भांगरभूंय | प्रतिनिधी
-मुख्यमंत्री डॉ. प्रमोद सावंत; मंत्रालयांत कार्डाचें अनावरणपणजीः कदंब म्हामंडळाच्या बशींतल्यान प्रवास करप्यां खातीर म्हामंडळान तयार केल्ल्या ‘स्मार्ट ट्रान्झीट कार्ड’चे बुधवारा मंत्रालयांत मुख्यमंत्री डॉ. प्रमोद सावंत हांचे हस्तुकीं अनावरण जाले. हे कार्ड वापरपी प्रवाश्यांक दरांत 10 टक्के सवलत दिल्ल्याची घोशणा मुख्यमंत्री डॉ. प्रमोद सावंत हांणी ह्या वेळार उलयतना दिली.
ह्या वेळार येरादारी मंत्री माॅवीन गुदिन्हो, आमदार आनी कदंब म्हामंडळाचे अध्यक्ष उल्हास तुयेंकार, येरादारी खात्याचे संचालक प्रविमल अभिषेक, वेवस्थापकीय संचालक पुंडलीक खोर्जुवेंकार हजर आशिल्ले. कदंब तशेंच ‘म्हजी बस’ येवजणे खाला राज्यभर चलपी सगल्या बशीं खातीर ‘स्मार्ट ट्रांझीट कार्ड’ कार्यरत जातलें. हें कार्ड ऑनलायन तशेंच वेगवेगळ्या बस स्टॉपांचेर कावंटरा वरवीं मेळटलें. प्रवाशांक हें कार्ड फुकट दितले. ताका रिचार्ज केल्यार प्रवाशांक राज्यभर तशेंच हेर राज्यांनी चलपी कदंब बशींतल्यान प्रवास करपाक मेळटा अशें मुख्यमंत्र्यांनी सांगलें.
हें कार्ड वापरपी प्रवाशांक तिकेट दरांत 10 टक्के सवलत दितले. ते भायर प्रवासा खातीर कदंब पास वापरपी विद्यार्थी आनी ज्येश्ठ नागरिकांकय ह्या कार्डा वरवीं प्रवासाचेर 50 टक्के सवलत मेळटली अशें तांणी सांगलें. कदंबा म्हामंडळ बदलत्या काळा प्रमाण प्रवाशांच्या सेवा आनी सुविधांनीय वेगवेगळे बदल करतात. राज्यांत ‘स्मार्ट ट्रांझीट कार्ड’ पद्दत सुरू जाले उपरांत कदंब बशी कंडक्टर नासतना चलतली. हेर सुवातेर म्हामंडळाच्या वाहकांची नेमणूक जातली अशेंय मुख्यमंत्र्यांनी सांगलें.
……………………………..
अपघातांचें प्रमाण उणें जावपाक जातली मजत
फाटल्या कांय वर्सांत राज्यांतल्या वाहनांचो आंकडो व्हड प्रमाणांत वाडला. हाका लागून अपघात आनी अपघाती मरणांचोय आंकडो वाडत आसा. देखून गोंयकारांनी गरज ना जाल्यार खाजगी वाहनां बदला ‘स्मार्ट ट्रांझीट कार्ड’ वापरून प्रवास करचो. हाका लागून राज्यांत अपघातांचो आंकडो उणो करपाकय मजत जातली अशें मुख्यमंत्री डॉ. प्रमोद सावंत हांणी स्पश्ट केलें.
……………………………..
चडांत चड प्रवाशांनी कार्ड वापरचेंः माॅवीन
कदंब म्हामंडळान सुरू केल्ली ‘स्मार्ट ट्रांझीट कार्ड’ सेवा कदंबांतल्यान प्रवास करपी सगल्या वर्गांतल्या प्रवाशांक ताचो व्हड फायदो जातली. देखून चडांत चड प्रवाशांनी हें कार्ड वापरपाक सुरवात करची असो उलो येरादारी मंत्री माॅवीन गुदिन्हो हांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
