भांगरभूंय | प्रतिनिधी
एकलो मनीस समाजांत जादू घडोवंक शकता. तो जर शिक्षक आसल्यार मागीर विचारपाक नाका. नेमांचे फास्के भितर तुमी वेगळो विचार करपाक शकतात. मात तो चालीक लावपाक तुमकां धाडस दाखोवचें पडटलें. हें तुमकां हांव सांगतां, हांव कुर्टी- फोंडेंच्या अमेय उच्च माध्यमीक विद्यालयांत शिकोवपी अश्टताशी शिक्षकाक लागून. ते आतां विद्यालयाचे प्राचार्य आसात. पयलीं शिक्षक म्हूण हे संस्थेंत रुजू जाल्ले. ते हेर शिक्षक, भुरग्यांक घेवन भोंवडेक वचपाचें थारायतात, तेन्ना तें व्हड जापसालदारकेचें काम आसता. तातूंत त्या शिक्षकाचो कस लागता. ताचे भितरले गुण लेगीत कळटात. तुमचें व्यक्तीमत्व सुदारपाक हें गुण मुखार उपेगी पडटात. हे शिक्षक जावन आसात सुभाष जाण. तांचें शिक्षण फोंडें म्हालांत जालें, ते एक उत्कृश्ट निवेदक. टिव्ही, आकाशवाणीचेर खबरोय दिवपाक लागले. इतलेंच न्हय, तर बरे फोटोग्राफर, अभिनेते म्हूणय तांचें नांव जालें. ह्या वावरा खातीर तांकां जायते पुरस्कार फावो जाल्यात.
सरकाराची भोंवडेक वचपाची एक येवजण आसा. ताची म्हायती जाण सरान घेतली आनी ते विद्यार्थ्यांक घेवन सुटयेंत भायर सरले. आतां मेरेन अमेय विद्यालयाच्या खुबश्या विद्यार्थ्यांनी भोंवड्यो केल्यात. जे गेल्यात ते भाग्यवान म्हणपाक जाय. 1995 वर्सा ते ह्या उच्च माध्यमिकांत आयले. आतां मुखेली जाल्यात. तांकां गोंय राज्याचो उत्कृश्ट शिक्षकाचो पुरस्कार फावो जाला. फोटोग्राफी, अभिनया खातीर जायतीं इनामां मेळ्ळ्यांत. हें हांव कित्याक सांगतां? तांची हांव तोखणाय करपाक न्हय, तर हेरांनी लेगीत तांचे पसून प्रेरणा घेवची म्हूण. भोंवडेक वचपाचे येवजणेचो तुमकां जसो लाव जाता, तसो विद्यार्थ्यांक लेगीत जाता. खास करून तांची अभ्यासाची आवड वाडटा. इतिहास, भुगोल आवडूंक लागता. तुमचें व्यक्तीमत्व फुलता. तुमचे भितर आत्मविस्वास येता. जो तुमकां शाळेंतल्या विंगडविंगड कार्यावळींतल्यान मेळटा. बरो अणभव मेळटा. तो फुडाराक उपेगी पडटा. तेन्ना विद्यार्थ्यांनी शाळेचे दरेके कार्यावळींत वांटो घेवपाक जाय.
अमेय विद्यालयाच्या विद्यार्थ्यांनी हंपी, रत्नागिरींतलें लोकमान्य टिळक हांचें घर, कन्याकुमारी अश्यो जायत्यो भोंवड्यो केल्यो. ताचे पसून विद्यार्थ्यांक प्रेरणा मेळटा. थोड्यांच्या मनांत कुतुहल निर्माण जाता. त्या थळा विशीं म्हायती मेळिल्ल्यान गिन्यान वाडटा. जर आमी त्या म्हान मनशांचें अनुकरण केलें जाल्यार आमीय तांचे भशेन जावपाक शकतात, अशी प्रेरणा मेळटा. आपूण जर शिक्षक म्हूण आपलोच विचार केलो जाल्यार अशें जावंक शकता? आपली नोकरी कमी पगाराची, कराराची शाश्वती ना, अश्यो जायत्यो समस्या आसतात. पूण तुमचे नदरे मुखार फक्त विद्यार्थी आसपाक जाय. तांच्या बऱ्या खातीर आपूण कितें करपाक शकता, तें लेगीन नेमा भितर रावन हाचो विचार करून कार्यावळी आखूंक जाय.
जाण सर सांगतात ः म्हाका जायत्यो अडचणी आयल्यो. आतां तरी खूब सोंपें जालां. म्हजे सांगाती बरें काम करपी आसलें, म्हूण हें साध्य जालें. इतिहासाची मुखेली रंजिता वाघुर्मेंकार, संदीप शिलकार, दीप्ती वायंगणकार, प्रकिता फडते, अस्मिता कळंगुटकार हे सारके सहकारी मेळ्ळे. तांचे खेरीज सगल्या स्टाफाचो, वेवस्थापनाचोय तेंको, आशीर्वाद आसलोच.
ते सांगतात, ज्या विद्यार्थ्यांक इतिहास आवडटा ते जरुर करियर करपाक शकतले. बरेच खेप लागची सुवात आमी पळयनात. ताचे कडेन आडनदर करतात. सरकार तुमकां राज्या भायर वचपाक पयशे दिता, देखून तुमी सुटयेंत ताचो लाव घेवपाक जाय. हाचो फायदो चड विद्यार्थ्यांक जाता. कर्नाटक, महाराष्ट्र, गुजरात हीं राज्यां आमकां लागीचीं. रेल्वे, बस अशीं परवडपा सारकीं माध्यमां आसात. रेल्वे तर सवाय. तातूंतल्यान तुमी तुमकां जाय ते सुवातेक भेट दिवंक जाय. ते सुवातेचो अभ्यास शिक्षकांनी करपाक जाय. ते भोंवडेचेर आदारीत विद्यार्थ्यांक अहवाल बरोवपाक सांगपाक जाय. शिक्षक खुब कितें करपाक शकता. पूण सुटयेंत भोंवडेचेर व्हरून तो विद्यार्थ्यांचें करियरुय घडोवंक शकता.
ई पुस्तक कार्यशाळा
जर तुमकां ई पुस्तक करपाचें आसा, जाल्यार पुण्यांतली सहयोगी नांवाची एक संस्था ऑनलाईन कार्यशाळा घेवपाची आसा. तातूंत तुमी जरुर वांटेकार जायात. ही संस्था बऱ्योच कार्यशाळा घडोवन हाडटा. ते विशीं तुमी 70281 70150 ह्या क्रमांकाचेर फोन करून विचारूं शकतात. तांच्या हेर कार्याशाळांचीय तुमकां म्हायती मेळूं शकता.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
