भांगरभूंय | प्रतिनिधी
अमेरिकेच्या अंतराळ एजन्सी नासान, जेम्स वेब अंतराळ दुर्बिणीन घेतिल्लो पयलो फोटो जारी केला. हो ब्रह्मांडाचो पयलो हाय रिझोल्यूशन रंगीत फोटो. आमी 13 अब्ज वर्सां फाटीं पळयतात. ह्या एका ल्हान कणाचेर तुमकां दिसपी उजवाड 13 अब्ज वर्सां सावन प्रवास करता, अशें नासाचे मुखेली बिल नेल्सन हांणी सांगलां.
अमेरिकेचो अध्यक्ष जो बाइडन हाणें व्हाइट हाऊसांत जाल्ल्या ब्रीफिंगांत ही म्हायती दिली. आयज हो एक इतिहासीक दीस अशें बाइडेन हांणी हे फोटो जाहीर करतना सांगलें. अमेरिके खातीर आनी पुराय मनीसजाती खातीर हें इतिहासीक आसा. अमेरिका कितले व्हडलें काम करूंक शकता तें ह्या फोटवांनी संवसाराक सांगलां. हो आमच्या सगळ्यां खातीर एक भोव रोमांचक खीण अशें अमेरिकेची उपाध्यक्ष कमला हॅरिसान सांगलें. आयचो दीस विश्वा खातीर एक नवो अध्याय.
75 हजार कोटी रुपया खर्च करून बांदिल्ली नासाची जेम्स वेब अंतरिक्ष दुर्बिणी फाटल्या वर्सा 25 डिसेंबराक फ्रेंच गियानांतल्या प्रक्षेपण पॅडा वयल्यान एरियान रॉकेटाचेर प्रक्षेपण केल्ली. नासा, युरोपियन स्पेस एजन्सी आनी कॅनडियन स्पेस एजन्सी ह्या संस्थांनी ही दुर्बिणी तयार केल्या. हे खातीर सुमार 75 हजार कोटी रुपया खर्च केल्यात. संवसारांतली ही सगळ्यांत बळिश्ट दुर्बिणी. तिका अंतरिक्षांतल्यान धर्तरेचेर उडपी सुकणें पसून सहज दिसता, हाचे वयल्यान दुर्बिणीची तांक कळटा.
हो प्रकल्प अमेरिकेच्या इतिहासांतलो सगळ्यांत व्हडलो आंतरराश्ट्रीय अंतरिक्ष विज्ञान प्रकल्प. नासाचो दुसरो मुखेली जेम्स वेब हांच्या नांवा वयल्यान ताका हें नांव दिलां. काळा प्रमाण नासान हे दुर्बिणींत जायतीं प्रगत तंत्रगिन्यानां जोडल्यात. तातूंतल्यान विश्वाचीं जायतीं गूढां उक्तीं जावंक शकतात.
एलियन सोदतले
1990 त प्रक्षेपित केल्ल्या हबल दुर्बिणी परस ती 100 पटीन चड बळिश्ट आसा. तशेंच विश्वाच्या सुरवेकच्या काळांत तयार जाल्लीं आकाशगंगां, उल्का आनी गिरे सोदूंक शकतली. हे दुर्बिणींतल्यान विश्वाचीं गूढां तशेंच परकी लोकांची उपस्थिती उक्ती जातली. हाचे वरवीं शास्त्रज्ञ विश्वांतलीं जायतीं सोडोवंक नाशिल्लीं गूढ सोडोवपाचो यत्न करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
