भांगरभूंय | प्रतिनिधी
आमदार विजय – मंत्री गावडे हांचें मदीं पेटलें, कामकाजाची न्यायालयीन चवकशेची मागणी
भांगरभूंय I प्रतिनिधी
पणजी : कला अकादमीच्या नुतनीकरणा वयल्यान विधानसभेंत आमदार विजय सरदेसाय आनी कला आनी संस्कृती खात्याचे मंत्री गोविंद गावडे हांचे मदीं वाद पेटलो. कला अकादमी नुतनीकरण कामाची निविदा काडिनासतना कंत्राट दिलें. जीएसआरचो दर तशेंच सीपीडब्लुडी नेमांक पाळो दिवंक नाशिल्ल्यान कंत्राटदाराचे पयशे बंद करून चवकशी करपाची मागणी विजय सरदेसाय हांणी केली. कला अकादमीच्या नुतनीकरणा खातीर सगले सोपस्कार योग्य पद्दतीन पुराय करून 49 कोटींच्या कामाची निविदा जारी जाल्या, अशें मंत्री गोविंद गावडे हांणी सांगलें.
कला अकादमीच्या पुराय इमारतीचें बांदकाम त्या वेळार चार कोटींत जाल्लें. पूण आतां तिच्या नुतनीकरणा खातीर वट्ट 39 कोटी रुपया मंजूर करून घेतल्यात. ते उपरांत मंत्र्यांनी हो खर्च 56 कोटीं मेरेन पावयलो. तशेंच निविदा मागयनासतना कंत्राट दिवन आनी सीपीडब्ल्यूडी नेमांचे उल्लंघन करून नुतनीकरणाचें काम सुरू आसा. हाका लागुनूच ह्या कामांत भ्रश्टाचार जाल्ल्याचो दुबाव आसून ह्या कामाची न्यायालयीन चवकशी करची, अशी मागणी विजय सरदेसाय हांणी लावन धरली.
आमदार सरदेसाय हांच्या आरोपांक जाप दितना मंत्री गावडे हांणी कला अकादमीच्या नुतनीकरणा खातीर 56 कोटींची मंजुरी घेतिल्ल्याचो दावो भायरायलो. मूळ रक्कम 39 कोटी आसा. पूण जीएसटी, कर आनी हेर गजाली मेळून हो आंकडो 49 कोटीं जाता अशें नमूद केले. त्याच वेळार मुख्यमंत्री डॉ. सावंत हांणी हस्तक्षेप करून ही रक्कम 39 कोटी आशिल्ल्याचे सभाघरांत सांगलें. ताका लागून परतून सरदेसाय हांणी गावडे हांचेर हल्लो केलो.
नुतनीकरण कामा खातीर निविदा मागोवंक ना, पूण कंत्राटदार नेमपा खातीर आपूण मंत्रीमंडळाची मंजुरी घेतिल्ली. तशी नोट आपूण मंत्रीमंडळ बसकेंत सादर केल्ली, अशें स्पश्टीकरण गावडे हांणी दिले. ताचेर हाचे मुखार अशा कामां खातीर सरकार ह्याच पद्दतीचो वापर करतले व्हय? असो प्रस्न सरदेसाय हांणी केलो.
तशेंच निविदा जारी करचे पयलीं सगले सोपस्कार पुराय करचे पडटात. सोपस्कार पुराय करिनासतना एकाच थारावीक एजन्सीक काम दिवप योग्य नाशिल्ल्याचो आरोप विजय सरदेसाय हांणी केलो. कला कादमीच्या नुतनीकरणाच्या कामाची निविदा 49 कोटींची आसा. सगले सोपस्कार पुराय करून काम सुरू केलां. बेगिनांत बेगीन काम पुराय करपाचे यत्न आसात, अशें मंत्री गोविंद गावडे हांणी सांगलें. महाराष्ट्रांत महाराष्ट्र सदनाच्या बांदकाम निविदेंत गैरप्रकार आशिल्लो. हाका लागून छगन भुजबळ हांकां बंदखणींत वचचें पडलें, हाचो उल्लेख विजय सरदेसाय हांणी केलो.
वादांत मुख्यमंत्र्यांक करचो पडलो हस्तक्षेप
आरोप – प्रत्यारोपांक लागून मुख्यमंत्री डॉ. प्रमोद सावंत हांंकां वादांत हस्तक्षेप करचो पडलो. कला अकादमी इफ्फी खातीर तयार जावपाची गरज आसा. काम बेगीन जावपा खातीर निविदा प्रक्रिया बेगीन पुराय केल्या, अशें मुख्यमंत्री डॉ. प्रमोद सावंत हांणी सांगलें. तशेंच कला अकादमीच्या कामाची निविदा 39 कोटींची 49 कोटींची न्हय, अशें मुख्यमंत्र्यान सांगलें.
अकादमीचे इमारतीचें डिझायन चुकीचें
कला अकादमीच्या नुतनीकरणाचो निर्णय जालो त्या वेळार आपूण चार्ल्स कुरैया फावंडेशना कडेन संपर्क केलो. पूण तांचे कडल्यान प्रतिसाद मेळूंक ना. कला अकादमीचे डिझायन चुकीचें आसा. ताका लागुनूच फक्त 40 वर्सां पयलीं बांदिल्ल्या ह्या इमारतीच्या स्लॅबांतल्यान पावसांत उदक गळटी जाता, अशें गावडे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
