भांगरभूंय | प्रतिनिधी
‘स्टोरीज दॅट ट्रॅव्हल’ विशया वयल्या इफ्फी पॅनल चर्चासत्रांतलो सूर
भांगरभूंय । खबरां मेज
पणजीः मानवी भावना सार्वत्रीक आसात आनी सिनेमा हें भाशा निरपेक्ष माध्यम आशिल्ल्यान संवसारभरांतल्या लोकां कडलेन जुडपाक शकता. कथा आनी कथाकथनाचे कलेंत देश प्रदेशाच्यो शिमो, भास आनी संस्कृती हुपपाची तांक आसा काय ना, हाचेर चित्रपटाचो पल्लो निंबून आसता, असो सूर पणजे कला अकादमींत जाल्ल्या चर्चासत्रांत आयलो.
इफ्फी निमतान ‘स्टोरीज दॅट ट्रॅव्हल’ ह्या विशयाचेर पॅनल चर्चा आयोजीत केल्ली. ह्य प्रतिस्ठीत पॅनलांत भारतीय वंशाचे ब्रिटीश पारशी लेखक, नाटककार, पटकथा लेखक फारूख धोंडी, स्पॅनीश निर्माते कार्लोस सौरा, नामनेचे अभिनेत्री तनिष्ठा चॅटर्जी, नामनेचे अभिनेत्री आनी निर्माती वाणी त्रिपाठी टिकू आनी इंग्लीश म्हायतीपट दिग्दर्शक लुसी वॉकर हांचो आस्पाव आशिल्लो. भारतीय चित्रपट दिग्दर्शक आनी निर्माते बॉबी बेदी हांणी चर्चेचें सुत्रसंचालन केलें.
चर्चेंत कथाकथनाचे बारीकसाणीचेर उडवाड घातलो. प्रदेश, देश वा संस्कृती प्रमाण आसून लेगीत सार्वत्रीक जावपाची तांक ह्या कथांनी आसता, अशें मत उलोवप्यांनी ह्या सत्रांत मांडलें.
ल्युसी वॉकर हांणी सांगलें, ‘मावंटन क्वीनः द समीट ऑफ लखपा शेर्पा’ ह्या म्हायतीपटान इफ्फी सयत विवीध चित्रपट महोत्सवांत तुस्त तोखणाय मेळयल्या. कोणे तरी अश्या लोकां विशीं आनी प्राण्यां विशीं चित्रपट तयार करपाक जाय. आपल्याक पुराय संवसारभर भोंवपाक आवडटा, पूण पर्यटक म्हूण न्हय जाल्यार थळाव्या लोकांचेर चित्रपट करपाक आवडटा हे खातीर.
वाणी त्रिपाठी टिकू हांणी सांगलें, भारत ही आदीम काळा सावन कथाकथनकारांची भूंय. कथावाचन ही आमची परंपरा. भारता भायल्यान आयिल्ल्यो कथा लेगीत देशांत सांगतात. अखेर संवसारभर प्रवास केल्ल्या कथांनी सार्वत्रिकता आनी सांस्कृतीक नातें आसता.
फारूख धोंडी हांणी सांगलें, दरेक जमात, दरेक संस्कृतीच्यो स्वताच्यो पुराणीक कथा आसता, थंयच्यानूच कथा सुरू जाता. पुराणीक कथा आपापल्या संस्कृतीच्या नैतिकते विशीं सांगतात. कांय कथा वेगवेगळ्या देशांनी सांगतात जाल्यार कांय सांगिनात. संवसारांत सगळ्योच कथा प्रेक्षकां कडेन एकसमान जुडनात, हेंवूय तितलेंच खरें.
कार्लोस सौरा हांची धूव अॅना सौरा हांणी सांगलें, इंटरनॅट युगांत लोकांक संवसारभरांतली सामुग्री उपलब्ध आसा. हेच खातीर सगळ्या कथांक संवसारीक प्रेक्षक आसात. तनिष्ठा चॅटर्जी हांणी सांगलें, जेन्ना संकल्पना थळावी आसता तेन्ना ती प्रवास करता. आपणे कितें तरी सार्वत्रीक करपाचो यत्न करचो न्हय जाल्यार थळाव्यो कथा सांगपाचेर भर दिवचो. संस्कृती आनी भावनांची वैश्वीक भास सदांच प्रवास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
