भांगरभूंय | प्रतिनिधी
मडगांवां सेंद्रीय शेतीक उर्बा दिवपा खातीर शेतकार आनी गिरायक मेळावो
पणजी, प्रतिनिधी : सेंद्रीय शेतीचे महत्व आनी रसायनीक शेतीचो दुशपरिणाम हे लोकांक कळलां. रसायनीक शेतीचो दुशपरिणाम व्हड प्रमाणात जाला आनी हेच प्रमाणात अभ्यास चालीक लागला. हाचे दुशपरिणाम लोकांक कळ्ळ्यात आनी दरेक जाण भलायके विशीं सादूर जाल्ले आसात. भलायकेक कितें बरें हाचो लोक विचार करतात, अशें शेतकी संचालक संदीप फळदेसाय हांणी सांगून सेंद्रीय शेतीत पिकावळीचो खर्च वाडटा, देखून आमी गोंयकारांनी शेतकरांची व्यथा समजून घेवन तांका तेंको दिवपाक जाय, असो उलो मारला.
शेतकी संचालनालय 30 नोव्हेंबर ते 1 डिसेंबर मजगतीं मडगांव कृशी विज्ञान भवनांत गिरायक आनी विक्रेते मेळावो घडोवन हाडटलें. ह्या मेळाव्या विशीं म्हायती दितना संचालक संदीप फळदेसाय उलयताले.
मुख्यमंत्री आनी आमचे मार्गदर्शक शेतकी मंत्री रवी नायक हांचे फुडारपणा खाला शेतकी खाते आपलें काम मुखार व्हरत आसा. हें काम मुखार व्हरता आसतना खातें राज्यांच्यो 34 येवजणो आनी केंद्रीय 11 येवजण्यो राबयता तांतूंत गोंयची 60 टक्के भागीधारी आनी केंद्राची 40 टक्के भागीदारी आसा. पूण दोन येवजण्यो अश्यो आसात तांतूत 100 टक्के अनुदान केंद्रातल्यान मेळटा. तांतूंतली एक येवजण परंपरागत कृशी विकास येवजण जावन आसा आनी हे येवजणे खाला शेतकऱ्यांक सेंद्रीय पद्दतीन पिकावळ काडपा खातीर प्रोत्साहन दिता, अशें फळदेसाय हांणी सांगलें.
गोंयचे शेतकार ल्हान आसले कारणान वेवसायीक शेती कोण करीनात. जी पिकावळ येता ताचो स्वता पुरतो वापर करता आनी जे अदीक उरता ते व्हरून विकतात. जमनीची आकारा ल्हान आसले कारणान ते वेवसायिक करनात आनी ते करता आसताना कमीत कमी रसायनीक साऱ्याचो, वखदांचो वापर करतात अशें फळदेसाय हांणी सांगलें.
जर रसायनीक साऱ्याचो वापर कमी करून सेंद्रीय शेती केली जाल्यार पिकावळ कमी मेळटा. पिकावळ कमी आसून तांचे पिकावळी दर चड मेळपाक जाय म्हूण खात्याचो यत्न आसा आनी ही येवजणे खाला गिरायक आनी विक्रेते मेळाव हाडटले, अशी म्हायती फळदेसाय हांणी दिली.
हाचे वरवीं गिरायक आनी विक्रेते एक माचयेरे येतले. गिरायकांक पिकावळीचो दर्जो तपासपाक, वेवसायच्या माध्यमत्याल्यांन गिरायकांक शेतकार संघटनेकडे, सर्टीफायींग एजन्सीकडे चर्चा करपाची एक संद मेळटली. हांतूतल्या वेवसाय करपाक आनी तो वाडोवपाक उर्बा मेळटली, अशे फळदेसाय हांणी म्हणले.
ह्या निमतान दोनूय दिसा परिशद घडोवन हाडटले. हांतूत प्रामुख्यान सेंद्रीय शेती, जैविविधताय संवर्धन, ब्रेंडींग आनी मार्केटींग, डिजीटल मार्केटींग, इ कोमर्स हे विशया वांगडा शेंद्रीय शेती, सैमीक शेती, सेंद्रीय शेतीचो दर्जो वाडोवप, सेंद्रीय पद्दतीन शेत रोवपी शेतकार आपलो अणभव हे परिशदेत मांडटले. ह्या मेळाव्यांक 60 स्टॉल आसतले आनी सेंद्रीय पद्दतीन शेती करपी शेतकार संघटना आपली सेंद्रीय पद्दतीन काडिल्ली पिकावळ प्रदर्शना खातीर दवरतले. गोंयकार जांका सेंद्रीय पिकावळ विकती घेवपाची इत्सा आनी सेंद्रीय पिकावळ तशेंच शेती विशीं चड म्हायती जाणून घेवपाची आसा तांचेनी दोन दिसाच्या ह्या मेळाव्याक हजरी लावची, असो उलो फळदेसाय हांणी मारलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
