भांगरभूंय | प्रतिनिधी
पणजीः प्रधानमंत्री आवास येवजण (शार) येवजणे खाला गोंयांत 3,145 घरां बांदल्यांत. हे खातीर केंद्र सरकारान 2 डिसेंबर 2024 मेरेन 75.04 कोटी निधी मंजूर केला. केंद्रीय गृहनिर्माण राज्यमंत्री तोखन साहू हांणी राज्यसभेंत दिल्ल्या लेखी जापेंतल्यान ही म्हायती मेळ्ळ्या. हे संबंदी एक अनकेत्री प्रस्न खासदार पीपी सूनीर हांणी मांडलो.
जापेंत दिल्ले म्हायती प्रमाण, शारांत रावपी आनी स्थीर घर नाशिल्ल्या व्यक्तीं खातीर 26 मे 2015 दिसा प्रधानमंत्री आवास येवजण (शार) सुरू जाली. हाचे वरवीं शारांनी सगळ्यो मुळाव्यो सुविधा आशिल्लीं घरां बांदल्यांत. हे येवजणे खाला गोंयांत वट्ट 3,146 घरांक मंजूरी दिली. एक घर सोडल्यार 3,145 घरां बांदून पुराय जाल्यांत.
हे येवजणे प्रमाण देशभरांत 88.32 लाख घरां बांदल्यांत. हे खातीर केंद्रान 1.66 लाख कोटी रुपया मंजूर केल्यात. उत्तर प्रदेशांतल्या सगळ्यांत चड 16.64 लाख घरां खातीर 27 हजार कोटी रुपया मंजूर जाले. हाचे भायर हे येवजणे खाला आंध्र प्रदेशांत 10.03 लाख, गुजरातांत 9.3 लाख, महाराष्ट्रांत 8.70 लाख, मध्य प्रदेशांत 8.34 लाख आनी तमिळनाडूंत 5.87 लाख घरां पुराय जाल्यांत.
गोंयांत 74.68 कोटी सीएलएस अनुदान
आपले पयलें घर वा फ्लॅट विकतें घेवपी लोकांक होम रिणाच्या कळंतराचेर अनुदान दितात. ते प्रमाण गोंयांत 74.68 कोटी अनुदान दिल्ल्याचो उल्लेख जापेंत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
