भांगरभूंय | प्रतिनिधी
-केरळांत अटक करून हाडलो गोंयांत: गुन्यांवांत घुस्पिल्ल्यान घरकान्नीकूय अटकपणजीः फाटल्या 13 डिसेंबराक गुन्यांव फांट्याच्या ताब्यांतल्यान पळून गेल्लो जमनी हडप घोटाळ्यांतलो आरोपी सिद्दिकी उर्फ सुलेमान खान हाका अटक केल्या. उपरांत सोमारा सांजवेळा गोंय पुलिसांनी ताका गोंयांत हाडून अटक केल्या. तशेंच सुलेमानाची घरकान्न अफसाना उर्फ सारिका खान हिकाय गुन्यांवांत वांटेकार जाल्ल्यान पुलिसांनी अटक केल्या.
गोंय सयत देशभरांत बनावट कागदपत्रां तयार करून जमनी हडप करपा सयत खून करपाचीं 13 परस चड प्रकरणां आशिल्ल्या सिद्दिकी उर्फ सुलेमान खान हाका 12 नोव्हेंबर 2023 दिसा हुबळी-कर्नाटकांत गोंय पुलिसांनी अटक केल्ली. उपरांत ताका गोंयांत हाडून गुन्यांव फांट्याचे ताब्यांत दवरिल्लो. पूण, ताब्यांत आसतना सुलेमान 13 डिसेंबराच्या दनपारां 2.30 वरांचे सुमाराक ड्युटयेचेर आशिल्ल्या आनी आतां निलंबीत केल्ल्या आयआरबी हवालदार अमीत नायक हाच्या आदारान पळून गेलो. हाका लागून गोंयांत खवदळ जालो. विरोधी पक्षांनी ह्या विशयाचेर सरकाराक घेरांव घालून राज्यांतल्या कायदो आनी सुवेवस्थेचेर प्रस्न उप्रासपाक सुरवात केली.
सुलेमान ताब्यांतल्यान सुटले बरोबर गोंय पुलिसांनी खासा पंगड तयार करून रोखडेंच तांकां महाराष्ट्र, कर्नाटक, हैदराबाद आनी केरळ राज्यांनी धाडले. सुलेमान हुबळीक पळून गेलो असो दुबाव येवन पुलिसांनी हुबळींत सापळो रचून ताका पळपाक मजत करपी अमीत नायक हाका अटक केलो आनी ताका गोंयांत हाडून पुलीस सेवेंतल्यान काडून उडयलो. ते उपरांत सुलेमानाक हुबळींतल्यान पळून वचपाक आदार दिवपी हजरतसाब बवन्नवार हाकाय हुबळीच्यान पुलिसांनी धरून गोंयांत हाडलो.
——————
गोंय पुलिसांनी केरळ पुलिसांक केल्ले सादूर
फाटले धा दीस गोंय पुलीस सुलेमानाक धरपाचे यत्न करताले. हे खातीर पुलीस खात्याचे वरिश्ठ अधिकारी हेर राज्यांतल्या पुलिसांच्या संपर्कांतय आशिल्ले. निमाणे सुलेमान हुबळी सावन केरळांत पळून गेल्लो आनी आयतारा केरळ पुलिसांनी ताका अटक केल्या अशी म्हायती गुप्तचरां कडल्यान मेळ्ळे उपरांत गोंय पुलिसांनी केरळ पुलिसांक खबर दिली. ते उपरांत गोंय पुलिसांनी ताका गोंयांत हाडलो आनी सोमारा सांजवेळार ताका अटक केली.
—————————
सिद्दिकीच्या व्हायरल व्हिडियोक लागून राजकारण तापलें
– सिद्दिकीन कांय दिसां आदीं व्हिडियो तयार केलो आनी 12 पुलिसांनी ताका कोठडेंतल्यान पळोवन हुबळींत हाडलो आनी एन्कावंटराची धमकी दिवन हुबळी सोडलो, असो ताणें दावो केलो. तशेंच पुलीस खात्यांतल्या वरिश्ठ अधिकाऱ्याचेर आनी राजकी फुडाऱ्याचेरूय ताणें आरोप केला. ताच्या ह्या व्हिडियोक लागून परत एक फावट पुराय राज्यांत सनसनाटी जाली.
