाव आसा. कोवीड-१९ उपरांत पांच वर्सांनी ह्युमन मेटापन्यूमो व्हायरस (एचएमपीव्ही)चो वायट परिणाम चीनच्या जायत्या वाठारांनी दिसूंक लागला आनी तो वाडतूच आसा. हाका लागून अधिकारी चिंतेंत आसात. अधिकारी लोकांक मास्क घालप आनी परत परत हात धुंवचे अशी जतनाय घेवपाचो उलो मारतात.
ह्युमन मेटापन्यूमो व्हायरस म्हळ्यार कितें?
ह्युमन मेटापन्यूमो व्हायरस (एचएमपीव्ही) हो आरएनए विशाणू, जो न्यूमोव्हिरिडे कुटुंबांतल्या मेटाप्युमोव्हायरस वंशांतलो जावन आसा. २००१ त डच संशोधकांनी सगळ्यांत पयलीं हाचो सोद लायिल्लो. हो विशाणू स्वासांतल्यान संक्रमण करपाक कारणीभूत थारता. भुरग्यांच्या नमुन्यांचो अभ्यास करतना ह्या विशाणूचो सोद लागिल्लो. संशोधन अशें सांगता, हो विशाणू चडांत चड स दसकां पसून प्रसारित आसा आनी आतां संवसारीक पांवड्यार स्वासाचो रोग म्हणून ताची वळख निर्माण जाल्या. एचएमपीव्ही मुखेलपणान खोंकतना आनी शिंकतना भायर काडिल्ल्या स्वासाच्या थेंब्यां वरवीं पातळटा. संक्रमीत व्यक्तींच्या लागसारच्या संपर्कांतल्यान वा दुशीत वातावरणाच्या संपर्कांतल्यानूय ह्या विशाणूचें संक्रमण जावपाक शकता. चीनी सीडीडी वेबसायट सांगता, ‘एचएमपीव्ही’ खातीर संसर्ग जावपाचो काळ तीन ते पाच दिसांचो आसता. हो विषाणू शिंयाच्या आनी गिमाच्या दिसांनी चड सांपडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
