बिनभांडवली धंदो

भांगरभूंय | प्रतिनिधी

कोण तरी ह्या भिकाऱ्यांक कामाक लावन हो धंदो करता. दीसभर ते जोडटात, तातूंतली टक्केवारी तो तांकां हाडून सोडपी मनीस घेता आसतलो.

गोंयांत भिकारी फाल्त नात. 20 वर्सां पयलीं इफ्फी सुरू जाल्लो तेन्ना सुरवातेक तांकां पणजे शारांत प्रवेश दिनाशिल्ले. पुलीस धरून व्हरताले. थोड्यांक तांच्या गांवांकूय परत धाडिल्ले. उपरांत तांकां राज्यांत प्रवेशूच दिवचो न्हय, अशी लोकांची मागणी जावपाक लागिल्ली. पूण, थोड्यां म्हयन्यांनी हें सगलें सदचे भशेन शांत जालें. भिकारी मात बंद जावंक नात. ते अजूनय येत आसात. तांचो आंकडोय वाडला. आतां पाळोळें दर्यावेळेर येवपी भिकारी आनी तांचेच वांगडां लमाणी वेपाऱ्यांचेर पुलिसांनी कारवाय करची अशी मागणी काणकोणचे नगरसेवक रमाकांत नायक गांवकार हांणी केल्या. भिकाऱ्यांची ही समस्या फक्त पाळोळेंच्या वेवसायिकांकूच सतायना तर सगलेच कडेन हेंच पळोवंक मेळटा. खंयच्याय बस स्टॅण्डार, सिग्नलाचेर, दर्यावेळेर, बाजारांत, बसस्टाॅपांचेर एक तरी भिकारी फाटीक लागतातूच. खास करून सान भुरग्यांक हांडीर घेवपी बायलो वा चलयो. गोंयकार सामके दयाळू, मायेस्त म्हणटकच तांची हाका हरकत आसना. कांय जाण तर 10, 20 रुपया काडून भीक मागप्यांच्या हातार तेंकयतात. देखून हो भीक मागपाचो बिनभांडवली धंदो गोंयांत नेटान वाडत आसा.
गोंय हें पर्यटन राज्य. हांगा लाखांनी पर्यटक येतात. सुटयेच्या दिसांनी तर चडूच. खावन, पिवन, नाचून नवें वर्स मनोवपाक तर दरवर्सा चुकनासतना गोंयांत येवपी पर्यटक आसात. तांच्याच जिवार आमकां येणावळ मेळटा. पर्यटकांच्या खुस्तार पोट भरपी शेंकड्यांनी गोंयकार आनी भायले वेवसायीक हांगा आसात. मात भिकारी आनी लमाणी वेपाऱ्यांचे सतावणुकेक लागून बरेच पर्यटक त्रासल्यात. तातूंतले कांय जाण सिंधुदुर्गांत वचपाक लागल्यात. साहजिकूच पाळोळेंच्या वेवसायिकांक लुकसाण जावपाक लागलां, अशें नगरसेवक म्हणटा. तातूंत तथ्यूच ना अशें म्हणपाक मेळचें ना. वेवसायिकूच कित्याक, बसींनी प्रवास करपी, बाजार करपी गोंयकारांकूय हाचो अणभव आयला आसतलोच. लमाणी वेपारी चडश्यो बायलो. पर्यटकां फाटल्यान भोंवून सामान विकपी, तांकां मेंदी, शोभेच्या वस्तू विकपी, मसाज करपी, खाशेली वेणी घालपी….. लमाणी वेपारीय त्रासदायक थारपाक लागल्यात. तांकां दर्यावेळेर येवपाक दिवचें न्हय, अशी नेटाची मागणी कांय वर्सां पयलीं जाल्ली. मदीं काश्मिरी कपडे, शाॅल, पांयपुसणी विकपी काश्मीरी वेपाऱ्यां आडूय बोवाळ जाल्लो. पूण तांचे स्टाॅल आसतात. हे फाटल्यान भोंवपी भिकारी, वेपारी चड त्रास दिवपी. दर्यावेळांचेर पुलीस आसतात. ते घडये हाका हरकत घेना आसतले.
मडगांवच्यान एक गाडी सद्दां सकाळीं येवन भिकाऱ्यांक पाळोळें दर्यावेळेचेर हाडून सोडटा, असो आरोप नगरसेवक गांवकार हांणी केला. अशेच आरोप हाचे पयलीं पणजी, मडगांवच्या भिकाऱ्यांचे बाबतींत जाल्यात. तांकां हाडून सोडप्यांचें वर्णन पसून कांय लोकांनी दिल्लें. मुंबय शारांतूय अशेंच प्रकार घडटात, अशें छापून आयलां. हाचो अर्थ कोण तरी ह्या भिकाऱ्यांक कामाक लावन हो धंदो करता. दीसभर ते जोडटात, तातूंतली टक्केवारी तो तांकां हाडून सोडपी मनीस घेता आसतलो. ‘स्लमडाॅग मिल्योनेर’ सिनेमांत हें सगलें दाखयिल्लें. आमच्या देशाची प्रतिमा इबाडली, असो आरोप त्या वेळार शेंकड्यांनी लोकांनी दिग्दर्शकाचेर केल्लो. पुलिसांच्या मतान, म्हानगरांनी भीक मागपी भिकारी रातच्या वेळार चोरयोय करतात. कुटुंबाच्या कुटुंबां भीक मागपाच्या धंद्यांत आसात. तांचे जागे पसून थारिल्ले आसतात. आपल्या वाठारांत ते दुसऱ्या भिकाऱ्यांक येवंक दिनात. मरण आयिल्ल्या कांय भिकाऱ्यां कडेन लाखांनी रुपया पसून मेळ्ळ्यात. हाचे वयल्यान वाचप्यांनी कितें तें थारावचें. बायलो, चलयो ल्हान भुरग्यांक घेवन भोंवतात, तेन्ना त्या भुरग्यां कडेन बारीकसाणेन पळोवचें. तीं एक तर न्हिदिल्लीं आसतात वा दुयेंत दिसतात. कांय जाणकारांच्या मतान, तांकां न्हीद येवची म्हूण घुंवळे वखदांचो डोस पसून दिवपाचे प्रकार घडटात. पुलिसांनी दोतोरां वरवीं हाचो तपास करुंक फावो.
गोंयच्या पर्यटनाच्या मळाचेर जें कितें घडटा, ताच्यो कागाळी सद्दां कोण ना कोण तरी करीत आसतात. तातूंत भिकारी, जळू कशे फाटल्यान लागपी हेडगे वेपारी. खास करून विदेशी पर्यटकांक हे प्रकार आवडनात. तरीय तें कांयच करूंक शकनात. मात फुडले फावटी तांणी ह्या त्रासाच्या भंयान गोंयांत येवपाचें टाळ्ळें जाल्यार ताचें लुकसाण कोणाक जातलें, हाचो विचार सरकारी यंत्रणांनी केला? दर्यादेगो, वेळे वयले वेपारी सांगतात, म्हणजे तातूंत कितें तरी तथ्य आसतलेंच न्हय?