बायलां आडचो हिंसाचार सोंपोवया

भांगरभूंय | प्रतिनिधी

बायलां आडचो हिंसाचार उणो जावचो म्हणून सगळ्यांनीच प्रत्यक्ष वा अप्रत्यक्षपणान वावुरपाचो सपुत घेवंचो. कारण  बदलाची सुरवात आपले कडल्यान जाता.

आयचो 25 नोव्हेंबर हो दीस बायलां आडची हिंसा सोंपोवपाचो संवसारीक दीस म्हणून पाळटात. आमच्या देशांत तर बायलेक एके वटेन देवता मानतात आनी दुसरे वटेन तिचेर सुमारा भायर अत्त्याचार, आगळिको जायत आसतात. आमचो समाज पुरुशप्रधान. देखून बायलेक समानतायेची वागणूक रासवळपणान मेळना.

शिक्षणाचो प्रसार उणो. अंधश्रद्धांचें जळमट.  दिव्यांगां विशीं सहसंवेदना उणी. ह्या सगळ्यांचो एकत्रित परिणाम बायलांचेर जावपी हिंसेंत जाता. तो मागीर घरांतलो छळ आसत वा भायर बायल मनशेचेर जावपी लैंगीक अत्त्याचार वा आॅफिसांतली आगळिक आसत. कोवीड काळांत देशांत बायलांचेर  भायर, कामाचे सुवातेर आनी घरगुती हिंसाचारांत व्हड वाड जाल्ली. चड करून अर्थीक स्वातंत्र्याचो उणाव बायलांक वायट वागणूक आनी त्रासा पासून स्वताची राखण करपाचे तांकीच्या मळार आनीक अपंग करता. कायदेशीर हक्क आसून लेगीत चडशा बायलांक मालमत्तेंत वांटो मेळपाचो हक्क मेळना. तशेंच कामगार वर्गांत बायलांचो वांटो चडसो अनौपचारीक अर्थवेवस्थेंत आसता, जाका लागून तांकां समाजीक संरक्षणाची उणीच संद मेळटा.

कामाचे सुवातेरय बायलांक लैंगीक हिंसाचाराचो चड धोको आसता.  थंय बायलांक लैंगीक त्रास दिवपा आडचो कायदो, 2013  अस्तित्वांत आसून लेगीत हें चालता. नॅशनल  क्राईम रिसर्च ब्युरो प्रमाण, कामाचे सुवातेर बायलां आड जावपी लैंगीक छळांत बळी पडिल्ल्या बायलांचो आंकडो वर्सा कणकणी वाडत वता. ही चिंतेची गजाल. दिव्यांगां आड घरांत आनी भायर हिंसक वागणूक जाता. तें चली भुरगें आसत तर तातूंत भर म्हणून लैंगिक शोशणाचे प्रमाणय चड आसता.

संवसारीक पांवड्यारय बायलो आनी चलयां आड हिंसाचार हो गंभीर आनी व्यापक विशय. संवसारीक भलायकी संघटनेच्या म्हणण्या प्रमाण संवसारांतल्या सरासरी दर तीन बायलां मदले उण्यांत उणे एके बायलेचेर आपल्या जिवितांत शारिरीक वा लैंगीक हिंसाचाराची घडणूक घडल्या आनी सुमार धा चलयां मदल्या एका चलयेक जबरदस्तीन संभोग वा हेर लैंगीक कृत्यांचो अणभव आयला. घरांतल्या वा भायल्या हिंसाचाराच्या बळींचो आंकडो आमच्या देशांत मेळप सोपें न्ही. ही म्हायती बायलां सोंपेंपणान दिवंक धजनात. शिक्षणाचो उणाव, गरिबी, समाजीक आनी अर्थीक विषमता, लिंगीक पूर्वग्रह आनी पितृसत्ताक समाजीक नेमांक लागून हें आनीक वाडटा आनी बायलांक उक्तेपणान कागाळ करपाची उणी संद मेळटा. आनी तांकां आनीक चड वायट परिणाम जावपाच्या भंयान तांचे आड गुन्यांव कळोवंक मेळनात. 

आमकां एक पद्दतशीर बदल जाय, जी फकत बहुआयामी पद्दतीन घडूंक शकता. हो बदल कुटुंबा आनी समाज पांवड्यार येवचो पडटलो. परिवर्तन हें दादल्यांचे मानसिकतायेंत येवचें पडटलें. भुरगेपणांतल्या शिक्षण आनी घरगुती आनी समाज पावंड्याचेर हस्तक्षेपा वरवीं लिंगभेद विचार परिवर्तनात्मक पद्दती चालीक लावंक मेळटात. घरांत चलो चलयेक समान वागणूक आनी प्रतिश्टा हो बदल येवंक जाय, तरच भायर समाज बदलाची अपेक्षा बाळगूं येता.

 लैंगिक समानतायेच्या उपक्रमांत दादले आनी बायलो दोगांयचोय आस्पाव करून उजू वागण्याची शिकवण समाजांत हाडूंक प्रयत्न जावंक जाय.  हेर पद्दतींनी सांस्कृतीक वृत्ती बदलप, धोरण आनी कायद्यांत सुदारणा करप, हिंसेचे बळी थारून  जितीं उरिल्ल्यांक आदार सेवा वाडोवप, आनी चड म्हायती मोहीम, कार्यशाळा आनी प्रशिक्षण कार्यावळी करप. आनी सगळ्यांत म्हत्वाचें म्हळ्यार बायलांक समान शिक्षण आनी आपसंरक्षणाचें प्रशिक्षण आनी तांच्या कागाळेची दखल बेगोबेग आनी चवकशी पक्षपाता बगर आनी वेळेचे मर्यादेंत जावप. 

आयच्या ह्या दिसा बायलां आडचो हिंसाचार उणो जावचो म्हणून सगळ्यांनीच प्रत्यक्ष वा अप्रत्यक्षपणान वावुरपाचो सपुत घेवंचो. कारण  बदलाची सुरवात आपले कडल्यान जाता.

– प्रकाश कामत