भांगरभूंय | प्रतिनिधी
पणजीः फाटल्या धा वर्सांत देशांतल्या स राज्यांतल्या अस्तंत घाटांच्या पर्यावरणीय संवेदनशील वाठारांनी रानांचो वाठार 58.22 चौखण किलोमीटर उणो जाला. मजगतीं, गोंयांतलो अस्तंत घाट संवेदनशील रान वाठार 11.86 चौ.किमी. अस्तंत घाटांतल्या रानांच्या वाठारांत वट्ट उणावांत गोंयांतल्यान उणावाचें प्रमाण 20.37 टक्के आसा. ही म्हायती केंद्रीय पर्यावरण मंत्रालयान जारी केल्ल्या राष्ट्रीय रान सर्वेक्षण अहवालांतल्यान मेळयल्या.
अहवाला प्रमाण, 2013 वर्सा उत्तर गोंयांत येवपी अस्तंत घाट वाठारांत 380.82 संवेदनशील चौखण किमी. 2023 वर्सा 7.85 चौखण किलोमीटर उणें जावन 372.97 चौखण किलोमीटर जालें. मजगतीं, दक्षीण गोंयच्या अस्तंत घाट वाठारांत 872.68 चौ.किमी रानांचो वाठार आशिल्लो. 2023 वर्सा तो 4.01 चौ. किमीन उणो जावन 868.67 चौ. उणो जाला. वयल्या काळांत तमिळनाडूंतल्या अस्तंत घाट रान वाठारांत चडांत चड 284.29 कि.मि. उणाव जाला. जाल्यार केरळांत 323.8 चौखण किमिची वाड जाल्या.
ह्या अहवाला प्रमाण, 2012 वर्सा युनेस्कोन अस्तंत घाटाक संवसारीक दायजाचो दर्जो दिलो. हो वाठार धर्तरेवयलो सगळ्यांत व्हडलो जैवविविधताय हॉटस्पॉट म्हूण जाहीर जालो. हो प्रदेश गोंय, गुजरात, महाराष्ट्र, कर्नाटक, केरळ आनी तमिळनाडू ह्या देशांतल्या वट्ट 45 जिल्ह्यांनी पातळ्ळा. केंद्रीय पर्यावरण तज्ञ समितीन अस्तंत घाटांतलो 59 हजार 940 चौखण किलोमीटर वाठार पर्यावरणाक संवेदनशील अशें जाहीर केल्लें.
अहवाला प्रमाण, 2021 वर्साचे तुळेंत गोंयांत झाडांचें अाच्छादन 2.26 चौखण किमि. उणें जालां. 2021 वर्सा झाडां 260.08 चौखण किमी. जाल्यार 2023 वर्सा तें 257.82 चौखण किमी. जाल्यार 2021 वर्सा राज्याचें रान क्षेत्र 2023 वर्सा 2267.22 चौखण किमी. उणें जाला.
खारफुटी क्षेत्रांत वाड
अहवाला प्रमाण फाटल्या धा वर्सांत राज्यांत खारफुटी (मँग्रोव) क्षेत्रांत वाड जाल्या. 2013 वर्सा राज्यांत 22 चौखण किलोमीटर खारफुटी वाठार आशिल्लो. 2023 वर्सा 9.34 चौखण किमी वाडून 31.34 चौखण किमी. जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
