भांगरभूंय | प्रतिनिधी
भारतांत हाचे पयलीं केन्नाच धरूंक ना, इतलो व्हडलो घुंवळे वखदांचो सांठो पयर अंदमान आनी निकोबार जुंव्या लागसार दर्यांत धरलो. कितलो? स हजार कील. मेथमफेटामायन (मेथ) नांवाचें हें ड्रग्स तटरक्षक दळाक एका जुंव्या लागसार ट्राॅलरांत मेळ्ळें. स जाणांक अटक केल्या. किलभर गांज्याचे लाखभर रुपया जातात. हाचे वयल्यान स हजार किलांचें कितले जातले, ताचो हिशोब करचो. गांजो तातूंतले तातूंत सवाय, म्हणटकच मेथ ड्रग्साचें मोल कोट्यांनी रुपयांचेर पावल्यार अजाप न्हय. फाटल्या कांय वर्सां सावन ड्रग्सांचो हुंवारूच आयिल्लो दिसता. पयलींय तें सांपडटालें. मात, आतां म्हारगाय वाडिल्ल्यान ताच्या मोलाचीं लाख, कोटी, अब्जांनी उड्डाणां जातात. वापरपीय वाडल्यात.
देशभरांत पुलिसांक ड्रग्स सांपडटात. ताचे भायर सांपडनाशिल्लीं लाखांनी कील आसतलीं. म्हणल्यार हो धंदो कितलो पातळ्ळा, ताचो अदमास येतलो. आमच्या गोंयांतूय दर दिसा कोणाक ना कोणाक ड्रग्सां सयत अटक जाताच. हांगा फ्लॅटांनी, पोरसांनी, रानांनी गांज्याचीं रोपां रोवपाचे प्रकार घडल्यात. पुलिसांनी ते उक्तडारूय हाडल्यात. हातूंत देशी, विदेशी नागरीक घुस्पल्ल्याचें दिशिल्लें. एका गुजरातांत फाटल्या चार वर्सांच्या काळांत 87 हजार कील ड्रग्स जप्त केला. हो आंकडो खुद्द गुजराताचे मंत्री हर्ष संघवी हांणी दिल्लो. ह्या ड्रग्साचें मोल 9600 कोटी रुपया. धरलां तितलेंच ड्रग्स गुजरातांत आनी थंयच्यान देशभरांत पावलांय आसुये. चार वर्सांत गुजरातांत ड्रग्स हाडपी, पुरवण करपी 2600 जाणांक धरल्यात. तर अंदुंच्या पयल्या स म्हयन्यांत 353 जाण सांपडल्यात. घुंवळे वखदां विरोधी विभागान फेब्रुवारींत गुजरात दर्यादेगेर 3300 कील ड्रग्स धरिल्लें, तर ह्याच म्हयन्यांत एके इराणी बोटींतल्यान 700 कील ड्रग्स जप्त केल्लें. हें वीख येता पाकिस्तान, अफगाणिस्तानांतल्यान. गुजरात पाकिस्तानाक लागीं आशिल्ल्यान तें थंय देंवयतात. इतलो कडक बंदोबस्त आसतना ह्या राज्यांत तें देंवताच कशें होवूय प्रस्न आसाच. सरकारी यंत्रणांनी हाचेर बारिकसाणेन नदर दवरपाक जाय. तटरक्षक दळान अंदमानाक जशें धरलें तशें तें नेमान सांपडप गरजेचें. पाव कील, अर्द कील सांपडटा तें किरकोळ विक्रेत्या कडेन. ठोक विकपी, जांकां सुत्रधार म्हणटात, त्या देशद्रोह्यांक धरप म्हत्वाचें. जाल्यारूच हाका आळाबंद येतलो.
भारतांत आयज झटपट पयसो करपाच्या नादांत कांय जाण ड्रग्स विकपाक लागल्यात. हेर तरांच्या वस्तुंचोय काळोबाजार करपाक लागल्यात. भांगर चोरयां हाडपाक लागल्यात. आंतरराष्ट्रीय घुंवळे वखदां नियंत्रण विभागाच्या (आयएनसीबी) मतान, भारतांत येवपी 40 टक्के ड्रग्स देशांत सगले कडेन वता. अर्थांत हाची सगल्यांत व्हडली बाजारपेठ खंय आसा, तें वाचप्यांक सांगपाक नाका. उरिल्लें 60 टक्के ड्रग्स अरब देश, आफ्रिकेंत वता. हरशी अफगाणिस्तान वा पाकिस्तानाक तांच्या देशांतल्यान तें आखाती देशांनी वा आफ्रिकेंत पावोवप चड पयस न्हय. तरीय ते व्हाया भारत कित्याक वता आसतले? काय हांगाची वितरण वेवस्था सामकी संवसारीक पांवड्याची आसा? भारत हो ड्रग्स पुरवणेचो सोंपो मार्ग जाला, हें आयएनसीबीच मान्य करता. पयलीं युरोप, अमेरिका व्हडली बाजारपेठ आशिल्ली. आतां अरब देश ते बाबतींत वयर सरला. थंय पयसो खुळखुळटा ताचो हो परिणाम न्हय मूं? आखाती देशांनी खंय वर्साक 2 लाख कोटी रुपयांचें ड्रग्स वता. जाणकारांच्या मतान, आफ्रिकेंतल्या कांय देशांनी बंडखोरी वाडल्या, तांकां ड्रग्सा वरवीं मेळपी अर्थीक बळगेंच जापसालदार आसा. पाकिस्तानांत, आखाती देशांनीय तातूंतलें कांय झिरपता. कायम हाचेर हल्लो कर, ताचेर हल्लो करप असले प्रकार थंय जावपाक लागल्यात. इतलो पयसो ह्या बंडखोर, आतंकवादी संघटणां कडेन खंयच्यान आयलो? देशांच्या लश्करां कडेन पसून ना, असलीं अत्याधुनीक शस्त्रां तांचे कडेन आसात.
फक्त गुजरातांतल्यो दर्यादेगो वा धक्यां वयल्यान हें ड्रग्स येना, तर महाराष्ट्र, केरळांतल्यो दर्यादेगोय स्मगलर वापरूंक लागल्यात, अशें आयएनसीबीक दिसता. महाराष्ट्र आनी केरळा मदीं गोंय आनी कर्नाटक आसा. ह्या राज्यांच्या दर्यादेगांचेर असले कसलेच वेव्हार जायनात काय? मिझोरामांतल्या चंपय आनी मणिपुरांतल्या मोरेह गांवांचेंय नांव ड्रग्सां खातीर घाणवलां. दर्यादेगो राखप्यांचेर व्हड जापसालदारकी आसताच, पूण देशांतर्गत पुलिसांनीय चड सादूर रावपाक जाय. गोंया सारक्या पर्यटन राज्यांनी तर चडूच. युरोप, अमेरिकेंत नातलां आनी नव्या वर्सा निमतान मौजा चलतात. त्या वेळार अर्थांत ड्रग्सांचो वापर जाता आसतलो. सगल्यांत चड ड्रग्स वर्स अखेरेकूच चड सांपडटा. अंदमान आनी निकोबार जुंव्यांचेर धरलां तेंवूय खंयतरी व्हरपाचें आशिल्लें. घडये भारतांत वा पूर्वे कडल्यान मुखार अमेरिकेंत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
