भांगरभूंय | प्रतिनिधी
17 जाणांचेर गुन्यांव दाखल; फोटोग्राफी, व्हिडियोग्राफी सामान जप्त
वाळपय: म्हादय अभयारण्य वाठारांत येत आशिल्ल्या जलवानी घसघशार पर्यटकांक पुरायपणान बंदी घाल्या. हो घसघसो सामको घातक आसा. हाका लागून ह्या वाठारांत येवपी पर्यटकांचेर बंदी घालपाचो आदेश रान खात्यान जारी केला. तरी लेगीत कर्नाटक वाठारांतल्या कांय जाणांनी ह्या घसघशार येवन आदेशाचें उल्लंघन केल्ल्या प्रकरणांत वट्ट 17 जाणांचेर गुन्यांव दाखल केला.
म्हादय वाठार अधिकारी गिरीश बैलूडकर हांणी दिल्ले म्हायती प्रमाण वट्ट 17 जाणांचेर गुन्यांव दाखल केला. वट्ट दोन गटांतल्यान हे लोक घसघशार मजा करपा खातीर आयिल्ले. ह्या घसघशार पर्यटकांक बंदी घाल्ली आसून लेगीत ते ह्या वाठारांत आयिल्ल्यान तांचेर गुन्यांव दाखल केल्ल्याचें तांणी सांगलें.
बेळगांवचे प्रतीक बांदोडकर आनी अमीत लोहार हांचो एक गट जाल्यार विजयकुमार वानकव (रावपी रायचूर) आनी शिवराज बुधिहाल (रावपी नारंगी) हांचो एक गट ह्या घसघशार आयिल्लो. तांणी फोटोग्राफी करपाचो यत्न केलो. तेच प्रमाण खूबशे कडेन चित्रीकरण केलें. हाका लागून तांचे सामान जप्त कलें अशें बैलूडकर हांणी मुखार उलयतना सांगलें.
ही कारवाय रान खात्याचे रक्षक शाबलो कोपाड्डेंकार रानक्षक विदेश गावस, सूर्यकांत गांवकार, मनोज गांवस, नामदेव गांवकार, गोपाळ गांवस, संजय गांवकार, गोविंद गांवकार, सुभाष नायक, चिदंबर गांवकार हांणी केली. वट्ट 17 जाणांचेर अभयारण्य कलम 27 रानसंरक्षण कायदो 1972 खाला ही कारवाय केल्ल्याचें ह्या वेळार तांणी सांगलें.
मजगतीं, रान खात्यान हो घसघसो घातक आशिल्ल्यान पर्यटकांक बंदी घाल्या. हाका लागून ह्या वाठारांत कोणेच वच्चें न्हय. येत जाल्यार तांचेर खर कारवाय करतले अशें बैलूडकर हांणी स्पश्ट केलें.
रान खात्यांच्या कर्मचाऱ्यांची नदर चुकोवन खूबशे जाण ह्या वाठारांत येवपाचो यत्न करीत आसतात. हाका लागून तांचेर गुन्यांव दाखल करपाची परिस्थिती रान खात्याचेर येत आसता. हे खातीर फुडारांत हाची दखल घेवन कोणेच घसघशार येवपाचो यत्न करचो न्हय अशे तरेची विनंती रान खात्या वतीन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
