भांगरभूंय | प्रतिनिधी
सदानंद शेट तानावडेः गोंयांत 4 लाख वांगडी नोंदणीचे उद्दिश्ट पक्षान केलें पुराय
पणजी : प्रदेश भाजप संघटणात्मक वेंचणुकेची प्रक्रिया डिसेंबर मेरेन पुराय जावन नव्या प्रदेश अध्यक्षांची डिसेंबर मेरेन निवड जातली अशी म्हायती प्रदेश भाजप अध्यक्ष सदानंद शेट तानावडे हांणी दिली. गोंयांत 4 लाख वांगडी नोंद करपाचे उद्दिश्ट पुराय जालां, अशेंय तांणी सांगलें.
वेंचणूक प्रक्रियेचो नियाळ घेवपा खातीर भारतीय जनता पक्षाची आयतारा बसका जाली. हे बसकेक मंडळ समितीचे पदाधिकारी हाजीर आशिल्ले. वेंचणूक प्रक्रिये विशीं मंडळाचे मुखेली आनी पदाधिकाऱ्यांक मार्गदर्शन केलें अशें प्रदेश अध्यक्ष सदानंद शेट तानावडे हांणी सांगलें. बसकेक वेंचणूक अधिकारी प्रेमानंद म्हांब्रे, मंत्री सुभाष शिरोडकार, आदले खासदार अॅड. नरेंद्र सावयकार, अॅड. विश्वास सतरकार, सभापती रमेश तवडकार, फ्रान्सीस सिल्वेरा आनी हेर फुडारी हाजीर आशिल्ले.
राज्यांत 4 लाख वांगडी नोंदणीचें उद्दिश्ट पुराय जाल्ल्यान आतां वेंचणूक प्रक्रियेक सुरवात जातली. येता त्या 29 नोव्हेंबराक मोर्गदर्शनपर कार्यशाळा जातली. पक्षाच्यो राष्ट्रीय पदाधिकारी रेखा वर्मा आनी राज्याचे प्रभारी आशीश सूद हे कार्यशाळेक हाजीर आसतले. हे कार्यावळींत वेंचणुकेची कार्यावळ निश्चीत जातली. राष्ट्रीय मळार संघटणात्मक वेंचणुकेची प्रक्रिया जानेवारी मेरेन पुराय जातली. गोंयांत ती डिसेंबर मेरेन पुराय जातली अशी म्हायती गोपां कडल्यान मेळ्ळी. महाराष्ट्र तशेंच झारखंड ह्या राज्यांनी विधानसभा वेंचणूक आनी लोकसभा पाेट वेंचणूक जाले उपरांत राज्यांतल्या तशेंच देशांतल्या फुडाऱ्यांक आतां विसव मेळटलो. हाका लागून संघटणात्मक वेंचणुके कडेन लक्ष दिवप फुडाऱ्यांक शक्य जातलें.
मजगतीं, आदले आमदार दयानंद सोपटे, आदले मंत्री दिलीप परूळेकार आनी दामू नायक हांचीं नांवां भाजप अध्यक्षपदाचे चर्चेंत आसात. वेंचणूक प्रक्रिया आतां सुरू जातली. अध्यक्षपदाच्या नांवांचो आजून विचार जावंक ना अशें प्रदेश भाजप अध्यक्ष सदानंद शेट तानावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