– सिद्दिकीचो हो व्हिडियो प्रदेश काँग्रेसीचे उपाध्यक्ष सुनील कवठणकार हांणी व्हायरल केलो. आम आदमी पक्षाचे राज्य निमंत्रक अमीत पालेकार हांणी सुलेमानाचो व्हिडियो व्हायरल केलो. पोरणें गोंय पुलिसांनी केल्ले ताचे चवकशे वेळार ताणें सांगिल्लें. ते उपरांत सोमारा अमीत पालेकार हांचीय पुलिसांनी चवकशी केली.
– सिद्दिकीचो दुसरो व्हिडियो सोमाराच प्रदर्शीत जालो. तातूंत ताणें अमीत पालेकाराचेर वेगवेगळे आरोप केल्ले. ह्या व्हिडियोंत ताणें अमीत नायक हांचे कडेन इश्टागत करून पालेकारान ताका पळून वचपाक आदार केलो असो दावो केला.
– दोनूय व्हिडियोचें सत्यापन पुलिसांनी सुरू केलां. तपास जाले उपरांत दोनूय व्हिडियो फाटलें सत उजवाडाक येतलें अशें सोमारा पणजेंत पत्रकार परिशदेंत उलयतना पुलीस म्हासंचालक आलोक कुमार हांणी सांगलें.
—————
अटक करपा विशीं म्हायती खबरदारी म्हूण दिवंक ना
दोन दिसां आदीं केरळांत सिद्दिकी हाका अटक केल्ल्याचे मुख्यमंत्री डॉ. प्रमोद सावंत हांणी सोमारा मडगांवां एके कार्यावळी उपरांत उलयतना सांगलें. उपरांत सांजवेळार म्हासंचालक आलोक कुमार, गुन्यांव फांट्याचे अधीक्षक राहूल गुप्ता हांणी पणजे पत्रकार परिशद घेतली आनी सुलेमानाक आयतारा केरळ पुलिसांनी केरळांत अटक केल्ल्याचें सांगलें.
– सुलेमानाक अटक केल्ल्याची म्हायती पुलिसांनी कित्याक दिली ना अशें पत्रकारांनी विचारलें तेन्ना पुलिसांनी गुन्यांवकार आशिल्ल्या सुलेमानाक गोंयांत हाडटना पुराय जतनाय घेवपाची अाशिल्ल्यानूच ताका अटक करपाची खबर जाहीर करूंक ना अशें राहूल गुप्ता हांणी स्पश्ट केलें.
———————-
चवकशे उपरांत अमीत पालेकार हांणी सांगलें…
1) सिद्दिकी सुलेमान प्रकरणांत सरकार म्हाका अटक करपाची तयारी करता. मंगळारा सकाळीं 11 वरांचेर परतून म्हाका चवकशी खातीर आपयला. त्या वेळार पुलीस अटक करपाक शकतात.
२) सिद्दिकीचो व्हिडियो 15 डिसेंबराक आयलो. ताच्या मतान 17 डिसेंबराक ताचें एडीट जाल्लें. पूण, आमी त्या वेळार देशांतल्यान भायर आशिल्ले. सुलेमानाचो व्हिडियो मेळ्ळ्या उपरांत आमी तो थेट पुलीस म्हासंचालका कडेन दिलो. सोशल मिडियाचेर व्हायरल करूंक ना.
3) पयल्या व्हिडियोंत सुलेमानान नांवां सांगिल्ल्यांची चवकशी करिनासतना सरकार मुद्दाम म्हाका ह्या प्रकरणांत घुस्पावपाचो यत्न करता. हांव खंयच्याय वेळार अटक जावपाक तयार आसां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
